Ahmedabad : AC માં ભડકો, ઇન્દિરા બ્રિજ પાસે એપાર્ટમેન્ટમાં આગ, બે બાળકો ફસાયા!

અમદાવાદ (Ahmedabad)ના ઇન્દિરા બ્રિજ પાસે આવેલા એક એપાર્ટમેન્ટના ચોથા માળે અચાનક આગ લાગતાં ભયાનક પરિસ્થિતિ સર્જાઈ હતી. આગ એટલી વિકરાળ હતી કે તે ગણતરીની પળોમાં પાંચમા માળ સુધી પણ પહોંચી ગઈ હતી, જેના કારણે સમગ્ર વિસ્તારમાં અફરાતફરીનો માહોલ છવાઈ ગયો હતો.

આ ગંભીર ઘટનાની જાણ થતાં જ અમદાવાદ (Ahmedabad) ફાયર બ્રિગેડની 10 ગાડીઓ તાત્કાલિક ઘટનાસ્થળે ધસી આવી હતી. આગ લાગી ત્યારે ફ્લેટમાં બે નિર્દોષ બાળકો ફસાયા હોવાની ચિંતાજનક માહિતી સામે આવતાં પરિસ્થિતિ વધુ નાજુક બની ગઈ હતી.

પ્રાથમિક તપાસમાં ફ્લેટના એર કન્ડીશનરમાં (AC) આગ લાગી હોવાનું જાણવા મળ્યું છે, જે બાદ આખો ફ્લેટ આગની ચપેટમાં આવી ગયો હતો. ફાયર બ્રિગેડના જવાનોએ પોતાની જીવની પરવા કર્યા વિના ફસાયેલા બાળકોને બચાવવા માટે ઝડપી કાર્યવાહી હાથ ધરી હતી. હાલમાં ફાયર બ્રિગેડની ટીમ આગને સંપૂર્ણપણે કાબૂમાં લેવાના સઘન પ્રયાસો કરી રહી છે અને ઘટનાસ્થળે વધુ તપાસ ચાલુ છે. આ હૃદયદ્રાવક ઘટનાને પગલે આસપાસના લોકોમાં ભારે ગભરાટ જોવા મળી રહ્યો છે.