અમદાવાદ પોલીસે 1 મહિનામાં 328 ગુમ લોકોને શોધ્યા

અમદાવાદ શહેરના પૂર્વ વિસ્તારમાં પોલીસે લાંબા સમયથી ગુમ થયેલા વ્યક્તિઓને શોધવા માટે એક મહિનાનું વિશેષ અભિયાન શરૂ કર્યું છે, જેણે નોંધપાત્ર સફળતા હાંસલ કરી છે. પોલીસના ડેટા મુજબ, પૂર્વ વિસ્તારના 22 પોલીસ સ્ટેશનના કાર્યક્ષેત્રમાં 2007 થી ઓક્ટોબર 2025 સુધીમાં કુલ 2328 લોકો ગુમ થયા હતા. આ ગંભીર મુદ્દાને ધ્યાનમાં રાખીને, પોલીસે આશરે 2000 જેટલા ગુમ લોકોને શોધવાનું ઝુંબેશ શરૂ કર્યું છે. આ ઝુંબેશમાં 22 પોલીસ સ્ટેશનોની જુદી-જુદી ટીમો જોડાઈ હતી, જેના પરિણામે માત્ર એક મહિનાની ડ્રાઈવમાં જ 328 ગુમ લોકોને સફળતાપૂર્વક શોધી કાઢવામાં આવ્યા છે. આ સફળતા પોલીસની સંવેદનશીલતા અને અસરકારક કામગીરી દર્શાવે છે.

ઘણા લોકો લાંબા સમયથી ગુમ હતા

DCP ઝોન 5, અમદાવાદના જીતેન્દ્ર અગ્રવાલ એ આ અભિયાનની વિગતો આપતા જણાવ્યું કે, શોધાયેલા 328 ગુમ લોકોમાં ઘણા લાંબા સમયથી ગુમ વ્યક્તિઓનો પણ સમાવેશ થાય છે. આ અભિયાનમાં 15 વર્ષથી ગુમ થયેલા 6 લોકો અને 10 વર્ષથી ગુમ થયેલા 17 લોકોને પણ શોધી કાઢવામાં આવ્યા છે, જે પોલીસ માટે એક મોટી સિદ્ધિ છે. ગુમ થયેલા વ્યક્તિઓની વિગતવાર માહિતી આપતા DCP અગ્રવાલે જણાવ્યું કે, મળી આવેલા કુલ 328 વ્યક્તિઓમાંથી 18 વર્ષથી ઓછી ઉંમરની 8 છોકરીઓ અને 13 છોકરાઓનો સમાવેશ થાય છે. જ્યારે 18 વર્ષથી વધુ ઉંમરના 194 સ્ત્રીઓ અને 113 પુરુષોને પણ શોધીને તેમના પરિવારજનો સાથે પુનઃમિલન કરાવવામાં આવ્યું છે.

આ પણ વાંચો: અમદાવાદ : એસજી હાઈવે પોલીસ વાનનો અકસ્માત

મિસિંગ કેસોને ગંભીરતાથી લેવાની પ્રતિબદ્ધતા

પોલીસ દ્વારા શરૂ કરાયેલી આ ઝુંબેશ લાંબા સમયથી ચાલી રહેલા મિસિંગ કેસોને ગંભીરતાથી લેવાની પ્રતિબદ્ધતા દર્શાવે છે. આ સફળતાથી માત્ર ગુમ થયેલા લોકોના પરિવારોમાં જ નહિ, પરંતુ સમગ્ર સમાજમાં પોલીસ પ્રત્યેનો વિશ્વાસ વધ્યો છે. પોલીસનું આ અભિયાન અમદાવાદના પૂર્વ વિસ્તારમાં ગુમ થયેલા વ્યક્તિઓના કેસના નિકાલ માટે એક મોડેલ બની શકે છે.