કંગના રનૌત માનહાનિ કેસમાં ભટિંડા કોર્ટમાં હાજર

હિમાચલ પ્રદેશના મંડીથી BJP સાંસદ અને બોલિવૂડ અભિનેત્રી કંગના રનૌત ખેડૂત આંદોલન દરમિયાન મહિલા ખેડૂત પર કરેલી ટિપ્પણીના માનહાનિ કેસમાં સોમવારે ભટિંડા કોર્ટમાં હાજર થયા હતા. કોર્ટમાં હાજર થયા પછી, તેમણે મીડિયા સાથે વાતચીત કરી અને કહ્યું કે, આખી ઘટના એક ગેરસમજ હતી. તેમણે સ્પષ્ટતા કરી કે, 'હું મારા સપનામાં પણ એવું વિચારી શકતી નથી, જેવું દર્શાવવામાં આવ્યું છે. માતા ભલે હિમાચલની હોય કે પંજાબની તે મારા માટે આદરણીય છે. બધા મને પ્રેમ કરે છે.'

મહિલા ખેડૂત મહેન્દર કૌર પોતે હાજર ન હતા

સાંસદ કંગનાએ વધુમાં કહ્યું કે, 'જો કેસને જોઈએ તો તેનો મારાથી કોઈ લેવાદેવા ન હતો. તે એક મીમ હતું, જેને રી-ટ્વીટ કરવામાં આવ્યુ હતું. મેં માતા મહેન્દરજીના પતિ સાથે પણ આ વિશે વાત કરી હતી. દેશમાં ઘણા આંદોલનો ચાલી રહ્યા હતા, મેં તે વિશે એક સામાન્ય ટ્વીટ કર્યું હતું. જે ગેરસમજ થઈ છે, તેના માટે ખેદ છે.' કોર્ટમાં કંગનાની હાજરી દરમિયાન, પીડિત મહિલા ખેડૂત મહેન્દર કૌર પોતે હાજર ન હતા, પરંતુ તેમના પતિ હાજર હતા, જેમની સાથે કંગના રનૌતે વાતચીત કરી હતી.

ખેડૂત આંદોલન દરમિયાનની ટિપ્પણી

કંગના રનૌત જે કેસમાં કોર્ટમાં હાજર થયા, તે વર્ષ 2021નો છે. જ્યારે દેશમાં ખેડૂત આંદોલન ચાલી રહ્યું હતું, ત્યારે કંગનાએ એક ટ્વીટમાં બઠિંડાના ગામ બહાદુરગઢ જંડિયાની રહેવાસી 87 વર્ષીય વરિષ્ઠ ખેડૂત મહેન્દર કૌરને 100-100 લઈને ધરણામાં સામેલ થનારી મહિલા ગણાવી હતી. કંગનાએ એક પોસ્ટ પર કોમેન્ટ કરતાં લખ્યું હતું કે, 'હાહાહા, આ તે જ દાદી છે જેને ટાઈમ મેગેઝિનમાં ભારતની પાવરફુલ મહિલા તરીકે ફીચર કરવામાં આવ્યા હતા. તે 100 માં ઉપલબ્ધ છે." આ ટિપ્પણી પર વિવાદ થતા, 4 જાન્યુઆરી 2021ના ​​રોજ, મહેન્દર કૌરે કંગના વિરુદ્ધ માનહાનિનો કેસ દાખલ કર્યો હતો. કંગનાએ દાવો કર્યો હતો કે, તેમણે માત્ર એક વકીલની પોસ્ટને રિ-પોસ્ટ કરી હતી.

આ પણ વાંચો: કંગના-જાવેદ વિવાદ પરસ્પર વાતચીતથી ઉકેલાશે, કોર્ટે આપી મંજૂરી

કેસની સમયરેખા અને કાયદાકીય લડાઈ

માનહાનિ કેસ દાખલ થયા પછી લગભગ 13 મહિના સુધી સુનાવણી ચાલી, જેના પછી ભટિંડા કોર્ટે કંગનાને સમન્સ પાઠવીને હાજર થવાનો આદેશ આપ્યો હતો. આ આદેશ સામે કંગનાએ પહેલાં પંજાબ-હરિયાણા હાઇકોર્ટમાં રાહત માટે અરજી કરી, જે ફગાવી દેવામાં આવી. ત્યારબાદ તેઓ સુપ્રીમ કોર્ટ પહોંચ્યા, જ્યાંથી પણ તેમને કોઈ રાહત મળી નહિ. આખરે, તેમને ભટિંડા કોર્ટમાં હાજર થવું પડ્યું હતું.

મહિલા ખેડૂતનો પલટવાર

કંગનાની ટિપ્પણી પછી જ્યારે આ મામલાએ જોર પકડ્યું, ત્યારે મહેન્દર કૌરે પણ એક ઈન્ટરવ્યૂમાં આકરી પ્રતિક્રિયા આપી હતી. મણે કહ્યું હતું કે, 'કંગના શું જાણે કે ખેતી શું હોય છે? તે પાગલ છે. તેણે જે કંઈ પણ કહ્યું, તેના પર લાનત છે. ખેડૂતની કમાણી શું હોય છે, તે કંગનાને શું ખબર હોય. ખેતીમાંથી પૈસા કમાવવા બહુ મુશ્કેલ છે.' 100 રૂપિયા ટિપ્પણી પર તેમણે કહ્યું હતું કે, તેમના ખેતરોમાં કામ જ પૂરું થતું નથી, તો તે 100 રૂપિયા માટે પ્રદર્શનમાં શામેલ થવા શા માટે જાય?

મહિલા કોન્સ્ટેબલ દ્વારા થપ્પડ

નોંધનીય છે કે, મંડી બેઠક પરથી લોકસભા ચૂંટણી જીત્યા પછી, 6 જૂન 2024ના રોજ ચંદીગઢ એરપોર્ટ પર CISFની મહિલા કોન્સ્ટેબલ કુલવિંદર કૌરે કંગનાને થપ્પડ મારી દીધો હતો. મહિલા કોન્સ્ટેબલે થપ્પડ મારવાનું કારણ એ જણાવ્યું હતું કે, કંગનાએ મહિલા ખેડૂતોને 100-100 રૂપિયા લઈને ધરણા પર બેસનારી કહી હતી, અને તે ધરણામાં તેની માતા પણ હાજર હતી.