અજય દેવગણનો સાઉથમાં પગપેસારો

બોલિવૂડ અભિનેતા અજય દેવગણ તાજેતરમાં તેલંગણાના મુખ્યમંત્રી રેવંત રેડ્ડીને મળ્યા હતા, જ્યાં તેલંગણામાં ફિલ્મ નિર્માણના ભવિષ્ય અંગે મહત્વપૂર્ણ ચર્ચાઓ થઈ હતી. અજય દેવગણે સોમવારે નવી દિલ્હી ખાતે મુખ્યમંત્રીના નિવાસસ્થાને મુલાકાત લીધી હતી, જ્યાં તેમનું ગુલદસ્તા અને ખાસ ચુનરીથી સ્વાગત કરવામાં આવ્યું હતું.

અજય દેવગણનો પ્રસ્તાવ: VFX, AI અને કૌશલ્ય વિકાસ સંસ્થા

આ મુલાકાત દરમિયાન, અજય દેવગણે તેલંગણામાં એક વિશ્વ કક્ષાનો ફિલ્મ સ્ટુડિયો બનાવવાનો પ્રસ્તાવ મૂક્યો છે. આ સૂચિત સ્ટુડિયોમાં અદ્યતન એનિમેશન, VFX (વિઝ્યુઅલ ઇફેક્ટ્સ) અને AI (આર્ટિફિશિયલ ઇન્ટેલિજન્સ) સંચાલિત સ્માર્ટ સ્ટુડિયો ઇન્ફ્રાસ્ટ્રક્ચર હશે

આ ઉપરાંત, અજય દેવગણે તેલંગણામાં એક સ્કિલ ડેવલપમેન્ટ ઇન્સ્ટિટ્યૂટ (કૌશલ્ય વિકાસ સંસ્થા) શરૂ કરવાની પણ વાત કરી. આ સંસ્થા ફિલ્મ નિર્માણ અને સંબંધિત ક્ષેત્રોને લગતા અભ્યાસક્રમો ઓફર કરશે, જેનાથી સ્થાનિક યુવાનોને રોજગારીની નવી તકો મળશે. અભિનેતાએ મુખ્યમંત્રી રેવંત રેડ્ડીને આ પ્રોજેક્ટ્સમાં રાજ્ય સરકારની મદદ માટે વિનંતી કરી છે

મુખ્યમંત્રી રેવંત રેડ્ડીનો સકારાત્મક પ્રતિભાવ

મુખ્યમંત્રી રેવંત રેડ્ડીએ પોતાના ઓફિશિયલ સોશિયલ મીડિયા એકાઉન્ટ પર અજય દેવગણ સાથેની મુલાકાતની તસવીરો શેર કરી હતી. તેમણે જણાવ્યું હતું કે અજયના પ્રસ્તાવ પર ટૂંક સમયમાં કામ શરૂ કરવામાં આવશે.

અજય દેવગણે બેઠકમાં વિશ્વાસ વ્યક્ત કર્યો હતો કે આ પ્રોજેક્ટ્સ દ્વારા તેલંગણાની છબી 'ઇન્વેસ્ટમેન્ટ ફ્રેન્ડલી' બનશે, અને ભવિષ્યમાં રાજ્ય સિનેમાનું એક મુખ્ય કેન્દ્ર બની શકે છે. આ ખાસ બેઠકમાં મુખ્યમંત્રી રેવંત રેડ્ડી ઉપરાંત, મુખ્યમંત્રીના વિશેષ સચિવ અજિત રેડ્ડી અને કેન્દ્રીય યોજનાના સંકલન સચિવ ડૉ. ગૌરવ ઉપ્પલ પણ હાજર રહ્યા હતા.