દાંતા તાલુકાના પાન્છા ગામની શિક્ષિકા ચાલુ ફરજે વિદેશ સ્થાયી થયા

ગુજરાતમાં શિક્ષણ વિભાગની બેદરકારીનો ચોંકાવનારો કિસ્સો પ્રકાશમાં આવ્યો છે. બનાસકાંઠા જિલ્લાના દાંતા તાલુકાના પાન્છા ગામની પ્રાથમિક શાળામાં ફરજ બજાવતી શિક્ષિકા વર્ષોથી વિદેશમાં સ્થાયી થઈ ગયા હોવા છતાં નોકરીમાં ચાલુ રખાયા છે. ઈન્ચાર્જ આચાર્યએ રજૂઆત કરવા છતાં કોઈપણ પ્રકારની કાર્યવાહી નહી કરાતા શિક્ષણ વિભાગની કામગીરી સામે સવાલ ઉઠી રહ્યા છે. પાન્છા પ્રાથમિક શાળામાં ભાવનાબેન પટેલ 1998 થી ઉચ્ચ શિક્ષિકા તરીકે ફરજ બજાવે છે. તેઓ ગેરકાયદે રજા ઉપર ઉતરીને વિદેશમાં સ્થાયી થઈ જતાં બાળકોના શિક્ષણ ઉપર અસર થઈ છે. ઈન્ચાર્જ આચાર્યા પારૂલબેન મહેતાએ જિલ્લા પ્રાથમિક શિક્ષણાધિકારી, શિક્ષણ વિભાગ અને શિક્ષણ મંત્રીને લેખિતમાં રજૂઆત કરી છે. શાળાની મુલાકાતે આવેલા તાલુકા પ્રાથમિક શિક્ષણાધિકારીને રૂબરૂ રજૂઆત કરી હતી. તાલુકા પ્રાથમિક શિક્ષણાધિકારીને રજૂઆત કર્યાને 5 મહિના જેટલો સમય થવા છતાં કાર્યવાહી કરવામાં આવી નથી. વિદેશમાં સ્થાયી થઈને બાળકોના ભવિષ્ય સાથે ચેડાં થઈ રહ્યા છે. શિક્ષિકા ભાવના પટેલનો વિવાદ બહાર આવતાં જિલ્લા પ્રાથમિક શિક્ષણાધિકારીએ તપાસના આદેશ આપ્યા હતા. તપાસ દરમિયાન બહાર આવ્યુ છે કે ભાવનાબેન પટેલ છેલ્લાં 8 મહિનાથી શાળામાં આવતા નથી. તેમની ગેરહાજરી દરમિયાન પગાર ચુકવવામાં આવ્યો નથી. શિક્ષિકાને નોટિસ પાઠવીને ખુલાસો માગવામાં આવ્યો છે. શિક્ષણ વિભાગના ઠરાવ મુજબ એક વર્ષથી વધારે સમય ગેરહાજર રહે તો શિક્ષક સામે કાર્યવાહી કરવામાં આવે છે. એક વર્ષથી વધુ સમય ગેરહાજર રહેશે તો શિક્ષિકાને ટર્મિનેટ કરવામાં આવશે.