અમદાવાદની 10 સ્કૂલોને બોમ્બથી ઉડાવવાની ધમકી! ઈ-મેઇલમાં એવું શું લખાયું કે તંત્ર દોડતું થયું?

Ahmedabad Schools Bomb Threat: અમદાવાદ શહેરમાં બોમ્બની ધમકીભર્યા ઈ-મેઇલે પોલીસ અને સુરક્ષા એજન્સીઓને દોડતી કરી દીધી છે. શહેરની આશરે 10 સ્કૂલોને બોમ્બથી ઉડાવી દેવાની ધમકી મળતા અમદાવાદ પોલીસ, ફાયર વિભાગ, બોમ્બ ડિસ્પોઝલ સ્ક્વોડ અને ડોગ સ્ક્વોડની ટીમો અલગ-અલગ સ્કૂલો પર પહોંચી ગઈ છે. મોટાભાગની ધમકી પશ્ચિમ અમદાવાદની સ્કૂલોને મળી હોવાનું સામે આવ્યું છે. ધમકીભર્યો ઈ-મેઇલ મળ્યા બાદ સ્કૂલ સંચાલકોએ તાત્કાલિક સ્થાનિક પોલીસને જાણ કરી હતી. સુરક્ષા ટીમોએ સ્કૂલ પરિસર ખાલી કરાવીને સઘન તપાસ શરૂ કરી છે. ઝાયડસ સ્કૂલ, વેજલપુરમાં પણ પોલીસની હાજરી વચ્ચે તપાસ હાથ ધરવામાં આવી હતી. વિદ્યાર્થીઓની સુરક્ષાને ધ્યાનમાં રાખીને સ્કૂલ દ્વારા બાળકોને વહેલા છોડી દેવામાં આવ્યા હતા.

અમદાવાદની કઈ સ્કૂલોને મળી ધમકી?
મળતી માહિતી પ્રમાણે ઝાયડસ સ્કૂલ વેજલપુર, બોડકદેવ સ્કૂલ ફોર ચિલ્ડ્રન સેટેલાઇટ, SGVP સ્કૂલ છારોડી, સંત કબીર સ્કૂલ અને એશિયા સ્કૂલ ડ્રાઇવ ઇન રોડ સહિતની જાણીતી શાળાઓને બોમ્બ વિસ્ફોટની ધમકીભર્યો ઈ-મેઇલ મળ્યો છે. અન્ય કેટલીક સ્કૂલોને પણ આવા ઈ-મેઇલ મળ્યા હોવાની માહિતી સામે આવી છે. ધમકી બાદ સ્કૂલોમાં સુરક્ષા તપાસ શરૂ કરવામાં આવી છે. બોમ્બ સ્ક્વોડ અને ડોગ સ્ક્વોડ દ્વારા કેમ્પસ, વર્ગખંડો અને અન્ય વિસ્તારોની તપાસ કરવામાં આવી રહી છે. હાલ સુધી કોઈ શંકાસ્પદ વસ્તુ મળી હોવાની સત્તાવાર પુષ્ટિ સામે આવી નથી.

DEOની સ્કૂલોને મહત્વની સૂચના
ઘટનાની ગંભીરતાને ધ્યાનમાં રાખીને જિલ્લા શિક્ષણ અધિકારી (DEO) રોહિત ચૌધરીએ તમામ સંબંધિત સ્કૂલોને સ્થાનિક પોલીસ સ્ટેશનમાં જાણ કરવા સૂચના આપી છે. તેમણે સ્કૂલ સંચાલકોને વિદ્યાર્થીઓમાં પેનિક ન ફેલાય તે રીતે કાર્યવાહી કરવા અને જરૂર પડે તો વિદ્યાર્થીઓને સુરક્ષિત રીતે બહાર કાઢીને વાલીઓને સોંપવા જણાવ્યું છે. આ સૂચનાના પગલે કેટલીક સ્કૂલોએ વાલીઓને મેસેજ કરીને બાળકોને લઈ જવા જણાવ્યું હતું. ત્યારબાદ વાલીઓ સ્કૂલ પર પહોંચીને પોતાના બાળકોને ઘરે લઈ જતા જોવા મળ્યા હતા.

ઈ-મેઇલમાં દિલજીત દોસાંજના કોન્સર્ટનો ઉલ્લેખ
બોમ્બ ધમકીભર્યા ઈ-મેઇલમાં માત્ર સ્કૂલોને જ નહીં, પરંતુ આગામી મોટા કાર્યક્રમોનો પણ ઉલ્લેખ કરવામાં આવ્યો છે. તેમાં ગાયક દિલજીત દોસાંજના મ્યુઝિક કોન્સર્ટને નિશાન બનાવવાની ધમકી આપવામાં આવી હોવાનો દાવો છે. ઈ-મેઇલમાં 1 નવેમ્બરે દિલ્હીના જવાહરલાલ નહેરુ સ્ટેડિયમ અને 21 નવેમ્બરે અમદાવાદના નરેન્દ્ર મોદી સ્ટેડિયમમાં યોજાનારા કાર્યક્રમો દરમિયાન બોમ્બ વિસ્ફોટ કરવાની ધમકી આપવામાં આવી હોવાનો ઉલ્લેખ છે. ઈ-મેઇલમાં ખાલિસ્તાન સંબંધિત ઉશ્કેરણીજનક ભાષાનો પણ ઉપયોગ કરવામાં આવ્યો છે.

ગુજરાત હાઈકોર્ટને પણ ધમકી?
આ જ ધમકીભર્યા ઈ-મેઇલમાં ગુજરાત હાઈકોર્ટનો પણ ઉલ્લેખ કરવામાં આવ્યો હોવાનું સામે આવ્યું છે. હાઈકોર્ટ પરિસરમાં ચોક્કસ સમયે બ્લાસ્ટ કરવાની ધમકી હોવાના પગલે સુરક્ષા એજન્સીઓ સતર્ક બની છે. બોમ્બ ડિસ્પોઝલ સ્ક્વોડ અને ડોગ સ્ક્વોડ દ્વારા મહત્વપૂર્ણ સ્થળોએ ચેકિંગ કરવામાં આવી રહ્યું છે.

સાયબર ક્રાઈમની તપાસ શરૂ
અમદાવાદની અનેક સ્કૂલો અને મહત્વપૂર્ણ સ્થળોને એકસાથે ધમકી મળતા અમદાવાદ પોલીસ, સાયબર ક્રાઈમ બ્રાન્ચ અને અન્ય સુરક્ષા એજન્સીઓએ તપાસ શરૂ કરી છે. હવે પોલીસ ઈ-મેઇલ ક્યાંથી મોકલાયો, કયા ઈ-મેઇલ આઈડીનો ઉપયોગ થયો અને તેના પાછળ કોણ છે તે શોધી રહી છે. ઈ-મેઇલના ટેકનિકલ ડિટેઇલ્સ, IP એડ્રેસ અને અન્ય ડિજિટલ પુરાવાના આધારે તપાસ આગળ વધારવામાં આવી રહી છે. હાલ પોલીસ અને સુરક્ષા એજન્સીઓની પ્રાથમિકતા સ્કૂલો, વિદ્યાર્થીઓ અને જાહેર સ્થળોની સુરક્ષા સુનિશ્ચિત કરવાની છે.