ભાજપ શાસિત ગુજરાત પૂર્વ પીએમ મનમોહનસિંહે કરેલી વાતના રસ્તે

‘કુપોષણ મુક્ત ગુજરાત’ અભિયાનનો ફિયાસ્કો થયો છે. રાજ્યમાં હજુ પણ 5.40 લાખ બાળકો કુપોષિત હોવાનું રાજ્ય સરકારે વિધાનસભામાં સ્વીકાર્યુ છે. કુપોષણ નાબૂદી પાછળ છેલ્લાં બે વર્ષમાં રૂપિયા 590 કરોડનો ખર્ચ કરવા છતાં આદિવાસી પછાત જિલ્લાઓમાં કુપોષિત બાળકોની સંખ્યા ઘટવાના બદલે વધી રહી છે.

ઉલ્લેખનીય છે કે, પૂર્વ વડાપ્રધાન ડૉ.મનમોહન સિંહે કહ્યું હતું કે દેશમાં કુપોષણ એક રાષ્ટ્રીય શરમ છે. તે સમયે વિરોધપક્ષમાં રહેલી ભાજપ સરકારે કેન્દ્રની કોંગ્રેસ સરકારની ટીકા કરી હતી. છેલ્લાં 30 વર્ષથી ગુજરાતમાં સત્તા સંભાળી રહેલી ભાજપ સરકારના કાર્યકાળમાં કુપોષણની સમસ્યા યથાવત રહી છે.

સાબરકાંઠા, પંચમહાલ, બનાસકાંઠા જેવા જિલ્લાઓમાં કુપોષિત બાળકોની સંખ્યા એક લાખ આસપાસ પહોચી ગઈ છે. હાલમાં ચાલી રહેલા વિધાનસભા સત્ર દરમિયાન રાજ્ય સરકારે જણાવ્યું છે કે, કુપોષણ નાબૂદી પાછળ છેલ્લાં બે વર્ષમાં રૂપિયા 509 કરોડનો ખર્ચ કરવામાં આવ્યો છે. તેમ છતાં રાજ્યમાં હજારો કુટુંબોને પૂરતો આહાર મળતો નથી. સગર્ભા માતાઓ પોષણયુક્ત આહારથી વંચિત રહી છે.

સગર્ભાઓને પોષણયુક્ત આહાર આપીને સરકાર દર વર્ષે લાખો કરોડો રૂપિયા ખર્ચ કરી રહી છે તેમ છતાં આદિવાસી-પછાત જિલ્લાઓમાં કુપોષિત બાળકોની સંખ્યા વધુ છે. સરકારે દાવો કર્યો છે કે કુપોષિત બાળકોની સંખ્યામાં દોઢ લાખનો ઘટાડો થયો છે.

રાજ્યના ત્રણ જિલ્લામાં કુપોષિત બાળકોની સંખ્યા 99,403 ઉપર પહોંચી ગઈ છે. બનાસકાંઠામાં 42,419, પંચમહાલમાં 35,242, સાબરકાંઠામાં 21,742 કુપોષિત બાળકો છે. આ ઉપરાંત 9 જિલ્લામાં કુપોષિત બાળકોની સંખ્યા 94,149 છે. પાટણમાં 12,742, અરવલ્લીમાં 11,683, નર્મદામાં 11,994, 16,845, વડોદરામાં 14,293 તેમજ ડાંગમાં 5,100, નવસારીમાં 7,150, ગીર-સોમનાથમાં 7,141 અને તાપીમાં 7,201 કુપોષિત બાળકો છે.

સરકારે સ્વીકાર્યુ છે કે, જાન્યુઆરી-2025 સુધી ગુજરાતમાં 5,40,303 બાળકો કુપોષિત છે. કુપોષણ નાબુદી માટે વર્ષ 2023-24માં રૂપિયા 264 કરોડ અને વર્ષ 2024-25માં રૂપિયા 245 કરોડનો ખર્ચ કર્યો છે. જાન્યુઆરી-2023માં 6,91,144 બાળકો કુપોષિત હતા તે જાન્યુઆરી-2024માં ઘટીને 5,40,303 બાળકો કુપોષિત રહ્યા છે. એટલે કે 1,511,41 બાળકોનો કુપોષણમાંથી બહાર નીકળ્યા છે.