અમદાવાદમાં હવે ઘર ખરીદવું મોંઘું પડશે

Ahmedabad Property Price Hike: અમદાવાદ શહેરમાં પોતાનું સપનાનું ઘર, દુકાન કે ઓફિસ ખરીદવાનું આયોજન કરી રહેલા નાગરિકો માટે ખૂબ જ મહત્વના અને આંચકાજનક સમાચાર સામે આવ્યા છે. આગામી 1 જુલાઈ 2026થી શહેરમાં રિયલ એસ્ટેટ અને મકાનોના ભાવમાં મોટો વધારો થવા જઈ રહ્યો છે. અમદાવાદના ક્રેડાઈ (Confederation of Real Estate Developers Associations of India) હાઉસ ખાતે યોજાયેલી બિલ્ડર્સ એસોસિએશનની એક હાઈલેવલ બેઠકમાં પ્રોપર્ટીના ભાવ વધારવાનો આખરી નિર્ણય લેવામાં આવ્યો છે. મધ્ય-પૂર્વ એશિયામાં ચાલી રહેલી યુદ્ધની પરિસ્થિતિ અને વૈશ્વિક સપ્લાય ચેઈન ખોરવાવાના કારણે બિલ્ડરો માટે બાંધકામ ખર્ચ વધતાં આ નિર્ણય લેવાની ફરજ પડી છે.

ક્રેડાઈ અમદાવાદની વિશેષ બેઠકમાં લેવાયો નિર્ણય
વૈશ્વિક કટોકટી અને તેના કારણે કન્સ્ટ્રક્શન રૉ-મટીરિયલ્સના વધતા ભાવોની રિયલ એસ્ટેટ ઉદ્યોગ પર પડેલી ગંભીર અસરો અંગે ચર્ચા કરવા માટે ક્રેડાઈ અમદાવાદ દ્વારા એક કટોકટી બેઠક બોલાવવામાં આવી હતી. આ વિશેષ મીટિંગમાં શહેરના આશરે 400 થી વધુ અગ્રણી બિલ્ડરો અને ડેવલપર્સે હાજરી આપી હતી. ક્રેડાઈના ચેરમેન રાજેશ વસવાણી અને પ્રમુખ આલાપ પટેલની આગેવાની હેઠળ મળેલી આ બેઠકમાં માર્કેટની પ્રવર્તમાન સ્થિતિ અને પ્રોજેક્ટ કોસ્ટ અંગે ઊંડું મંથન કરવામાં આવ્યું હતું, જેમાં સર્વાનુમતે ભાવવધારા પર મહોર મારવામાં આવી હતી.

સપ્લાય ચેઈન ખોરવાતાં કાચો માલ 50 ટકા સુધી મોંઘો થયો
ક્રેડાઈ અમદાવાદના ચેરમેન રાજેશભાઈ વસવાણીએ પરિસ્થિતિની ગંભીરતા સમજાવતા જણાવ્યું હતું કે, મધ્ય પૂર્વ એશિયામાં લાંબા સમયથી ચાલી રહેલા યુદ્ધના કારણે બિલ્ડિંગ મટીરિયલ્સની આંતરરાષ્ટ્રીય સપ્લાય ચેઈન સંપૂર્ણપણે ખોરવાઇ ગઈ છે. આયાતી સામગ્રીના પરિવહન ખર્ચ અને ઉપલબ્ધતામાં મોટી સમસ્યાઓ ઊભી થઈ છે, જેને કારણે રૉ-મટીરિયલના ભાવમાં 20%થી લઈને 60% જેટલો તોતિંગ ઉછાળો આવ્યો છે. બાંધકામ ક્ષેત્રમાં સૌથી વધુ વપરાતા મુખ્ય મટીરિયલ્સ (જેમ કે સિમેન્ટ, સ્ટીલ વગેરે) ના ભાવમાં સરેરાશ 30% થી 50% જેટલો ધરખમ ભાવવધારો થઈ ચૂક્યો છે અને આ ટ્રેન્ડ હજુ પણ ચાલુ જ છે. આના પરિણામે બિલ્ડરોની પ્રોજેક્ટ કોસ્ટ અસહ્ય રીતે વધી ગઈ છે. જો આ વૈશ્વિક યુદ્ધ હજુ લાંબુ ચાલશે, તો આગામી 6 થી 12 મહિનામાં બાંધકામ ઉદ્યોગ વધુ કપરી પરિસ્થિતિમાં મુકાઈ શકે છે.

