સુરતના વાલક બ્રિજ પર અકસ્માત મામલે ઘટસ્ફોટઃ નબીરાઓના નશાના કારણે બે ભાઈના મોત

સુરતના વાલક બ્રિજ પર નબીરાઓએ દારૂ પાર્ટી કરીને નશો કર્યા બાદ તેજ ગતિથી કારને દોડાવતા સમયે અકસ્માત થયો હોવાનો ઘટસ્ફોટ થયો છે. નબીરાઓના નશાના કારણે બે સગાભાઈએ જીવ ગુમાવવાનો વારો આવ્યો છે. જ્યારે ઈજાગ્રસ્ત 4 લોકો હોસ્પિટલમાં સારવાર હેઠળ છે. જેમાં બે લોકોની હાલત ગંભીર હોવાનું જાણવા મળ્યુ છે. કામરેજના ફાર્મ હાઉસમાં 7 યુવાનો અને એક યુવતીએ દારૂ પાર્ટી કરી નશો કર્યા બાદ પરત ફરતી વખતે વાલક બ્રિજ પર અકસ્માત થયો હોવાનું તપાસમાં સામે આવ્યુ છે.

સુરતના આઉટર રિંગરોડ પર 7 ફેબ્રુઆરીની રાત્રે નબીરાઓએ બેફામ ડ્રાઈવિંગ કરી અકસ્માત કરતાં બે  સગા ભાઈઓનાં મોત થયા હતા. જ્યારે 4 લોકો ઈજાગ્રસ્ત થયાં હતાં. અકસ્માત બાદ ટાટા હેક્સા કાર ચલાવી રહેલો નબીરો કીર્તન ડાખરા નામનો યુવાન ગાયબ છે. જ્યારે કારમાં પાછળ સવાર એક યુવક અને યુવતી ભાગી ગયા છે.  લોકોએ પકડીને પોલીસને સોંપેલા જૈમિશ ભીંગરાડીયાની પૂછપરછમાં ચોંકાવનારી વિગતો સામે આવી છે. 7 ફેબ્રુઆરીએ એક યુવતી અને 7 યુવકોએ કામરેજના ફાર્મ હાઉસમાં દારૂની પાર્ટી કરી હતી. દારૂની પાર્ટી કર્યા બાદ યુવતીનું વાહન બગડી જતાં કાર માલિક નબીરો અન્ય બે યુવકો જ્યારે યુવતીને ઘરે મૂકવા જતો હતો ત્યારે અકસ્માત સર્જાયો હતો.

અશ્વિનભાઈ સાપોલિયા અને તેમના નાનાભાઈ કમલેશ સાપોલિયા 7 ફેબ્રુઆરીની રાત્રે લગ્ન પ્રસંગમાંથી ઘરે પરત ફરી રહ્યા હતા. તેમની સાથે ધર્મેશભાઈ જાસોલિયા પત્ની ધર્મિષ્ઠાબેન અને પાંચ વર્ષનો પુત્ર યજ્ઞ પણ હતો. બંને પરિવારના સભ્યો બાઈક પર આઉટર રિંગરોડ ખાતે આવેલા વાલક બ્રિજ પરથી પસાર થઈ રહ્યા હતા. તે દરમિયાન કીર્તન ડાખરા પૂરપાટ ઝડપે આવ્યો હતો અને ડિવાઈડર કુદાવીને સામેની સાઈડથી આવી રહેલા સાપોરિયા અને જાસોલિયા પરિવારના પાંચ સભ્યોને અડફેટે લીધા હતા. અકસ્માતમાં બંને સગાભાઈ અશ્વિનભાઈ અને કમલેશભાઈનું મોત નિપજ્યું હતું. જ્યારે જાસોલીયા પરિવારના 4 સભ્યો ઈજાગ્રસ્ત થતાં હોસ્પિટલમાં સારવાર હેઠળ છે. જેમાંથી મહિલા અને બાળક બંને ગંભીર હોવાથી આઈસીયુમાં ખસેડાયા છે.

મોડી રાત્રે થયેલા અકસ્માત સમયે કારમાં એક યુવતી સહિત ચાર લોકો સવાર હતા. જે પૈકી યુવતી અને બે યુવકો અકસ્માત બાદ ભાગી ગયા હતાં. જ્યારે દારૂના નશામાં રહેલો જૈમિશ ભીંગરાડિયા લોકોના હાથે ઝડપાઈ ગયો હતો. ઘટનાની જાણ થતાં પોલીસ દોડી આવી હતી. તે સમયે લોકોએ યુવકને સોંપ્યો હતો. લસકાણા પોલીસે સાપરાધ મનુષ્યવધ સહિતની કલમો હેઠળ કારચાલક વિરુદ્ધ ગુનો નોંધી વધુ તપાસ હાથ ધરી છે.

પોલીસની તપાસમાં જાણવા મળ્યુ છે કે, કારના માલિક મનોજ ડાખરા છે. કાર તેમનો દીકરો કીર્તન ડાખરા ચલાવતો હતો. લસકાણા પોલીસે હીરાબાગ ખાતેના વિઠ્ઠલનગર સ્થિત તેમના ઘરે તપાસ કરી હતી. પરંતુ, કીર્તન અને તેના પિતા બંને ફરાર થઈ ગયા છે. પિતા-પુત્રના મોબાઇલ ફોન પણ સ્વિચ ઓફ થઈ ગયા છે. તેથી પોલીસે પિતા-પુત્રને પકડવા કવાયત શરૂ કરી છે.

