ભાવનગર બેંક હેકિંગ કેસમાં વધુ ત્રણ આરોપી ઝડપાયા!

Accused arrested in Bhavnagar District Bank hacking: ભાવનગર ડિસ્ટ્રિક્ટ કો-ઓપરેટિવ બેંકની કોમ્પ્યુટર સિસ્ટમ હેકિંગ કરી રૂપિયા 7.34 કરોડના સાયબર ફ્રોડ કેસમાં ગાંધીનગર સાયબર સેન્ટર ઓફ એક્સેલન્સે વધુ ત્રણ આરોપીઓની ધરપકડ કરી છે. સાયબર સેન્ટરની તપાસ દરમિયાન સામે આવ્યું છે કે, આરોપીઓએ બેંક ખાતાં ઉપલબ્ધ કરાવી અને સાયબર ફ્રોડની રકમને અલગ-અલગ ખાતાઓમાં ટ્રાન્સફર કરીને ગેરકાયદે નાણાકીય વ્યવહારોને અંજામ આપ્યો હતો.

હેકિંગથી કરોડો રૂપિયાનું વર્ચ્યુઅલ બેલેન્સ સર્જાયું
તપાસ એજન્સીઓના જણાવ્યા મુજબ, આરોપીઓએ ભાવનગર ડિસ્ટ્રિક્ટ કો-ઓપરેટિવ બેંકની કોર બેન્કિંગ સિસ્ટમ (CBS), સર્વર અને ડેટાબેઝમાં ગેરકાયદેસર પ્રવેશ મેળવી ઇલેક્ટ્રોનિક રેકોર્ડમાં ફેરફાર કર્યો હતો. ત્યારબાદ કૃત્રિમ રીતે આશરે રૂપિયા 7.34 કરોડનું બેંક બેલેન્સ તફડાવી તે રકમ વિવિધ બેંક ખાતાઓમાં ટ્રાન્સફર કરી હતી. સમગ્ર કાવતરાથી બેંકને મોટું આર્થિક નુકસાન પહોંચ્યું હોવાનું તપાસમાં સામે આવ્યું છે.

અત્યાર સુધી 10 આરોપીઓની ધરપકડ
આ કેસમાં અગાઉ સાત આરોપીઓ ઝડપાયા હતા. હવે વધુ ત્રણ આરોપીઓ ઝડપાતા આરોપીઓની સંખ્યા 10 પર પહોંચી છે. ગાંધીનગર સાયબર સેન્ટર ઓફ એક્સેલન્સ દ્વારા તેમની બેંકિંગ વિગતો, મોબાઇલ અને નાણાકીય વ્યવહારોની ટેકનિકલ તપાસ કરવામાં આવી રહી છે.

પકડાયેલા આરોપીઓની ભૂમિકા શું હતી?
સાયબર સેન્ટરે પકડેલા ત્રણ આરોપીઓ પૈકી સુરતના અનિલ ધર્મેશભાઈ અગ્રાવત, આણંદ જિલ્લાના વાસદના ભૂમિલ નયનકુમાર પટેલ અને રાજસ્થાનના વિકાસ પોખરમલ ચૌધરીનો સમાવેશ થાય છે. અનિલ અગ્રાવતે પોતાનું બેંક ખાતું ભાડે આપ્યું હોવાનું સામે આવ્યું છે. ભૂમિલ પટેલે ઇન્ટરનેટ બેન્કિંગ સક્રિય કરીને યુઝરનેમ અને પાસવર્ડ અન્ય આરોપીઓને પહોંચાડ્યા હતા. જ્યારે વિકાસ ચૌધરીએ બેંક ખાતું ખોલાવવામાં અને અન્ય આરોપીઓ સાથે સંકલન કરવામાં મહત્વની ભૂમિકા ભજવી હોવાનું તપાસ દરમિયાન બહાર આવ્યું છે.

