મોરબીમાં લીવ-ઇન રિલેશનશિપનો કરૂણ અંત

મોરબીમાંથી પ્રેમસંબંધોમાં હિંસાની ગંભીરતા દર્શાવતો એક ચોંકાવનારો બનાવ સામે આવ્યો છે. છેલ્લા ત્રણ મહિનાથી લિવ-ઇન રિલેશનશિપમાં રહેતા યુગલ વચ્ચે થયેલા ઉગ્ર ઝઘડાએ ભયાનક અંત લીધો હતો. લખધીરપુર રોડ નજીક એક ફેક્ટરીના લેબર ક્વાર્ટરમાં યુવતીની ક્રૂર હત્યા થઈ હતી, જ્યારે હત્યાના આરોપી પ્રેમીનું પોલીસ કસ્ટડી દરમિયાન મોત થતા સમગ્ર કેસ ગૂંચવણભર્યો બની ગયો છે.

પ્રાપ્ત માહિતી મુજબ, મૂળ મધ્યપ્રદેશના રહેવાસી 25 વર્ષીય નરેન્દ્રસિંહ કમલસિંહ ધ્રુવેલ અને 20 વર્ષીય પુષ્પાદેવી ગંભીરસિંહ મરાવી મોરબી તાલુકાના લખધીરપુર વિસ્તારમાં આવેલી સિરામિક ફેક્ટરીના લેબર ક્વાર્ટરમાં રહી રહ્યા હતા. 29 નવેમ્બરના રોજ બંને વચ્ચે કોઈ કારણસર ગંભીર ઝઘડો થયો હતો.

ઝઘડો વધતા નરેન્દ્રસિંહે પુષ્પાદેવી પર લાકડાના ધોકા અને પટ્ટા વડે નિર્દયતાથી હુમલો કર્યો હતો. ફોરેન્સિક તપાસ દરમિયાન યુવતીના શરીર પર ગંભીર મારના નિશાન મળી આવ્યા હતા. સૌથી ચોંકાવનારી બાબત એ હતી કે યુવતીના ચહેરા અને ગાલ પર અનેક બચકાં ભરવામાં આવ્યા હતા. વધુ પડતી ઇજા અને ભારે શારીરિક પીડાના કારણે યુવતીનું મોત નીપજ્યું હોવાનું ફોરેન્સિક પીએમ રિપોર્ટમાં સામે આવ્યું છે.

બનાવની જાણ થતાં મોરબી તાલુકા પોલીસ ઘટના સ્થળે પહોંચી હતી. પૂછપરછ દરમિયાન નરેન્દ્રસિંહે મહિલાની હત્યા કર્યાની કબૂલાત કરી હતી. ત્યારબાદ આરોપીને પોલીસ સ્ટેશન લઈ આવવામાં આવ્યો હતો. જોકે, પોલીસ કસ્ટડી દરમિયાન જ તેને અચાનક છાતીમાં ભારે દુઃખાવો ઉપડતા બેભાન થયું હતું.

પોલીસે તાત્કાલિક 108 એમ્બ્યુલન્સ મારફતે તેને સિવિલ હોસ્પિટલ ખસેડ્યો હતો, જ્યાં તબીબોએ તેને મૃત જાહેર કર્યો હતો. બાદમાં કરાયેલા ફોરેન્સિક પોસ્ટમોર્ટમમાં યુવકનું મોત હાર્ટએટેક એટલે કે કાર્ડિયાક એરેસ્ટના કારણે થયું હોવાનું જાણવા મળ્યું છે.

એક જ ઘટનામાં યુવતીની હત્યા અને આરોપી યુવકનું મોત થતા સમગ્ર મામલો ચર્ચાનું કેન્દ્ર બન્યો છે. પોલીસે બી ડિવિઝન પોલીસ મથકે નોંધ કરી સમગ્ર ઘટનાની ઊંડાણપૂર્વક તપાસ શરૂ કરી છે.

આ બનાવ પ્રેમસંબંધોમાં વધતી હિંસા અને આક્રોશના જોખમને સ્પષ્ટ રીતે દર્શાવે છે, જ્યાં એક ક્ષણનો આવેશ બે યુવાન જિંદગીઓના અંતનું કારણ બની શકે છે.