સુરત: પેશાબ કરવા જેવી નજીવી બાબતે યુવકની હત્યા

સુરતના ભેસ્તાનમાં લોહીયાળ જંગ: પાણીની ટાંકીમાં લઘુશંકાનો વિરોધ કરતા યુવકની હત્યા

સુરત શહેરના ભેસ્તાન વિસ્તારમાં એક હૃદયદ્રાવક ઘટના બની છે, જેમાં નજીવી બાબતે થયેલા વિવાદમાં એક યુવકે પોતાનો જીવ ગુમાવ્યો છે. અગાસી પર રાખેલી પાણીની ટાંકીમાં પેશાબ કરવા જેવી બાબતે થયેલા ઝઘડામાં એક યુવકની કરપીણ હત્યા કરવામાં આવી છે.

ઘટનાની વિગત : 

મળતી માહિતી મુજબ, ભેસ્તાન વિસ્તારમાં આવેલી એક બિલ્ડિંગની અગાસી પર કેટલાક કિશોરો પાણીની ટાંકીમાં લઘુશંકા કરી રહ્યા હતા. જ્યારે ત્યાં રહેતી એક મહિલા અને તેના પરિવારે આ ગંદકીનો વિરોધ કર્યો અને ઠપકો આપ્યો, ત્યારે આરોપીઓ ઉશ્કેરાઈ ગયા હતા. આ મામલે બોલાચાલી વધતા ચાર કિશોરો અને સોહેબ ખાન નામના શખ્સે પરિવાર પર હુમલો કરી દીધો હતો.

તીક્ષ્ણ હથિયારોથી હુમલો : 

આરોપીઓએ ઉશ્કેરાટમાં આવીને મહિલા, તેના પતિ અને દિયર પર ચપ્પુ વડે જીવલેણ હુમલો કર્યો હતો. આ હિંસક ઘટનામાં દિયરને ગંભીર ઈજાઓ થતા તેનું કમકમાટીભર્યું મોત નીપજ્યું હતું, જ્યારે મહિલાનો પતિ ગંભીર હાલતમાં હોસ્પિટલમાં સારવાર લઈ રહ્યો છે.

પોલીસ તપાસ અને કાર્યવાહી : 

ઘટનાની ગંભીરતાને ધ્યાને લઈને ભેસ્તાન પોલીસે તાત્કાલિક તપાસ શરૂ કરી હતી. પોલીસે મુખ્ય આરોપી સોહેબ ખાનની ધરપકડ કરી લીધી છે. આ સિવાય હુમલામાં સામેલ ચાર બાળ કિશોરોને પણ કાયદાકીય પ્રક્રિયા હેઠળ ડિટેઈન કરવામાં આવ્યા છે. પોલીસ હાલ આ મામલે વધુ પુરાવા એકત્ર કરી રહી છે.