અમદાવાદ : એસજી હાઈવે પોલીસ વાનનો અકસ્માત

અમદાવાદમાં માર્ગ અકસ્માતોના બનાવો અટકવાના નામ નથી લઈ રહ્યા. એસજી હાઈવે પર MBA વિદ્યાર્થીની કારથી બે હોમગાર્ડને ટક્કર માર્યાના બીજા જ દિવસે શહેરમાં વધુ એક ગંભીર અકસ્માત થયો. ગોતા વિસ્તારમાં 112 જનરક્ષક પોલીસ વાન પૂરઝડપે આવીને રસ્તાની બાજુમાં પાર્ક કરેલી કારને જોરદાર ટક્કર મારી હતી. ટક્કર એટલી ભારે હતી કે પાર્ક કરેલી કાર લગભગ 10 ફૂટ સુધી ધકેલાઈ ગઈ. સમગ્ર ઘટના નજીકના સીસીટીવીમાં સ્પષ્ટ રીતે કેદ થઈ છે.

ટક્કર વાગતાં જ સ્થાનિક લોકો ઘટના સ્થળે દોડી આવ્યા હતા. તપાસ દરમિયાન પોલીસ વાનમાંથી તૂટેલી હાલતમાં સીરપની બોટલો મળી આવી. સ્થાનિકોમાં આક્ષેપ ઉઠ્યો કે પોલીસ વાનનો ડ્રાઇવર નશાની હાલતમાં હોઈ શકે છે.

ઘટનાની જાણ થતાં જ એ ડિવિઝન ટ્રાફિક પોલીસ સ્થળ પર પહોંચી અને વાન ચલાવતા પોલીસ કર્મચારીને મેડિકલ ટેસ્ટ માટે મોકલ્યો. મળી આવેલી સીરપની બોટલ અંગે સોલા પોલીસને માહિતગાર કરવામાં આવી છે અને બોટલનું સેમ્પલિંગ સહિતની તપાસ શરૂ કરવામાં આવી છે. અકસ્માતમાં પાર્ક કરેલી કારનું મોટાપાયે નુકસાન થયું છે, જો કે ડ્રાઇવર સલામત બચી ગયો છે.

પોલીસ હવે સીસીટીવી ફૂટેજ, સીરપ સેમ્પલ અને મેડિકલ રિપોર્ટના આધારે આગળની કાર્યવાહી કરશે.