ચોરાયેલી ફિલ્મ બેસ્ટ ફિલ્મ?

અમદાવાદમાં યોજાયેલા 70મા ફિલ્મફેર એવોર્ડ્સે બોલિવૂડમાં ખળભળાટ મચાવી દીધો હતો. 'લાપતા લેડીઝ' ફિલ્મને 12 અન્ય ટ્રોફી સાથે શ્રેષ્ઠ હિન્દી ફિલ્મ 2024નો એવોર્ડ મળ્યો હતો. અભિષેક બચ્ચન અને કાર્તિક આર્યનને શ્રેષ્ઠ અભિનેતા તરીકે પસંદ કરવામાં આવ્યા હતા, જ્યારે આલિયા ભટ્ટને શ્રેષ્ઠ અભિનેત્રી તરીકે પસંદ કરવામાં આવી હતી. પરંતુ ઉજવણીઓ વચ્ચે, 'ધ કેરળ સ્ટોરી' ફિલ્મના દિગ્દર્શક સુદીપ્તો સેને એવોર્ડ્સ પર સવાલ ઉઠાવ્યા હતા અને તેમને 'સિનેમાના નામે તમાશો' ગણાવ્યો હતો.

'લાપતા લેડીઝ'ની જીત પર સુદીપ્તનો ગુસ્સો 

સુદીપ્તોએ સોશિયલ મીડિયા પર એક લાંબી પોસ્ટ લખીને પોતાની નારાજગી વ્યક્ત કરી હતી. તેમણે લખ્યું, 'આ વર્ષે, એક ચોરાયેલી ફિલ્મને શ્રેષ્ઠ ફિલ્મ તરીકે પસંદ કરવામાં આવી હતી. એક ફિલ્મ જે બોક્સ ઓફિસ પર 72 કલાક પણ ટકી ન હતી તેને મોટાભાગના પુરસ્કારો આપવામાં આવ્યા હતા. હવે મને સમજાયું કે, ફિલ્મફેર ધ કેરળ સ્ટોરીને રાષ્ટ્રીય પુરસ્કાર જીતવા સામે આટલો ઉગ્ર વિરોધ કેમ હતો. મને આનંદ છે કે, આ 'wood' સમુદાય ન તો અમને ઓળખે છે અને ન તો અમને આમંત્રણ આપે છે.'

આ પણ વાંચો: જાવેદ અખ્તરની અફઘાન વિદેશ મંત્રીની મુલાકાત પર ટીકા

અમે કોઈની ખુશામત કરતા નથી: સુદીપ્તો

તેમણે વધુમાં ઉમેર્યું, 'અમે આવા ખોટા સ્મિતથી પોતાને દૂર રાખીએ છીએ. સૌથી અગત્યનું, અમે કોઈની ખુશામત કરતા નથી. મને આનંદ છે કે, અમે મુંબઈમાં સિનેમાના નામે અને કાન્સમાં સેલ્ફી લેવાના આ દ્રશ્યથી બચી ગયા. ઓછામાં ઓછું આપણે સિનેમાના નામે ચાલતા ઘૃણાસ્પદ દંભથી બચી ગયા છીએ.' સુદિપ્તોએ કેપ્શનમાં લખ્યું કે, તેમને હવે ભારતીય સિનેમા સંસ્થાઓ, ખાસ કરીને મીડિયા અને ફિલ્મ પત્રકારત્વ માટે વધુ આશા નથી. 'આમાંના મોટાભાગના લોકો ફક્ત સ્ટાર્સના ગ્લેમર અને તેમની સમૃદ્ધ દુનિયાથી આકર્ષાય છે. જેમ ગામડાંઓ અને નાના શહેરોના લોકો અમિતાભ બચ્ચન અથવા શાહરૂખ ખાનના ઘરની બહાર ભીડ કરે છે.'

રાષ્ટ્રીય પુરસ્કાર જીત્યા પછી ફિલ્મફેર પર પ્રશ્ન

સુદિપ્તોને તાજેતરમાં 'ધ કેરળ સ્ટોરી' માટે રાષ્ટ્રીય પુરસ્કારોમાં શ્રેષ્ઠ દિગ્દર્શકનો પુરસ્કાર મળ્યો હતો. આ ફિલ્મે શ્રેષ્ઠ સિનેમેટોગ્રાફીનો એવોર્ડ પણ જીત્યો. મે 2023 માં રિલીઝ થયેલી આ ફિલ્મમાં અદા શર્મા મુખ્ય ભૂમિકામાં હતી. આ ફિલ્મ કેરળની મહિલાઓના એક જૂથની સત્ય ઘટનાઓ પર આધારિત છે જેમને બળજબરીથી ઈસ્લામ ધર્મ અપનાવવામાં આવ્યો હતો અને ISIS માં જોડાવા માટે મજબૂર કરવામાં આવ્યા હતા. બોક્સ ઓફિસ પર સુપરહિટ થયેલી આ ફિલ્મે 240 કરોડથી વધુની કમાણી કરી હતી.

લોકોએ ફિલ્મફેરની વિશ્વસનીયતા પર ઉઠાવ્યો પ્રશ્ન 

સુદિપ્તોની ટિપ્પણીઓએ સોશિયલ મીડિયા પર ચર્ચા જગાવી છે. ઘણા યુઝર્સે તેમનું સમર્થન કર્યું છે, જ્યારે અન્ય લોકોએ ફિલ્મફેરની વિશ્વસનીયતા પર પ્રશ્ન ઉઠાવ્યો છે. એક વપરાશકર્તાએ લખ્યું છે કે, 'રાષ્ટ્રીય પુરસ્કારોની તુલનામાં ફિલ્મફેરનું શું મહત્વ છે?' ઉદ્યોગમાં કેટલાક લોકો આને વ્યક્તિગત અભિપ્રાય તરીકે ફગાવી રહ્યા છે.

ફિલ્મફેરની ચમક પર પ્રશ્નો

ફિલ્મફેર એવોર્ડ્સને બોલિવૂડનો સૌથી પ્રતિષ્ઠિત સમારોહ માનવામાં આવે છે, પરંતુ તેની વિશ્વસનીયતા પર સમયાંતરે પ્રશ્ન ઉઠાવવામાં આવે છે. સુદિપ્તોની ટીકાએ ફરી ચર્ચા જગાવી છે કે, શું આ એવોર્ડ્સ સાચી કલાનું સન્માન કરે છે કે ગ્લેમર અને માર્કેટિંગ પર આધારિત છે. રાષ્ટ્રીય પુરસ્કારોની તુલનામાં, ફિલ્મફેરને 'લોકપ્રિય પસંદગી' માનવામાં આવે છે, પરંતુ સુદિપ્તોએ તેને 'ખુશામતનું બજાર' ગણાવ્યું છે.

આ વિવાદ બોલીવુડમાં 'આઉટસાઈડર' વિરુદ્ધ 'ઈનસાડર' ચર્ચાને ફરી જીવંત કરી રહ્યો છે. સુદીપ્તોએ સ્પષ્ટપણે કહ્યું કે. તે આ તમાશાથી દૂર રહેવાનું પસંદ કરે છે. ફિલ્મફેર તેનો જવાબ આપશે કે નહિ તે જોવાનું બાકી છે.