શહેરમાં નાના-મોટા મળી 40 અકસ્માત સર્જાયા

નવરાત્રિના 9 દિવસ દરમિયાન શહેરમાં નાના-મોટા મળી 40 અકસ્માત સર્જાયા હતા. જેમાં 4 વર્ષની બાળકી સહિત 9 લોકોના મૃત્યુ થયા હતા. અકસ્માતમાં 5 લોકોના મૃત્યુ તો એવા હતા જેમાં ચાલતા પસાર થતાં અને કારની ટક્કર વાગી હતી. જેમાં 9 દિવસમાં નોંધાયેલા કુલ અકસ્માતમાંથી 35 ટકા સાંજે 7થી સવારે 7માં થયા હતા.એસપી રિંગ રોડ, એસજી હાઈવે સહિતના વિસ્તારોમાં એક્સિડન્ટમાં 36ને ઈજા થઈ હતી

પોલીસ ચોપડે નોંધાયા મુજબ અકસ્માતોમાં 4 વર્ષની બાળકી ઉપરાંત 3 આધેડ, એક મહિલા અને 4 યુવક મૃત્યુ પામ્યા હતા. શહેરભરમાં ફૂટપાથ પર દબાણ અને તૂટી ફૂટેલી ફૂટપાથોને કારણે લોકોને ચાલવા માટે પણ પૂરતી જગ્યા મળતી હોતી નથી. અકસ્માતોમાં રાહદારીના મોત સૌથી આઘાતજનક ઘટના છે. કારચાલકો બેફામ વાહન હંકારી અકસ્માતો કર્યા પછી ભાગી છૂટતા હોય છે.

દબાણોને કારણે લોકો ફૂટપાથનો ઉપયોગ ન કરી શકતા જોખમ વધ્યું.

શહેરમાં ઘણી જગ્યાએ ફૂટપાથ નથી અને જ્યાં છે ત્યાં દબાણો, પાર્કિંગને કારણે રાહદારી ફૂટપાથનો ઉપયોગ કરી શકતા નથી. છેવટે રસ્તાની સાઈડમાં ચાલવું પડતા અકસ્માતનું જોખમ રહે છે. તો બ્રિજના બંને છેડે અને જંક્શનોની આસપાસ રાહદારી સલામત રીતે રસ્તાનો ઉપયોગ કરી શકે તેવી વ્યવસ્થા નથી. સામાન્ય દિવસો કરતા નવરાત્રિમાં રાત્રે વધુ ટ્રાફિક રહે છે ચારેક મહિના પહેલાં મ્યુનિ કમિશનરે અધિકારીઓને પૂછ્યું હતું કે, તમારા વિસ્તારમાં એવી એક પણ સારી ફૂટપાથ હોય તો બતાવો જેનો રાહદારી સલામત રીતે ઉપયોગ કરી શકે. આ વખતે એક પણ અધિકારી કમિશનરને જવાબ આપી શક્યો ન હતો.