બેંક ખાતાં ભાડે લઈને ચાલતું હતું નેટવર્ક
પકડાયેલી સાયબર ફ્રોડ ગેંગ લાલચ આપીને લોકોના બેંક ખાતાં ભાડે મેળવતી હતી. ત્યારબાદ ખાતાનો ઉપયોગ ગેરકાયદે નાણાંની હેરફેર માટે કરવામાં આવતો હતો. તપાસ એજન્સીઓનું માનવું છે કે, ગેંગ દેશભરમાં સક્રિય નેટવર્ક મારફતે કામગીરી કરતી હતી.

CBS સોફ્ટવેરની ખામીનો ઉઠાવ્યો લાભ
તપાસ દરમિયાન ખુલાસો થયો છે કે, બેંકના CBS સોફ્ટવેરમાં રહેલી સુરક્ષા ખામીઓનો આરોપીઓએ લાભ લીધો હતો. આ પ્રકારની ખામીઓના કારણે દેશની અનેક બેંકો અગાઉ સાયબર હુમલાનો ભોગ બની ચૂકી હોવાનું સામે આવ્યું છે. આરોપીઓએ જૂના ચાર બેંક ખાતાઓના ડેટામાં ફેરફાર કરી પોતાના મોબાઇલ નંબર ઉમેર્યા, ત્યારબાદ કરોડો રૂપિયાનું વર્ચ્યુઅલ બેલેન્સ દર્શાવી તે રકમ કુલ 135 અલગ-અલગ બેંક ખાતાઓમાં ટ્રાન્સફર કરી દીધી હતી.

તપાસ હજુ યથાવત
સાયબર સેન્ટર ઓફ એક્સેલન્સ હવે આ સમગ્ર નેટવર્કના અન્ય સભ્યો, બેંક ખાતાં ઉપલબ્ધ કરાવનારા લોકો તેમજ નાણાંની અંતિમ હેરફેર સુધીની કડી શોધવામાં વ્યસ્ત છે. તપાસ એજન્સીઓના જણાવ્યા મુજબ આ કેસમાં હજુ વધુ ધરપકડ અને નવા ખુલાસા થાય તેવી શક્યતા છે.

શું હતો સમગ્ર મામલો?
માર્ચ-2026માં ભાવનગર ડિસ્ટ્રીકટ કો-ઓપરેટિવ બેન્કની સિક્યુરિટી સિસ્ટમને હેક કરી સાયબર ગઠીયાઓએ રૂપિયા 7.34 કરોડથી વધુ રકમની ઓનલાઈન ઠગાઈ કરી હતી. સિદસર, સુભાષનગર, ભરતનગર અને તળાજા બ્રાન્ચમાંથી મોબાઈલ બેંકિંગ મારફતે આ નાણાં ઉપાડવામાં આવ્યા હતા. રજાના દિવસોમાં મોબાઈલ બેંકિંગથી 70 થી 80 લાખ રૂપિયાના ટ્રાન્ઝેક્શન થતા હોય છે. પરંતુ સિસ્ટમ ચેક કરતાં ₹7 કરોડથી વધુ દેખાતાં ઉચ્ચ અધિકારીઓએ તપાસ કરી હતી. 

તપાસ દરમિયાન જાણવા મળ્યું કે સોફ્ટવેર હેક કરી મોબાઈલ બેંકિંગ દ્વારા મોટા ટ્રાન્ઝેક્શન કરવામાં આવ્યા હતા. કેટલાક ખાતામાં ખૂબ ઓછી રકમ હોવા છતાં કરોડો રૂપિયાની લેવડદેવડ દર્શાવવામાં આવી હતી. આથી સોફ્ટવેર સિસ્ટમમાં ગંભીર ખામી હોવાનું બહાર આવ્યું હતું. આ ઘટનામાં સોફ્ટવેરની મુખ્ય સુરક્ષા કી કંપની પાસે હોવાથી ટેકનિકલ સ્તરે ગેરવપરાશ થયો હોવાની આશંકા વ્યક્ત કરવામાં આવી હતી. બેંકના અધિકારીઓએ ટેકનિકલ નિષ્ણાતો સાથે ગાંધીનગર સાયબર સેન્ટર ઓફ એક્સેલન્સમાં ફરિયાદ નોંધાવી હતી.