"ગોધરા ટ્રેન દુર્ઘટનામાં 9 GRP કર્મચારીઓની બરતરફી યોગ્ય”-ગુજરાત હાઈકોર્ટ

વર્ષ 2002ની ગોધરા ટ્રેન આગ દુર્ઘટનામાં ફરજમાં બેદરકારી બદલ 9 GRP કર્મચારીઓની બરતરફીને ગુજરાત હાઈકોર્ટે યોગ્ય ઠેરવી છે. કર્મચારીઓએ જાણી જોઈને ફરજ ટાળી હતી અને ખોટી એન્ટ્રીઓ કરી હતી. જો તેઓ ફરજ પર હોત તો દુર્ઘટના ટાળી શકાઈ હોત તેવું હાઈકોર્ટે અવલોકન કર્યુ છે. હાઈકોર્ટે કહ્યું હતું કે તે ઘોર બેદરકારી હતી. જો કે, ગુનાહિત કાવતરું રચવાના આરોપને ફગાવી દીધો હતો.

ગુજરાત હાઈકોર્ટે વર્ષ 2002માં ગોધરા ટ્રેન આગની ઘટના દરમિયાન ફરજમાં બેદરકારી બદલ 9 રેલવે પોલીસ કર્મચારીઓને બરતરફ કરવાના નિર્ણયને માન્ય રાખ્યો છે. ન્યાયાધીશ વૈભવી નાણાવટીની સિંગલ બેન્ચે ચુકાદામાં કહ્યું કે આ પોલીસકર્મીઓ સાબરમતી એક્સપ્રેસમાં ફરજ પર હાજર હોત તો કદાચ આ દુર્ઘટના ટાળી શકાઈ હોત.

ચુકાદો આપતી વખતે ન્યાયાધીશ વૈભવી ડી નાણાવટીની સિંગલ બેન્ચે જણાવ્યું હતું કે અરજદાર પોલીસકર્મીઓએ ફરજ ટાળવા માટે રજિસ્ટરમાં ખોટી એન્ટ્રીઓ કરી હતી અને શાંતિ એક્સપ્રેસ દ્વારા અમદાવાદ પરત ફર્યા હતા. કોર્ટે ટિપ્પણી કરી કે, જો આ કોન્સ્ટેબલો સાબરમતી એક્સપ્રેસ સાથે ગોધરા પહોંચ્યા હોત તો આ ઘટના ટાળી શકાઈ હોત. કોર્ટે સ્વીકાર્યું કે આરોપી કોન્સ્ટેબલોએ ફરજ પ્રત્યે ઘોર બેદરકારી દાખવી હતી. કોર્ટે એ પણ સ્પષ્ટ કર્યું કે તેમની સામે કોઈ ગુનાહિત કાવતરામાં સામેલ હોવાનો કોઈ આરોપ નથી.

ગોધરા ટ્રેન દુર્ઘટનામાં 59 મુસાફરોના મોત થયા હતા

27 ફેબ્રુઆરી, 2002ના રોજ ગોધરા રેલવે સ્ટેશન નજીક સાબરમતી એક્સપ્રેસના એસ-6 કોચને આગ લગાવવામાં આવી હતી. જેમાં 59 પેસેન્જરોના મોત થયા હતા. મૃતકોમાં મોટાભાગના અયોધ્યાથી પરત ફરી રહેલા કારસેવકો હતા. આ દિવસે ટ્રેનની સુરક્ષા ફરજ માટે 9 જીઆરપી કર્મચારીઓ દાહોદથી અમદાવાદ સાબરમતી એક્સપ્રેસમાં મુસાફરી કરવાના હતા. પરંતુ ટ્રેનના "અનિશ્ચિત વિલંબ" વિશે માહિતી મળ્યા પછી તેઓ બીજી ટ્રેન ‘શાંતિ એક્સપ્રેસ’ દ્વારા પરત ફર્યા હતા.

આ કર્મચારીઓ ઉપર દાહોદ રેલવે સ્ટેશન પોસ્ટ ઉપર ખોટી એન્ટ્રી કરવાનો આરોપ હતો કે તેઓ સાબરમતી એક્સપ્રેસમાં ચઢ્યા છે. કોર્ટે તેને ગંભીર બેદરકારી ગણાવીને કહ્યું કે તેનાથી કંટ્રોલ રૂમને ખોટી માહિતી મળી કે ટ્રેન સુરક્ષિત છે. તપાસ બાદ સરકારે વર્ષ 2005માં 9 કર્મચારીઓને સસ્પેન્ડ અને બરતરફ કરવામાં આવ્યા હતા. સરકારના આ નિર્ણય સામે કર્મચારીઓએ હાઇકોર્ટમાં અરજી દાખલ કરીને નોકરી ઉપર ફરીથી લેવાની માગ કરી હતી.

ગુજરાત હાઈકોર્ટે શું અવલોકન કર્યુ?

ગુજરાત હાઈકોર્ટમાં સુનાવણી દરમિયાન અરજદારોના વકીલે દલીલ કરી હતી કે ટ્રેન મોડી પડવાના કિસ્સામાં વૈકલ્પિક ટ્રેનમાં મુસાફરી કરવી સામાન્ય વહીવટી પગલું છે. પરંતુ હાઈકોર્ટે તે કારણને સ્વીકારવા ઇન્કાર કર્યો હતો. કોર્ટે પોતાના આદેશમાં જણાવ્યું હતું કે, અરજદારોને અત્યંત સંવેદનશીલ ટ્રેનમાં સુરક્ષા ફરજ સોંપવામાં આવી હતી. જેમાં તેમણે ઘોર બેદરકારી દાખવી હતી. કોર્ટે એમ પણ કહ્યું છે કે, સાબરમતી એક્સપ્રેસ 'એ' શ્રેણીની ટ્રેન હતી. જેમાં વારંવાર ઘટનાઓ બનતી હતી. તેથી ટ્રેનમાં સશસ્ત્ર સુરક્ષા કર્મચારીઓની હાજરી ફરજિયાત હતી.

જસ્ટિસ નાણાવટીએ કહ્યું કે, હાઈકોર્ટને બંધારણની કલમ 226 હેઠળ દખલગીરીની કોઈ જરૂર નથી લાગતી. અરજદારો દ્વારા ફરજમાં બેદરકારીની કબૂલાત તેમની સામેનો કેસ સાબિત કરે છે. હાઈકોર્ટે તમામ અરજીઓ ફગાવીને સરકારના બરતરફીના આદેશને યોગ્ય ઠેરવ્યો હતો.