હવે લગ્ન નોંધણી કૌંભાડ, બગસરાના 4 ગામો કોરોનામાં લગ્ન નોંધણી માટે બન્યા હોટ ફેવરિટ

 કોરોનાના ત્રણ વર્ષના ગાળામાં આખા ગુજરાતના લોકોએ અમરેલીના બગસરા તાલુકાના ચાર ગામમાં લગ્નની નોંધણીઁ કરાવી હોવાનો મામલો બહાર આવતા ખળભળાટ મચી ગયો છે. ઇમિટેશન માટે જાણીતું બગસરા હવે લગ્ન નોંધણી માટે કુખ્યાત થઇ ગયું છે. લગ્ન નોંધણીના કથિત કૌંભાડમાં હજું સુધી તાલુકા કક્ષાએથી કોઇ પગલાં નહીં લેવાતા ગાંધીનગર સુધી ફરિયાદ થઇ છે.

કોરોનાના ત્રણ વર્ષના ગાળામાં સરકારે અનેક પ્રતિબંધો લાદ્યા હતા જેમાં લોકોનો મેળાવડો યોજવો તથા સભા યોજવી કે પછી જાહેરમાં જનમેદની ભેગી કરવા પર પ્રતિબંધ મુકાયો હતો ત્યારે અમરેલીના બગસરા તાલુકાના 4 ગામોમાં 2950 જેટલા લગ્ન રજિસ્ટર થયા હતા. આ ચારેય ગામમાં જેટલા પરિવારો રહે છે તેના કરતા વધુ લગ્નની નોંધણી આ ગામોમાં થતાં કંઇક રંધાયુ હોવાની શંકા સેવાઇ રહી છે. નવાઇની વાત એ છે કે ગુજરાતના 33 જિલ્લાના લોકોએ આ ગામોમાં લગ્નની નોંધણી કરાવી હતી.

એક અખબારમાં પ્રસિદ્ધ થયેલા અહેવાલમાં જણાવાયું છે કે આરટીઆઇ એક્ટ હેઠળ સ્થાનિક વ્યક્તિએ જે માહિતી મેળવી હતી તે મુજબ આ ત્રણ વર્ષમાં સૌથી વધુ બગસરાના હામાપર ગામમાં 1341 લોકો તથા જામકામાં 944 લોકોએ, મુંજીયાસર ગામમાં 380 અને લુંધીયા ગામમાં 285 લગ્નની નોંધણી થઇ હતી. આ ચારેય ગામમાં કૂલ 1613 પરિવારો રહે છે અને કૂલ વસતી 8233 જેટલી છે. આરટીઆઇ કરનારા વ્યક્તિએ એવી પણ માહિતી માગી હતી કે આ ગાળામાં કોઇ સમુહ લગ્નનું આયોજન કરાયું હતું કે કેમ તેનો જવાબ એવો અપાયો હતો કે આ ગાળામાં સમુહલગ્નો થયા નથી. આ ગામોમાં લગ્ન માટેની કોઇ જ સુવિધા જ નથી.

આટલા મોટા પ્રમાણમાં લગ્નની નોંધણી થતાં કંઇકરંધાયું હોવાની શંકા સેવાઇ રહી છે. ગામના તલાટીએ કંઇક ખટુ કર્યું છે કે પછી અન્ય કોઇ કારણ છે તેની તપાસ થવ જરુરી છે. લોકોએ તલાટી સાથે ગોઠવણ કરી મેરેજ રજિસ્ટર કરાવ્યા છે કે કેમ તેની પણ તપાસ થવી જરુરી છે. તલાટી સરળતાથી લગ્ન નોંધણી કરાવી આપતા હોવાની શક્યતાથી અહીં સૌથી વધુ લગ્નોની નોંધણી થયેલી હોવાનું આ ગામોમાં ચર્ચાઇ રહ્યું છે. સૌથી મોટો સવાલ એ છે કે કોરોનાના ગાળામાં આખા ગુજરાતમાંથી સૌથી વધુ લોકો આ ગામોમાં કેવી રીતે પહોંચ્યા હતા. અરજી કરનારી વ્યક્તિને શંકા છે કે ગામોના તલાટીઓ દ્વારા સુનિયોજીત રીતે આ કૌંભાડ આચર્યું હોઇ શકે છે. આ મામલે તાલુકા સ્તરે કોઇ પગલાં હજું લેવાયા નથી જેથી ફરિયાદ છેક ગાંધીનગર સુધી પહોંચી છે.