જાફરાબાદમાં રમતા બાળકને સિંહણ ઉઠાવી ગઈ, બાળકના મળ્ચા માત્ર અવશેષો

અમરેલી જિલ્લામાં અવાર-નવાર સિંહ અને સિંહણ રહેણાક વિસ્તારમાં આવી ચડતાં હોય છે. ત્યારે જાફરાબાદના જીકાદ્રી ગામમાં બે બાળકો શેરીમાં રમી રહ્યાં હતા ત્યારે એક સિંહણ આવી હતી અને બાળકને ઉઠાવીને જતી રહી હતી. બનાવની જાણ થતાં વન વિભાગ દ્વારા શોધખોળ હાથ ધરાતા 5 વર્ષીય બાળકના માત્ર અવશેષો મળી આવ્યા હતા. વન વિભાગે સિંહણને પકડવા તજવીજ હાથ ધરી છે.   બનાવની પ્રાપ્ત વિગત અનુસાર, જાફરાબાદના જીકાદ્રી ગામમાં બે બાળકો રમી રહ્યાં હતા એ સમયે અચાનક એક સિંહણ આવી હતી અને બાળકો પર હુમલો કર્યો હતો. હુમલો કરીને સિંહણ 5 વર્ષીય બાળકને ઉઠાવી ગઈ હતી. સિંહણ બાળકને ઉઠાવી ગઈ હોવાની જાણ થતાં બાળકના પરિવારજનો અને સ્થાનિકો દ્વારા બાળકની શોધખોળ હાથ ધરવામાં આવી હતી અને વન વિભાગને બનાવ અંગે જાણ કરી હતી.   સિંહણ બાળકને ઉઠાવી ગઈ હોવાની જાણ થતાં વન વિભાગની ટીમ જીકાદ્રી ગામ પહોંચી હતી અને સિંહણ તથા બાળકની શોધખોળ આદરી હતી. જે દરમિયાન 5 વર્ષીય આરૂશના અવશેષો મળી આવ્યા હતા. બાળકના અવશેષો જોઈ પરિવાર શોકમાં ગરકાવ થઈ ગયો હતો. હુમલાખોર સિંહણ આસપાસ હોવાનું વન વિભાગ દ્વારા અનુમાન લગાવવામાં આવ્યું છે અને સિંહણને પાંજરે પૂરવાની કાર્યાવાહી હાથ ધરવામાં આવી છે.