અમદાવાદમાં મેઘતાંડવ

Ahmedabad Heavy Rain Flood: અમદાવાદ અને આસપાસના વિસ્તારોમાં છેલ્લા કેટલાક દિવસોથી સતત વરસી રહેલા વરસાદે જનજીવનને ગંભીર રીતે પ્રભાવિત કર્યું છે.25 જુલાઈના રોજ હવામાન વિભાગ દ્વારા અમદાવાદ માટે ઓરેન્જ એલર્ટ જાહેર કરવામાં આવ્યું હતું. ભારે વરસાદની આગાહીને ધ્યાનમાં રાખીને જિલ્લા વહીવટી તંત્રએ આગોતરા પગલાં તરીકે શહેરની તમામ સરકારી તેમજ ખાનગી સ્કૂલો અને કોલેજોમાં રજાની જાહેરાત કરી હતી. બીજી તરફ, અમદાવાદ નજીક આવેલા બાવળા તાલુકામાં 15 કલાક બાદ પણ પાણી ન ઉતરતાં પરિસ્થિતિ ગંભીર બની છે.ખાસ કરીને સનાથલથી બગોદરા સુધીનો મુખ્ય માર્ગ પાણીમાં ગરકાવ થતાં વાહન વ્યવહાર સંપૂર્ણપણે બંધ કરી દેવામાં આવ્યો છે.રસ્તાઓ બંધ થતાં હજારો વાહનચાલકો અટવાયા હતા. બચાવ અને રાહત કામગીરી માટે અમદાવાદ ફાયરબ્રિગેડની બે ટીમોને બોટ સહિત સ્થળ પર મોકલવામાં આવી હતી. સ્થાનિક તંત્ર, પોલીસ, ફાયર વિભાગ અને NDRF જેવી એજન્સીઓ સતત પરિસ્થિતિ પર નજર રાખી રહી છે.

અમદાવાદમાં ભારે વરસાદની આગાહી વચ્ચે ઓરેન્જ એલર્ટ
ભારતીય હવામાન વિભાગ (IMD) દ્વારા અમદાવાદ જિલ્લામાં આગામી 24 કલાક દરમિયાન ભારે વરસાદની શક્યતા વ્યક્ત કરવામાં આવી હતી.ઓરેન્જ એલર્ટનો અર્થ એ થાય છે કે સામાન્ય લોકો તેમજ વહીવટી તંત્રએ સાવચેતી રાખવાની જરૂર છે અને નીચાણવાળા વિસ્તારોમાં ખાસ ધ્યાન રાખવું જરૂરી બને છે.ભારે વરસાદ સાથે વીજળી પડવાની શક્યતા,40થી 60 કિલોમીટર પ્રતિ કલાકની ઝડપે પવન,શહેરના નીચાણવાળા વિસ્તારોમાં પાણી ભરાવાની સંભાવના,નદી-નાળા અને તળાવોના જળસ્તરમાં વધારોઆ આગાહીને ધ્યાનમાં રાખીને અમદાવાદ મ્યુનિસિપલ કોર્પોરેશન (AMC), જિલ્લા વહીવટી તંત્ર અને આપત્તિ વ્યવસ્થાપન વિભાગ એલર્ટ મોડમાં આવી ગયા હતા.

બે દિવસમાં અમદાવાદમાં સરેરાશ 20 ઇંચ વરસાદ
ઉલ્લેખનીય છે કે, 23 અને 24 જુલાઈના અમદાવાદમાં ભારેથી અતિભારે વરસાદની આગાહી કરાઈ હતી. બે દિવસ દરમિયાન શહેરમાં સરેરાશ 20થી વધુ ઈંચ જેટલો વરસાદ ખાબકતા મોટાભાગના વિસ્તારોમાં જળબંબાકારની સ્થિતિ જોવા મળી હતી. સોસાયટીના બેઝમેન્ટથી લઈ બંગલાઓ સુધી પાણી ભરાઈ જતા લોકો લાચાર જોવા મળ્યા હતા.

સ્કૂલો અને કોલેજોમાં જાહેર કરાઈ રજા
વિદ્યાર્થીઓની સુરક્ષાને પ્રાથમિકતા આપતાં અમદાવાદ જિલ્લાના કલેક્ટરે 25 જુલાઈના રોજ તમામ સરકારી, અનુદાનિત અને ખાનગી શાળાઓ તેમજ કોલેજોમાં રજા જાહેર કરી હતી.ઘણા ખાનગી શિક્ષણ સંસ્થાઓએ ઓનલાઈન અભ્યાસની વ્યવસ્થા પણ કરી હતી.

