9 વર્ષની માસૂમનું ઝેરી દવા પી લેતાં મોત

મોરબીમાં વાડીએ રહેતા અને મજૂરીકામ કરતાં પરિવારની નવ વર્ષની દીકરીએ જીરામાં છાંટવાની દવાવાળા ગ્લાસમાં પાણી પી લેતાં તેને સારવાર માટે મોરબીની સરકારી હોસ્પિટલ ખાતે લઈને આવ્યા હતા. ત્યાં સારવાર દરમિયાન તેનું મોત નીપજ્યું હતું. 9 વર્ષની માસૂમના મોતથી પરિવારમાં આક્રંદનો માહોલ છવાયો છે.

 મળતી માહિતી મુજબ, મોરબી તાલુકાના વાઘપર અને સોખડા ગામની સીમમાં મહેન્દ્રભાઈ જીવાભાઇની વાડીએ રહેતા અને મજૂરીકામ કરતા સવાભાઈ પરમારની નવ વર્ષની દીકરી સેજલ અન્ય બાળકો સાથે વાડીએ રમી રહી હતી. ઘરે કોઇ ન હતું, ત્યારે બાળકીએ ભૂલથી જીરામાં છાંટવાની ઝેરી દવાવાળા ગ્લાસમાં પાણી પી લેતાં તેને અચાનક ઉલટીઓ થવા લાગી હતી.

 જેથી પરિવારને જાણ થતાં તેને તાત્કાલિક સારવાર માટે મોરબી શહેરમાં આવેલી સરકારી હોસ્પિટલ ખાતે લઈને આવ્યા હતા.

 ત્યાં સારવાર દરમિયાન તે બાળકીનું મોત નીપજ્યું હતું. જેથી કરીને આ બનાવની હોસ્પિટલ મારફતે મોરબી તાલુકા પોલીસને જાણ કરવામાં આવતાં પોલીસે બનાવની નોંધ કરી આગળની કાર્યવાહી હાથ ધરી છે. આ બનાવની પ્રાથમિક તપાસ એ.પી.જાડેજા દ્વારા કરવામાં આવી હતી.