જૈમિશ ભીંગરાડિયાએ પોલીસ પૂછપરછમાં જણાવ્યુ હતુ કે, 7 ફેબ્રુઆરીએ સવારે કીર્તન, જૈમિશ, એક યુવતી સહિત આઠ યુવાનો કામરેજના યુનિવર્સલ વિકેન્ડ હોમ્સ એન્ડ વિલા નામના ફાર્મ હાઉસમાં ગયાં હતાં. કાર કીર્તન ડાખરાની હતી. જૈમિશ અને એક યુવતી ઈલેક્ટ્રિક મોપેડ પર ફાર્મ હાઉસ સુધી પહોંચ્યા હતા. સવારથી સાંજ સુધી તમામ લોકોએ દારૂની પાર્ટી કરી હતી અને મોજ મજા કરી હતી.

રાત્રિ દરમિયાન જૈમિશ અને યુવતી ઈલેક્ટ્રિક બાઈક પર પરત ફરી રહ્યાં હતાં. ત્યારે કીર્તન સહિતના યુવાનો કારમાં ઘર તરફ નીકળ્યા હતા. જૈમિશની ઇલેક્ટ્રિક બાઈક રસ્તામાં બંધ પડી જતા તેણે કીર્તનને કોલ કર્યો હતો. તેથી કીર્તનની કારમાં ઘરે આવવા નીકળ્યા હતા. કીર્તન, જૈમિશ, એક યુવતી અને અન્ય એક યુવક કારમાં પરત ફરી રહ્યાં હતાં. કાર કીર્તન ચલાવી રહ્યો હતો. દરમિયાન વાલક બ્રિજ પર પસાર થતાં સમયે કાર ડિવાઈડર કુદાવીને રોંગ સાઈડમાં ગઈ હતી. જેમાં સામેથી આવતા બાઈક ચાલકોને અડફેટે લેતા બેનાં મોત નીપજ્યા હતા.

જૈમિશની પૂછપરછ બાદ લસકાણા પોલીસ દ્વારા કામરેજના યુનિવર્સલ વિકેન્ડ હોમ્સ એન્ડ વિલા નામના ફાર્મ હાઉસમાં તપાસ હાથ ધરી હતી. તે સમયે ફાર્મ હાઉસ બંધ હતું. યુવાનો સાથે આવેલી એક યુવતી વરાછા વિસ્તારની હોવાનું અને નોકરી કરતી હોવાનું જાણવા મળ્યુ છે. ઘરેથી નોકરી પર જવાનું કહીને અને નોકરી પર કંઈ કામ હોવાનું કહી યુવાનો સાથે પાર્ટી કરવા ગઈ હતી.

લસકાણા પોલીસે જૈમિશ સામે દારૂ પીધેલાનો કેસ કર્યો છે. જ્યારે તેની સાથે ફાર્મ હાઉસમાં પાર્ટી કરનાર અન્ય યુવકો અને કારચાલક કીર્તનની શોધખોળ હાથ ધરી છે. લસકાણા પોલીસ સ્ટેશનના પીઆઈ કે.એન.ચાવડાએ જણાવ્યું કે, કારની એફએસએલ દ્વારા તપાસ કરવામાં આવી છે અને આરટીઓ દ્વારા પણ તપાસ કરાશે. કારની સ્પીડ 100 થી 130 વચ્ચે હોવાની શક્યતા છે. જૈમિશ અને યુવતીની પણ પૂછપરછ કરવામાં આવી હતી. યુવતીએ જણાવ્યુ હતું કે કિર્તન તેમને લઈને ઘરે મૂકવા જઈ રહ્યો હતો ત્યારે કાર ખૂબ જ સ્પીડમાં ચલાવી રહ્યો હતો. યુવતીએ તેને સ્પીડમાં ન ચલાવવા માટે ટકોર કરી હતી. ઘરે પહોંચવાની ઉતાવળ નથી તેવું પણ કહ્યું હતું. જો કે કિર્તને તેની ટકોરને અવગણીને સ્પીડમાં કાર ચલાવવાનું ચાલુ રાખતાં અકસ્માત સર્જાયો હતો.

વધુમાં જણાવ્યું હતું કે, ફાર્મ હાઉસથી પરત ફરતા સમયે અને ચારેયે અકસ્માત સર્જાયો ત્યારે કારમાં આગળની સાઈડ કીર્તન અને એક યુવક બેસેલો હતો. જ્યારે પાછળની સાઈડ જૈમિશ અને યુવતી બંને બેસેલા હતાં. અકસ્માત બાદ કીર્તન અને તેનો મિત્ર પહેલા બહાર નીકળ્યા હતા અને ત્યારબાદ યુવતી બહાર નીકળી હતી. જોકે જૈમિશ દારૂના નશામાં હોવાથી અને થોડી કપાળના ભાગી ઈજ થઈ હોવાથી ભાગી શક્યો ન હતો અને લોકોએ તેને દારૂના નશામાં જ ઝડપી પાડ્યો હતો. જૈમિશે પણ દારૂ પીધાની કબૂલાત આપી છે અને કીર્તનને પણ દારૂ પીધો હોવાનું પણ જણાવ્યું છે. આ સાથે જ અન્ય પાંચ જેટલા એ પણ દારૂ પીધો હોવાનું જૈમિશે કબૂલ કર્યું છે.

પોલીસે કાર ચાલક કીર્તન ડાખરાની ઘરપકડ કરી છે. પોલીસ દ્વારા હાલ કીર્તન ડાખરાની પુછપરછ કરવામાં આવી રહી છે અને અન્ય સાથી મિત્રોની પણ ભાળ મેળવવાનો પ્રયત્ન કરવામાં આવી રહ્યો છે.