અમદાવાદના પશ્ચિમ વિસ્તારમાં આવેલા પોશ શેલા વિસ્તારમાં ચોરીની એક અજીબ ઘટના પ્રકાશમાં આવી છે. અહીં એક જાણીતા જ્વેલરી શોરૂમમાં ગ્રાહકના સ્વાંગમાં આવેલી બે મહિલાઓએ અત્યંત ચાલાકીપૂર્વક સોનાના દાગીનાની ચોરી કરી છે. સેલ્સમેનની નજર ચૂકવીને આ મહિલાઓએ અંદાજે 1.48 લાખ રૂપિયાની કિંમતની સોનાની બે બુટ્ટીઓ પર હાથફેરો કર્યો હતો.
ખરીદીના બહાને આવી અને હાથફેરો કર્યો :&nbsp;
આ ઘટનાની વિગતો મુજબ, ફેબ્રુઆરી મહિનામાં બે મહિલાઓ શેલા વિસ્તારમાં આવેલા જ્વેલર્સના શોરૂમમાં પ્રવેશી હતી. બંને મહિલાઓએ સોનાની નાની ચૂની અને કડીઓ જોવાની ઈચ્છા વ્યક્ત કરી હતી. સેલ્સમેન જ્યારે તેમને વિવિધ ડિઝાઈન બતાવવામાં વ્યસ્ત હતો, ત્યારે આ મહિલાઓએ તકનો લાભ ઉઠાવ્યો હતો. સેલ્સમેન જ્યારે બીજા બોક્સ લેવા માટે થોડી સેકન્ડ માટે બીજી તરફ વળ્યો, ત્યારે આ મહિલાઓએ ચાલાકીથી સોનાની બુટ્ટીઓ સેરવી લીધી હતી.
સીસીટીવી ફૂટેજમાં ભાંડો ફૂટ્યો :
શોરૂમમાં ચોરી થઈ હોવાની જાણ તાત્કાલિક થઈ નહોતી. પરંતુ જ્યારે શોરૂમના કર્મચારીઓએ નિયમિત સ્ટોકની ગણતરી હાથ ધરી, ત્યારે સોનાની બે બુટ્ટીઓ ગુમ હોવાનું ધ્યાને આવ્યું હતું. આ બાબતની જાણ થતા જ મેનેજમેન્ટ દ્વારા શોરૂમના સીસીટીવી ફૂટેજની ઝીણવટભરી તપાસ કરવામાં આવી હતી. ફૂટેજ ચેક કરતા જાણવા મળ્યું કે ખરીદી કરવા આવેલી બે મહિલાઓએ જ આ દાગીના ચોર્યા હતા.
બોપલ પોલીસ સ્ટેશનમાં ફરિયાદ :&nbsp;
શોરૂમના સિનિયર મેનેજર દ્વારા આ સમગ્ર મામલે બોપલ પોલીસ મથકે ફરિયાદ નોંધાવવામાં આવી છે. પોલીસે 1.48 લાખની મતાની ચોરીનો ગુનો નોંધીને સીસીટીવી ફૂટેજ કબજે કર્યા છે. સીસીટીવીમાં મહિલાઓના ચહેરા સ્પષ્ટ દેખાઈ રહ્યા હોવાથી પોલીસે ટેકનિકલ સર્વેલન્સ અને હ્યુમન ઇન્ટેલિજન્સની મદદથી મહિલાઓની ઓળખ કરવાની અને તેમને ઝડપી પાડવાની તજવીજ હાથ ધરી છે. આ ઘટનાએ જ્વેલરી શોરૂમની સુરક્ષા વ્યવસ્થા પર ફરી એકવાર સવાલ ઉભા કર્યા છે.&nbsp;

શેલા જ્વેલર્સ ચોરીની ઘટના

ગ્રાહક બનીને આવેલી બે મહિલાઓએ નજર ચૂકવી 1.48 લાખની બુટ્ટીઓ ચોરી, સીસીટીવીમાં કેદ થઈ કરતૂત

March 9, 2026 | 16:51 IST