વતને ગયેલા મજૂરો પરત ન ફરતાં લેબરની ભારે અછત
બાંધકામ ઉદ્યોગ અત્યારે માત્ર મોંઘા કાચા માલની સમસ્યાથી જ નહીં, પરંતુ મેનપાવરની તીવ્ર અછતથી પણ ઝઝૂમી રહ્યો છે. દેશના અન્ય રાજ્યોમાં લોકસભા ચૂંટણીઓ પૂર્ણ થઈ ગઈ હોવા છતાં પણ વતને ગયેલા પરપ્રાંતીય મજૂરો હજુ સુધી અમદાવાદ પરત ફર્યા નથી. મજૂરોની આ ભારે અછતને કારણે ચાલુ પ્રોજેક્ટ્સમાં બાંધકામની ગતિ અત્યંત ધીમી પડી ગઈ છે. સમયસર કાચો માલ ન મળવો અને લેબર ન હોવાને કારણે પ્રોજેક્ટ્સ સમયમર્યાદામાં પૂર્ણ કરવા બિલ્ડરો માટે મોટો પડકાર બની ગયા છે.

રેરાના કડક નિયમો અને પઝેશનમાં વિલંબની ચિંતા
રિયલ એસ્ટેટ ક્ષેત્રના નિયમન માટે અમલી 'રેરા' (RERA) એક્ટના નિયમો અનુસાર, દરેક બિલ્ડરે ગ્રાહકોને મકાનનું પઝેશન આપવા માટે એક ચોક્કસ સમયમર્યાદા નક્કી કરવી પડે છે. જો નિયત સમયમાં ગ્રાહકને ઘર ન સોંપવામાં આવે, તો બિલ્ડરો પર કાયદાકીય દંડ અને વ્યાજ ચૂકવવાનો મોટો આર્થિક બોજો આવી પડે છે. આમ, એક તરફ પ્રોજેક્ટ પૂરો કરવામાં વિલંબ થઈ રહ્યો છે અને બીજી તરફ બાંધકામ ખર્ચ વધી રહ્યો છે, જેના લીધે ડેવલપર્સ ચોતરફથી આર્થિક કટોકટીમાં ઘેરાયા છે.

સમજો ભાવવધારાનું ગણિત: કયા પ્રોજેક્ટમાં કેટલો ભાવ વધશે?
ગ્રાહકો પર એકસાથે મોટો આર્થિક ઝટકો ન આવે તે માટે ક્રેડાઈએ આ ભાવવધારાને 'ફેઝ-1' (પ્રથમ તબક્કો) નામ આપ્યું છે અને ક્રમશઃ વધારો કરવાનું આયોજન કર્યું છે. 1 જુલાઈ 2026થી લાગુ થનારો ભાવવધારો બે કેટેગરીમાં વહેંચવામાં આવ્યો છે:
નવા શરૂ થયેલા પ્રોજેક્ટ્સ: જે પ્રોજેક્ટ હાલમાં જ શરૂ થયા છે તેમાં સીધો 10% નો ભાવવધારો ઝીંકવામાં આવશે.
પૂર્ણ થવાના આરે હોય તેવા પ્રોજેક્ટ્સ: જે પ્રોજેક્ટ્સનું કામ પૂર્ણાહુતિના આરે છે, તેમાં ખરીદદારો પર 5% જેટલો વધારો આવશે.