બાવળામાં સ્થિતિ સૌથી ગંભીર
અમદાવાદ જિલ્લાના બાવળા તાલુકામાં સતત વરસતા વરસાદના કારણે અનેક વિસ્તારોમાં પાણી ભરાઈ ગયા હતા. ખાસ કરીને નીચાણવાળા વિસ્તારોમાં રહેણાંક સોસાયટીઓ, ખેતરો અને રસ્તાઓ પાણીમાં ગરકાવ થઈ ગયા હતા.15 કલાકથી વધુ સમય સુધી પાણી યથાવત રહ્યું,અનેક વિસ્તારોમાં ઘરોમાં પાણી ઘૂસી ગયું,વીજ પુરવઠો અસરગ્રસ્ત બન્યો,પીવાના પાણીની પણ સમસ્યા ઉભી થઈ,ઘણા પરિવારોને સુરક્ષિત સ્થળે ખસેડવાની જરૂર પડી હતી.અમદાવાદ જિલ્લાના બાવળા ખાતે ખૂબ મોટા પ્રમાણમાં વરસાદી પાણી ભરાયેલા છે અને લોકો ફસાયા હોવાના પગલે રેસ્ક્યૂ કરવા માટે અમદાવાદ ફાયરબ્રિગેડની બે ગાડીઓ બોટ સાથે રવાના કરવામાં આવી છે.

સનાથલથી બગોદરા સુધીનો રોડ સંપૂર્ણ બંધ
અમદાવાદ-રાજકોટ હાઇવે પર ચાંગોદર અને બાવળા પાસે ખૂબ વરસાદી પાણી ભરાયેલા હોવાના કારણે ગ્રામ્ય પોલીસે સનાથલથી બગોદરા સુધીના બંને તરફના અવરજવરના રોડને બંધ કરી ડાયવર્ટ કર્યો છે. છેલ્લા 12 કલાક બાદ પણ હજુ સુધી બાવળા વિસ્તારમાં વરસાદી પાણી ઉતર્યા નથી. જેને લઇને ગ્રામ્ય પોલીસે લોકોને અપીલ કરી રહી છે કે ગાડીઓ લઈને સૌરાષ્ટ્ર તરફ જવા અને આવવા માટે નવા ધોલેરા એક્સપ્રેસ વે થઈ વેજલકાથી બગોદરાનો ઉપયોગ કરવામાં આવે. કામ વિના લોકો ઘરની બહાર ન નીકળે તેવી અપીલ કરાઈ છે.

બોપલ ગામમાં લોકોના ઘરમાં પાણી ઘૂસ્યા
બોપલમાં અનેક મકાનો પાણીમાં બે દિવસથી જળમગ્ન થઈ ગયા છે. છતાં પણ અધિકારીઓ અને તંત્ર દ્વારા પાણીના નિકાલની કોઈપણ વ્યવસ્થા કરવામાં આવી નથી. કમર સમા પાણીમાં રહેવા માટે લોકો મજબૂર બન્યા છે. ત્રણ જેટલા વાસમાં બે દિવસથી પાણી ભરાયેલા છે.બોપલ ગામમાં હજુ પણ પાણી ન ઓસરતા સ્થાનિકો બોટ મારફતે લોકોને મદદ પહોંચાડી રહ્યા છે. કમર સુધીના પાણીમાં લોકો બે દિવસેથી રહેવા મજબૂર બન્યા છે.

અમદાવાદ સહિત 4 જિલ્લાઓ માટે રેડ એલર્ટ
હવામાન વિભાગની આગાહી મુજબ અમદાવાદ, કચ્છ, બોટાદ અને ભાવનગર જિલ્લામાં રેડ એલર્ટ જાહેર કરવામાં આવ્યું છે. આ જિલ્લાઓમાં ભારેથી અતિભારે વરસાદ પડવાની શક્યતા વ્યક્ત કરવામાં આવી છે. રેડ એલર્ટનો અર્થ એ છે કે વરસાદની તીવ્રતા એટલી વધુ હોઈ શકે છે કે સ્થાનિક સ્તરે જનજીવન, વાહનવ્યવહાર અને દૈનિક પ્રવૃત્તિઓને નોંધપાત્ર અસર પહોંચી શકે.અમદાવાદ શહેર અને આસપાસના વિસ્તારોમાં ભારે વરસાદ થાય તો નીચાણવાળા વિસ્તારોમાં પાણી ભરાવાની સમસ્યા સર્જાઈ શકે છે. શહેરના કેટલાક માર્ગો પર ટ્રાફિક ધીમો પડવાની સાથે પાણી ભરાવાને કારણે વાહનચાલકોને મુશ્કેલીનો સામનો કરવો પડી શકે છે. બીજી તરફ કચ્છ, બોટાદ અને ભાવનગર જેવા વિસ્તારોમાં ભારે વરસાદને કારણે સ્થાનિક નદીઓ, નાળાઓ અને જળાશયોમાં પાણીની આવક વધવાની શક્યતા રહે છે. સ્થાનિક તંત્ર દ્વારા સંભવિત પરિસ્થિતિ પર સતત નજર રાખવી જરૂરી બની છે.