ફરી ગુજરાતી યુવક માટે ઘાતક બન્યો ડંકી રુટ, નિકારાગુઆમાં જ મોત

ડંકી રુટ પરથી અમેરિકા જવાનો મોહ રાખનારા લોકો માટે ફરી એક વાર ચેતવણીરુપ કિસ્સો બહાર આવ્યો છે. સાબરકાંઠા જિલ્લાના પ્રાંતીજ પાસેના મોયદ ગામના યુવાને અમેરિકા જવા માટે ડંકી રુટ પસંદ કર્યા બાદ રસ્તામાં નિકારાગુઆમાં તેનું મોત થયું હોવાના સમચાર ફરી વળ્યા છે. મળેલી માહિતી મુજબ આ યુવક ડાયાબિટીસનો પેશન્ટ હતો અને દોઢ મહિનાની મુસાફરી બાદ તેની પાસે રહેલી ડાયાબિટીસની ગોળીઓ ખુટી જતાં તે કોમામાં સરી પડ્યો હતો અને સારવારમાં તેનું મોત થયું હતું. 

વારંવાર માધ્યમો દ્વારા ડંકી રુટ અને તેની ઘાતક અસરોની માહિતી આપવામાં આવે છે છતાં હજું પણ ઘણા લોકો એવા છે કે ગમે તે ભોગે અમેરિકા જવા માગે છે અને જો કાયદેસર રીતે ના જવાય તો ડંકી રુટનો માર્ગ અપનાવે છે. મળેલી માહિતી મુજબ સાબરકાંઠા જિલ્લાના પ્રાંતીજ પાસેના મોયદ ગામમાં રહેતો દિલીપ નામનો યુવક કોઇપણ ભોગે અમેરિકા જવા માગતો હતો તેણે એજન્ટનો સંપર્ક કરતાં અમેરિકાના વિઝા સહિતની પ્રક્રિયામાં લાંબો સમય લાગશે તેવી તેને જાણ થઇ હતી જેથી લાંબો સમય રાહ જોવાની ધીરજ ના હોવાથી તેને એજન્ટે વિઝા સહિતની પ્રક્રિયાઓથી બચવું હોય તો ડંકી રુટના માર્ગે પણ અમેરિકા જઇ શકાય છે તેમ જણાવ્યું હતું જેથી યુવકને કોઇ પણ ભોગે અમેરિકા જવું હોવાથી તેણે હા પાડી હતી.

ત્યાર બાદ યુવક અને તેની પત્ની તથા પુત્રને લઇને ગેરકાયદેસર રીતે અમેરિકા જવા માટે ડંકી રુટથી મુસાફરી શરુ કરી હતી. તે સતત દોઢ મહિનાથી ડંકી રુટના દ્વારા અલગ અલગ સ્થળોએથી પસાર થઇ રહ્યો હતો. 

જો કે જાણવા મળ્યા મુજબ દિલીપ ડાયાબીટીસનો પેશન્ટ હતો અને તેની પાસે દોઢ મહિનાની મુસાફરી દરમિયાન ડાયાબિટીસીની દવા પણ ખલાસ થઇ ગઇ હતી જેથી તે બેભાન થઇ ગયો હતો અને કોમામાં સરી પડ્યો હતો. રસ્તામાં નિકારાગુઆમાં તેને હોસ્પિટલમાં સારવાર માટે ખસેડાયો હતો જ્યાં સારવારમાં તેનું મોત થયું છે. રસ્તામાં જ દિલીપનું મોત થતાં તેની પત્ની અને પુત્ર નોંધારા બની ગયા છે. બીજી તરફ તેના પરિવારજન એવું જણાવી રહ્યા છે કે આ યુવક ફરવા જઇએ છે તેમ કહીને ઘેરથી નિકળ્યો હતો.