વડોદરામાં બનેલા બનાવથી ભારે અરેરાટી, શું હવે માતા-પિતાના પણ હાથ બંધાઇ ગયા ?

વડોદરા શહેરમાં રહેતા એક 13 વર્ષના બાળકે આત્મહત્યા કરી લેતા અરેરાટી વ્યાપી ગઇ છે. 13 વર્ષના બાળકને એવું તો શું થયું કે તેને આત્મહત્યા કરવી પડી તે સમજની બહાર છે. પ્રાથમિક તપાસમાં એવું કારણ બહાર આવ્યું કે અભ્યાસ કરવા માટે માતાએ ઠપકો આપતા આ બાળકે મોતને ગળે લગાવ્યું હતું ત્યારે એ સવાલ થઇ રહ્યો છે કે જે સંતાનને માતા પિતા પોતાની તમામ મજબૂરીઓને અવગણીને સારો અભ્યાસ કરવા પ્રેરતા હોય અને કદાચ જો સંતાન યોગ્ય રીતે અભ્યાસ ના કરતું હોય અને ઠપકો પણ આપે તો બાળકને માતા પિતાનો આ ઠપકો પણ સહન ના થઇ શકે ? આ બનાવે  અનેક પ્રશ્નો ઉભા કર્યા છે. શું માતા પિતા પોતાના સંતાનને ઠપકો પણ ના આપી શકે તે પ્રશ્ન પણ અહીં ઉભો થયો છે. 

વડોદરામાં 13 વર્ષના વિદ્યાર્થીએ ગળેફાંસો ખાઈ આપઘાત કરતાં ચકચાર મચી ગઇ છે. મળેલી માહિતી મુજબ વેલી ખાતે શ્રવણ એન્કલેવમા રહેતા અને બ્રાઇટ ડે સ્કુલમાં CBSCમાં ધોરણ -7 માં અભ્યાસ કરતાં વિદ્યાર્થીએ  આપઘાત કર્યો છે. નિમીશ નામના 13 વર્ષના બાળકે ગળે ફાંસો ખાઇ આપઘાત કરતા અરેરાટી વ્યાપી ગઇ છે. 

બાળકના આપઘાતમાં એવી ચોંકાવનારી માહિતી મળી છે કે હાલ પરીક્ષા ચાલી રહેલી હોવાથી તેની માતાએ અભ્યાસ કરવા બાબતે તેને ઠપકો આપ્યો હતો. ઠપકો આપ્યા બાદ બાળકને લાગી આવતા તેણે આ અંતિમ પગલું ભર્યું હતું. ઘટનાની જાણ થતાં મંજુસર પોલીસે આ મામલે તપાસ શરુ કરી છે. 

મંજુસર પોલીસ મથકમાં નોંધાયેલી ફરિયાદ મુજબ વેમાલીમાં એમ. એસ. હોસ્ટેલ પાસે B-302, શ્રવણ એન્કલેવમા અરુણભાઇ વસંતરાવ ગુંડેકર પત્ની અને બે બાળકો સાથે રહે છે અને મંજુસર જીઆઇડીસીમા NBC કંપનીમાં ઉચ્ચ હોદ્દા ઉપર ફરજ બજાવે છે. તેમના બે સંતાનો પૈકી મોટા 13 વર્ષના પુત્ર નિમીશે મંગળવારે બપોરના સમયે પોતાના બેડરૂમમાં બારી સાથે બેલ્ટ બાંધી ફાંસો ખાઇ લીધો હતો. પુત્ર નિમીશની પરીક્ષા ચાલી રહી હતી. અંગ્રેજીનું પેપર હતું. આથી પત્નીએ અભ્યાસ માટે ઠપકો આપ્યો હતો. નિમીશને માતાએ આપેલો ઠપકો સહન ન થતાં રૂમમાં જઇ ફાંસો ખાઇ આપઘાત કરી લીધો હતો

ઉલ્લેખનિય છે કે તાજેતરમાં વડોદરા શહેર જિલ્લામાં આપઘાતના બે બનાવો સામે આવ્યા છે. જેમાં ચોંકાવનારી વાત એ છે કે, બંને બનાવોમાં યુવા છે અને તે અભ્યાસ કરતા હતા. જેમાં એક વિધાર્થી ધોરણ-12 સાયન્સમાં અભ્યાસ કરતો હતો અને અન્ય વિધાર્થી એમ.એસ. યુનિવર્સિટીની પોલિટેકનિક કોલેજમાં અભ્યાસ કરતો હતો. બંને વિધાર્થીઓએ પોતાના ઘરે અગમ્ય કારણોસર આપધાત કરી લેતા ચકચાર મચી જવા પામી છે.