સંસ્થાએ સ્પષ્ટ કર્યું છે કે 30 જૂન 2026 સુધી જૂના ભાવો સ્થિર રાખવાની જે મુદત આપવામાં આવી હતી તે હવે પૂર્ણ થઈ રહી છે. 15 જૂનથી જ આડકતરી રીતે નવા બુકિંગમાં પ્રક્રિયા શરૂ થઈ ગઈ છે અને 1 જુલાઈથી આ નવો ભાવવધારો સંપૂર્ણપણે અમલી બની જશે. અગાઉ ક્રેડાઈએ 15 મેના રોજ જાહેરખબર આપીને નાગરિકોને વહેલી તકે મિલકત ખરીદી લેવા અનુરોધ કર્યો હતો, જેનો લાભ ઘણા ખરીદદારોએ લીધો પણ છે.

નફા માટે નહીં પણ આ મજબૂરીનો નિર્ણય: ક્રેડાઈ
ક્રેડાઈ અમદાવાદના પ્રેસિડેન્ટ આલાપભાઈ એસ. પટેલે જણાવ્યું હતું કે, આ ભાવવધારો બિલ્ડરોના નફાના માર્જિન વધારવા માટે નથી, પરંતુ આ એક મજબૂરીનો નિર્ણય છે. દેશના અન્ય મેટ્રો શહેરો (જેમ કે મુંબઈ, દિલ્હી, બેંગલુરુ)ની સરખામણીમાં અમદાવાદમાં પ્રોપર્ટીના ભાવ આજે પણ ખૂબ જ ઓછા છે અને અહીંના ડેવલપર્સ અત્યંત નજીવા પ્રોફિટ માર્જિન સાથે કામ કરે છે. તેથી હવે રૉ-મટીરીયલ્સના આટલા આકરા વધારાને બિલ્ડરો માટે પોતાના ખિસ્સામાંથી સહન કરવો બિલકુલ અશક્ય બની ગયો છે. જો વૈશ્વિક સ્તરે યુદ્ધવિરામ થાય તો પણ સપ્લાય ચેઈન સામાન્ય થતાં 9 થી 12 મહિનાનો સમય લાગી શકે છે.

બિલ્ડરોની સરકાર પાસે ટેક્સ રાહત અને રેરામાં મુદત વધારવાની માંગ
બાંધકામ ઉદ્યોગ દેશના અર્થતંત્રનો કરોડરજ્જુ છે. તે દેશમાં સૌથી વધુ રોજગારી પૂરી પાડે છે અને ભારતના જીડીપી (GDP)માં 7.8% નો મહત્વનો હિસ્સો ધરાવે છે. આ ઉપરાંત સ્ટેમ્પ ડ્યુટી, જીએસટી (GST) અને વિવિધ ફીના માધ્યમથી રાજ્ય સરકારને પણ આ સેક્ટરથી જંગી આવક થાય છે. આ કપરા સમયમાં સામાન્ય જનતા પરનો બોજો હળવો કરવા માટે ક્રેડાઈએ સરકાર સમક્ષ જીએસટી અને સ્ટેમ્પ ડ્યુટીમાં રાહત આપવાની માંગ કરી છે. આ સાથે જ, યુદ્ધ અને લેબરની અછત જેવી અણધારી પરિસ્થિતિને ધ્યાનમાં રાખીને રેરા એક્ટની ‘ફોર્સ મેજર’ જોગવાઈ હેઠળ પ્રોજેક્ટ પૂર્ણ કરવાની સત્તાવાર સમયમર્યાદા વધારી આપવા રેરા ઓથોરિટી અને રાજ્ય સરકારમાં લેખિત રજૂઆતો કરવામાં આવી છે. બિલ્ડરો આશા રાખી રહ્યા છે કે સરકાર તરફથી આ બાબતે વહેલી તકે સકારાત્મક મદદ મળશે.