મહેસાણા-શામળાજી NH-168G ઉપર ઈડર-બડોલી બાયપાસ માટે 705 કરોડ મંજૂર

સુરેશ વણોલ, અમદાવાદ

મહેસાણા-શામળાજી નેશનલ હાઈવે નંબર 168G ઉપર ઈડર-બડોલી બાયપાસ માટે કેન્દ્ર સરકારે રૂપિયા 705.09 કરોડ મંજૂર કર્યા છે. કેન્દ્રીય મંત્રી નીતિન ગડકરીએ ટ્વિટ કરીને જાણકારી આપી હતી. 14 કિલોમીટપ ઈડર-બડોલી બાયપાસ રોડને પાકા શોલ્ડર, ફ્લેક્સિબલ પેવમેન્ટ, ગ્રેડ-સેપર્ડ સ્ટ્રક્ચર્સ અને રક્ષણાત્મક કાર્યો સાથે 4-લેન કન્ફિગરેશનમાં અપગ્રેડ કરવામાં આવશે. નેશનલ હાઈવેનો બાયપાસ બનવાથી 10 ગામના 300 ખેડૂતોને તેની અસર થાય તેમ હોવાથી વિરોધ કરાયો હતો. 

સાબરકાંઠા જિલ્લામાં NH-168G પર ઇડર-બડોલી બાયપાસ (14.2 કિમી) ની પાકા શોલ્ડર સાથે 4-લેન રોડના નિર્માણ માટે 705.09 કરોડની મંજૂરીની કેન્દ્રીય નીતિન ગડકરીએ જાહેરાત કરી છે. સોશિયલ મીડિયા એક્સ પર ટ્વિટ કરીને તેની જાણકારી આપી હતી. તેમણે જણાવ્યું કે, આ રસ્તાને પાકા શોલ્ડર, ફ્લેક્સિબલ પેવમેન્ટ, ગ્રેડ-સેપર્ડ સ્ટ્રક્ચર્સ અને રક્ષણાત્મક કાર્યો સાથે 4-લેન કન્ફિગરેશનમાં અપગ્રેડ કરવામાં આવશે. 

NH-168G મહેસાણા નજીક NH-68 પાસેથી નીકળે છે. વિસનગર, વડનગર, ખેરાલુ, ઇડર, બડોલી અને ભિલોડામાંથી પસાર થઈ શામળાજી નજીક NH-48ને મળશે. આ ઉપરાંત જેસલમેર અને બાડમેર જિલ્લામાં નેશનલ હાઇવે-70 અને નેશનલ હાઇવે-11 (કુલ લંબાઇ 134.86 કિલોમીટર)ના હાલ કનેક્શનને મજબૂત અને પહોળો કરવાની સાથે નેશનલ હાઇવે 11ના મ્યાઝલાર-જેસલમેર અને મુનાબાવ-તનોટના સુંદરા-મ્યાઝલાર-અંબાસિંહની ઢાળી રોડને 2-લેન પાકો અને મજબૂત રોડ બનાવવા માટે રૂપિયા 1237.71 કરોડ મંજૂર કરવામાં આવ્યા છે.  

મહેસાણાથી વાયા વડનગર, ઇડર થઇને શામળાજીને જોડતા 96.40 કિમીના માર્ગને ફોર લેન બનાવવા કેન્દ્ર સરકારે 09-05-22 ના રોજ મહેસાણાથી ઇડર વાયા વડનગર નેશનલ હાઇવે નંબર 68 અને ઇડર શામળાજી નેશનલ હાઇવે નં 48 ને જોડીને નવા નેશનલ હાઇવે નં.168-G નામ અપાયું છે.

આ નેશનલ હાઇવે નં. 168-G ને મણીયોરથી ઇડર શહેરને બાયપાસ કરી બડોલી જંક્શન આગળ શામળાજી હાઇવે સાથે જોડાશે. જેને ઇડર-બડોલી બાયપાસ નામ અપાયું છે. તેની કુલ લંબાઇ 14 કિલોમીટરની રહેશે. મણીયોરથી બડોલી વચ્ચેનો 14 કિમીનો રસ્તો સદાતપુરા, સાપાવાડા, લાલોડા, સવગઢ(લા) શેરપુરના સીમાડામાં થઇ બડોલી પહોંચશે. હાઇવે ફોરલેન બનાવવાનો હોવાથી 45 મીટરની પહોળાઇ રાખવામાં આવશે. જેના માટે 5.85 લાખ ચો.મીટર જમીનની જરૂરિયાત રહેશે. કેન્દ્ર સરકારે ઇડર-બડોલી બાયપાસ પેકેજને મંજૂરી આપી દીધી છે. 

મહેસાણા-શામળાજી નેશનલ હાઇવેના નિર્માણથી 10 ગામના 300 ખેડૂતોને અસર 

કેન્દ્ર સરકારે મહેસાણાથી શામળાજી વાયા ઇડર નેશનલ હાઇવેના નિર્માણની મંજૂરી આપી છે. આ નેશનલ હાઇવે ઇડર તાલુકાના 10 ગામડાની સીમમાંથી નીકળે છે. નેશનલ હાઇવેમાં ખેતીલાયક જમીન સંપાદિત કરવામાં આવનાર છે. 10 ગામના 300 કરતા પણ વધુ ખેડૂતોની જમીન હાઈવેમાં સંપાદિત થઈ રહી છે. જે પૈકી કેટલાક ખેડૂતોની તમામ જમીન સંપાદિત થતાં જમીન વિહોણા બની જવાની દહેશત ઉભી થઈ છે. તેથી ઈડર તાલુકાના મણીઓર, સદાતપુરા, સાપાવાડા, લાલોડા,સવગઢ, છાવણ, બુઢિયા, વાસડોલ અને બડોલી ગામના ખેડૂતોએ વિરોધ કર્યો હતો. ખેડૂતોની રજૂઆતને અવગણીને કેન્દ્ર સરકાર નેશનલ હાઈવે બનાવવાના નિર્ણયમાં મક્કમ રહી છે.