ભાવનગરમાં વન અધિકારીના પરિવારના ત્રણ સભ્યોની હત્યા

ભાવનગરમાં ફરજ બજાવતાં વન વિભાગના અધિકારીના પત્ની અને બે સંતાનોના મૃતદેહ મળી આવતાં ચકચાર મચી ગઈ છે. ફોરેસ્ટ કોલોની નજીક ખાડામાં દાટી દીધેલી હાલતમાં મૃતદેહો મળી આવ્યા છે. બંને સંતાનો સાથે માતા 10 દિવસ પહેલા સુરત જવા નીકળ્યા બાદ ગુમ થયા હતા. જેની પોલીસને જાણ પણ કરવામાં આવી હતી. ત્રણેયની હત્યા કરી મૃતદેહ દાટી દીધા હોવાની આશંકા સેવવામાં આવી રહી છે. ભાવનગર પોલીસે ઘટના સ્થળે પહોંચી વધુ તપાસ હાથ ધરી છે.

વન વિભાગમાં ફરજ બજાવતાં ACF શૈલષ ખાંભલાએ 7 નવેમ્બરે ભરતનગર પોલીસ સ્ટેશનમાં જાણવા જોગ નોંધાવી હતી કે, તેમની પત્ની નયનાબેન અને દીકરો-દીકરી 5 નવેમ્બરથી ગુમ છે. પરિવાર સુરત રહેતો હતો અને રજામાં તેમની સાથે રહેવા આવ્યો હતો. જાણવાજોગ દાખલ થયા બાદ પોલીસની ટીમોએ તપાસ હાથ ધરી હતી.

તપાસનીશ ટીમને શનિવારે માહિતી મળી કે, જે દિવસે ત્રણેય ગુમ થયા હતા તેની આસપાસના સમયમાં  ફોરેસ્ટ કોલોનીની બાજુમાં ખોદકામ કરવામાં આવ્યું હતું. શંકાસ્પદ કામગીરીના આધારે પોલીસે FSL અધિકારી તથા એક્ઝિક્યુટિવ મેજિસ્ટ્રેટ સાથે ડોગને સાથે રાખી ખોદકામ કર્યું હતું. જ્યાંથી ત્રણ મૃતદેહ મળી આવ્યા હતા. આ મૃતદેહ નયનાબેન અને તેમના દીકરા-દીકરીના હોવાની પરિવારે ઓળખ કરી હતી. ત્યારબાદ મૃતદેહો પોસ્ટમોર્ટમ માટે મોકલાયા હતા.

નયનાબેન અને બંને સંતાનોના કેવી રીતે મોત થયા, તેમાં કોની સંડોવણી છે જેવા સવાલોના જવાબ મેળવવા પોલીસ તપાસ ચાલી રહી છે. હાલમાં પોલીસને પારિવારિક અથવા જાણભેદુ ઉપર હત્યાની આશંકા છે. તેથી ક્રાઈમ સીન કેવી રીતે બન્યો તે દિશામાં પોલીસે તપાસ આરંભી છે.

શું છે સમગ્ર મામલો?

ભાવનગર શહેરના તળાજા રોડ કાચના મંદિર પાસે રહેતાં વન વિભાગના અધિકારીનો સંયુક્ત પરિવાર સુરત ખાતે રહે છે. થોડા દિવસ પહેલાં સુરતથી તેમના 40 વર્ષિય પત્ની નયનાબેન રબારી, 13 વર્ષની દીકરી પૃથા રબારી અને 9 વર્ષિય દીકરો ભવ્ય રબારી વેકેશન કરવા ભાવનગર આવ્યા હતા. વેકેશન પતાવી સુરત જવા નીકળ્યા બાદ ગુમ થયા હતા. જેની શોધખોળ કર્યા બાદ પત્તો ન મળતાં પોલીસને જાણ કરવામાં આવી હતી.

પોલીસે જાણવા જોગ નોંધી ત્રણેય લોકોની શોધખોળ શરૂ કરી હતી. પરિવારજનોએ લાપતા સભ્યોના ફોટા સાથે સોશિયલ મીડિયામાં પોસ્ટ વાયરલ કરી લોકોની મદદ પણ માંગી હતી. કોઈને ગુમ થયેલા સભ્યો જોવા મળે તો પરિવારને ટેલિફોનીક જાણ કરવા અપીલ કરાઈ હતી.

કેવી રીતે થયો હત્યાકાંડનો પર્દાફાશ

રવિવારે તળાજા રોડ પર સ્થિત કાચના મંદિર સામે આવેલી ફોરેસ્ટ કોલોની નજીકની જમીનમાંથી તીવ્ર દુર્ગંધ આવતી હોવાની બાતમી પોલીસને મળી હતી. પોલીસે તુરંત ઘટનાસ્થળે પહોંચી શંકાસ્પદ જગ્યા પર ખોદકામ કરાવ્યું હતું. ખોદકામ દરમિયાન જમીનમાંથી એક પછી એક ત્રણ મૃતદેહો મળી આવ્યા હતા. મૃતદેહો કોહવાઈ ગયેલી હાલતમાં હતા. મૃતદેહોની ઓળખ ગુમ થયેલા નયનાબેન અને તેમના બે બાળકો પૃથા અને ભવ્ય તરીકે થતાં પરિવાર પર આભ તૂટી પડ્યું હતું.

હત્યારો પારિવારિક હોવાની શક્યતા

માતા અને બંને સંતાનોના મૃતદેહ જમીનમાં દાટેલી હાલતમાં મળી આવતાં હત્યા થઈ હોવાનું પોલીસ માની રહી છે. ઘટનાની ગંભીરતા જોઈને ઉચ્ચ પોલીસ અધિકારીઓ, FSL (ફોરેન્સિક સાયન્સ લેબોરેટરી) અને ડોગ સ્ક્વોડની ટીમો તાત્કાલિક ઘટનાસ્થળે પહોંચી ગઈ હતી અને પુરાવા એકત્ર કરવાની કામગીરી હાથ ધરી હતી. પોલીસે હત્યાનો ગુનો નોંધી સઘન પૂછપરછ શરૂ કરી છે. પ્રાથમિક તપાસમાં એવું જાણવા મળ્યું છે કે, ગુમ થતી વખતે મહિલાએ પોતાનો મોબાઈલ ફોન ઘરે જ મૂકી દીધો હતો. તેથી પારિવારિક કે નજીકના જ કોઈ જાણભેદુએ હત્યા કરી હોવાની આશંકા છે. ટૂંક સમયમાં ટ્રિપલ મર્ડર કેસનો ભેદ ઉકેલાઈ જવાની શક્યતા છે.