કતારમાં અંધકારભરી કોટડીમાં 3 મહિનાથી બંધક વડોદરાનો યુવાન

વડોદરાનો યુવાન કતારના દોહામાં છેલ્લા 3 મહિનાથી ફસાયો છે. તેના માતા પિતાએ આરોપ લગાવ્યો છે કે તેને નાની કોટડીમાં ગોંધી રખાયો છે. તેને કેમ કેદ કરી લેવાયો છે તેની કોઇ માહિતી પણ તેમને આપવામાં આવી નથી. આ મામલે એમ્બ્સેસીમાં અને કંપનીમાં પણ જાણ કરાઇ છે પણ તેમને કોઇ મદદ કરતું નથી.

કતારના દોહામાં ટેક મહિન્દ્રા નામની આઈટી કંપનીમાં કન્ટ્રી હેડ તરીકે ફરજ બજાવતા વડોદરાના અમિત ગુપ્તાને કેદ કરીને બંધક બનાવી દેવાયા છે. અમિતના માતા પિતા અને પત્ની તરસાલીની મધુવન સોસાયટીમાં રહે છે. તેમણે આરોપ લગાવતા કહ્યું છે કે કતારની સ્ટેટ સિક્યોરિટી દ્વારા અમિત ગુપ્તાને છેલ્લા ત્રણ મહિનાથી ખોટી રીતે કેદમાં રાખ્યો છે. અમિત ગુપ્તાને કેમ બંધક બનાવીને રખાયા છે તેની કોઇ જાણકારી પણ તેમના પરિવારને અપાઇ નથી

અમિત ગુપ્તાના માતા પિતાએ આરોપ લગાવ્યો હતો કે તેમના પુત્રને નાનકડી અંધકારભરી કોટડીમાં કેદ કરી દેવાયો છે અને તેને બહાર પણ નીકળવા દેવાતો નથી. તેમણે કહ્યું કે અમિત ગુપ્તા સામે પોલીસ કેસ દાખલ કર્યા સિવાય કેદમાં રાખ્યો છે અને તેમણે એમ્બેસીમાં વારંવાર રજૂઆતો કર્યા બાદ માત્ર એક જ વાર તેમના પુત્રને મળવા દેવાયા હતા પણ કેમ બંધક બનાવાયો છે તેની કોઇ જાણકારી અપાતી નથી.

આ મામલે અમિત ગુપ્તાના પત્નીએ PMO માં મદદ પણ માંગી છતાં હજી સુધી કોઈ મદદ મળી નથી. અમિતના માતા પિતાએ પોતાનો પુત્ર હેમખેમ પાછો ભારત ફરે તેવી સરકાર પાસે માંગ કરી  છે. અમિત ગુપ્તા 2013 થી અમિત ગુપ્તા કતારના દોહામાં નોકરી કરે છે અને તેમના પર આઈટી કંપનીના ડેટા ચોરી કરવાનો આરોપ લગાવી ખોટી રીતે કેદ કર્યો છે. અમિતના બે બાળકો અને પત્ની પણ ખૂબ ચિંતિત છે. અમિતના પિતાએ આનંદ મહિન્દ્રાને ઈ-મેઈલ તેમજ પત્ર કુરિયરથી મોકલી મદદ માંગી છે.

આજે આ મામલે અમિત ગુપ્તાના પિતાએ વડોદરાના સાંસદ સમક્ષ પણ પોતાના પુત્રને મુક્ત કરાવવા મદદ માગી હતી. હેમાંગ જોશીએ મીડિયાને કહ્યું હતું કે તેમણે મને જણાવ્યું છે કે તેમના પુત્રને કસ્ટડીમાં લીધા ત્યારે તેમને જાણ કે કારણ અપાયું નથી અને સંપર્ક પણ કરવા દેતા નથી. અહીના એમ્બ્સેસી દ્વારા અને વિદેશ મંત્રાલય સાથે વાત કરવામાં આવશે તથા કતાર એમ્બ્સેસીને પણ વાત કરીશું.