સુરત: નરાધમ શિક્ષકે વિદ્યાર્થીનીને બદનામ કરી

સુરતમાં ગુરુ-શિષ્યના પવિત્ર સંબંધને કલંકિત કરતો એક શરમજનક કિસ્સો સામે આવ્યો છે. ટ્યુશન ક્લાસ ચલાવતા એક શિક્ષક ભાવેશ પટેલે તેની ભૂતપૂર્વ વિદ્યાર્થીની પર દાનત બગાડી અને તેની વાત ન માનતા સોશિયલ મીડિયાનો ઉપયોગ કરીને બદનામ કરી દીધી. શિક્ષકે વિદ્યાર્થીનીના ફોટા સાથે ચેડાં કરીને તેને સોશિયલ મીડિયા પર અપલોડ કર્યા હતા. આ ગંભીર મામલો વિદ્યાર્થીની અને તેના પરિવારના ધ્યાનમાં આવતા તેમણે શિક્ષક વિરુદ્ધ પોલીસ ફરિયાદ નોંધાવી છે.

શિક્ષક બન્યો શેતાન, સાયબર ક્રાઇમે કરી ધરપકડ :

સુરત સાયબર ક્રાઇમ પોલીસે વિદ્યાર્થીનીના પરિવારની ફરિયાદના આધારે આરોપી શિક્ષક ભાવેશ પટેલની ધરપકડ કરી છે. કાળા કરતૂતો કરનાર આ નરાધમ શિક્ષક કતારગામ વિસ્તારમાં રહે છે અને વર્ષોથી ટ્યુશન ક્લાસ ચલાવે છે, જ્યાં મોટાભાગે ધોરણ 8 થી 10ના વિદ્યાર્થીઓ અભ્યાસ માટે આવે છે. વિદ્યાર્થીઓને સંસ્કારનું સિંચન કરનાર આ શિક્ષક અસંસ્કારી નીકળ્યો છે.

ધોરણ 10ની વિદ્યાર્થીનીને હેરાનગતિ :

થોડા વર્ષો પહેલાં એક વિદ્યાર્થીની ધોરણ 10માં સારા અભ્યાસ માટે ભાવેશ પટેલના ટ્યુશન ક્લાસમાં જોડાઈ હતી. અભ્યાસ દરમિયાન શિક્ષક દ્વારા આ વિદ્યાર્થીનીને વારંવાર હેરાનગતિ કરવામાં આવતી હતી. જોકે, ડરના કારણે વિદ્યાર્થીનીએ પરિવારને આ અંગે કંઈ જણાવ્યું ન હતું. શિક્ષકની દાનત બગડતાં, તેણે વિદ્યાર્થીનીના નામે ફેક સોશિયલ મીડિયા એકાઉન્ટ બનાવ્યું અને તેના મોર્ફ કરેલા (બદલેલા) ફોટા અપલોડ કર્યા. આટલું જ નહીં, તેણે વિદ્યાર્થીનીના પરિવારના સભ્યો સાથે એક WhatsApp ગ્રુપ બનાવીને તેમાં પણ મોર્ફ કરેલા ફોટા મોકલ્યા હતા.

માનસિક ત્રાસથી પરેશાન થઈ પરિવારે ફરિયાદ નોંધાવી :

શિક્ષક ભાવેશની કરતૂતોથી પરેશાન થઈને વિદ્યાર્થીનીના પરિવારે આખરે સિંગણપોર પોલીસ સ્ટેશનમાં ફરિયાદ નોંધાવી. આ વિદ્યાર્થીની આજે 23 વર્ષની થઈ ગઈ છે, પરંતુ શિક્ષક દ્વારા કરાતી હેરાનગતિના કારણે તેને વર્ષો સુધી માનસિક ત્રાસ વેઠવો પડ્યો. પરિવારના સાથથી તેને શિક્ષકના કૃત્યોનો ભાંડો ફોડવાની હિંમત મળી અને આખરે પોલીસ ફરિયાદ નોંધાવી. પોલીસે ભાવેશ પટેલની ધરપકડ કરી છે. ગુરુના નામને લાંછન લગાડનાર આ શિક્ષક સામે આગામી દિવસોમાં વધુ કડક કાયદેસરની કાર્યવાહી કરવામાં આવશે.