મીડિયાને જોઈ 'સૈયારા ગર્લ' શરમાઈ!

સૈયારા'ની સફળતા: અનિતા પડ્ડા સિંગાપોર જવા રવાના, OTT રિલીઝ દિવાળી સુધી મોકૂફ

મુંબઈ: બોક્સ ઓફિસ પર ધૂમ મચાવનાર ફિલ્મ સૈયારા'એ માત્ર બે અઠવાડિયામાં વિશ્વભરમાં લગભગ ₹300 કરોડની કમાણી કરી લીધી છે. આ ભવ્ય સફળતાની ઉજવણી કરવા માટે, ફિલ્મની લીડ એક્ટ્રેસ અનિતા પડ્ડા શનિવારે મુંબઈ એરપોર્ટ પર સિંગાપોર જવા રવાના થતી જોવા મળી હતી. અહેવાલ છે કે ફિલ્મની ટીમ સફળતાની ઉજવણી માટે સિંગાપોરની ટ્રીપ પર જઈ રહી છે.

સેલિબ્રિટી ફોટોગ્રાફર સ્નેહજાલાના જણાવ્યા અનુસાર, 'સૈયારા'ની ટીમે સિંગાપોરમાં એક ભવ્ય સેલિબ્રેશન પાર્ટીનું આયોજન કર્યું છે. એરપોર્ટ પર, અનિતાએ મીડિયા સાથે થોડીવાર વાતચીત કરી. તે વાદળી શર્ટ, કાળી ટોપી અને ચહેરા પર માસ્ક પહેરેલી જોવા મળી હતી. જ્યારે ફોટોગ્રાફરોએ તેને માસ્ક ઉતારવા કહ્યું, ત્યારે તેણે શરમાતા કહ્યું, "મને બહુ શરમ આવે છે," અને થોડીવાર માટે માસ્ક ઉતારીને ફરી પહેરી લીધું. બીજીવાર પૂછવામાં આવતા તેણે સ્માઈલ કરીને ના પાડી દીધી.

અગાઉ 23 જુલાઈ, 2025ના રોજ પણ અનિતા મુંબઈમાં એક સલૂનની બહાર જોવા મળી હતી. ત્યારે પણ માસ્ક પહેરેલી અનિતા ભીડ અને ફોટોગ્રાફરોને જોઈને ગભરાઈ ગઈ હતી અને તરત જ કારમાં બેસી ગઈ હતી. તેણે ચાહકો સાથે સેલ્ફી લેવાનો પણ ઇનકાર કરી દીધો હતો.

OTT રિલીઝ દિવાળી સુધી મુલતવી

ફિલ્મના નિર્માતાઓએ OTT રિલીઝ માટે નેટફ્લિક્સ સાથે કરાર કર્યો છે. જોકે, થિયેટરોમાં ફિલ્મના શાનદાર કલેક્શનને ધ્યાનમાં રાખીને, ડિજિટલ પ્રીમિયર હાલ પૂરતું મુલતવી રાખવામાં આવ્યું છે. હવે આ ફિલ્મ દિવાળીની આસપાસ નેટફ્લિક્સ પર રિલીઝ થવાની અપેક્ષા છે. 'સૈયારા' 18 જુલાઈ, 2025ના રોજ રિલીઝ થઈ હતી.

'સૈયારા'ની હૃદયસ્પર્શી વાર્તા

'સૈયારા' વાણી અને ક્રિશની એક સુંદર પ્રેમકથા છે. ક્રિશ એક સિંગર છે જ્યારે વાણી ગીતો લખે છે. બંને એકબીજાને મળે છે અને પ્રેમમાં પડે છે. પરંતુ આ પ્રેમકથામાં વળાંક ત્યારે આવે છે જ્યારે વાણીને તેની બીમારી વિશે ખબર પડે છે. પ્રેમ અને સંગીતથી ભરપૂર આ ફિલ્મની સ્ટોરીએ દર્શકોના હૃદયને સ્પર્શી લીધા છે. અહાન પાંડેએ ક્રિશનું પાત્ર ભજવ્યું છે, જ્યારે અનિતા પડ્ડાએ વાણીનું પાત્ર ભજવ્યું છે.