સુરતમાં રેલી યોજી રોલો પાડનારા વિદ્યાર્થીઓની 22 લક્ઝુરિયસ કાર જપ્ત કરાઇ

સુરતમાં વિદ્યાર્થીઓનો લક્ઝરીયસ કાર સાથેનો વાયરલ વિડિયો મામલે સુરત પોલીસે કડક કાર્યવાહી કરીને 22 લક્ઝયુરિયસ કાર કબજે કરી છે તથા પાલ પોલીસ સ્ટેશનમાં અલગ અલગ 6 ગુના નોંધવામાં આવ્યા છે જેમાં ત્રણ ગુના વાલીઓ સામે તથા ત્રણ ગુના ડ્રાઇવર સામે નોંધાયા છે. 

તાજેતરમાં સુરતના જહાંગીરપુરા -દાંડી રોડની ફાઉન્ટન હેડ સ્કુલના વિદ્યાર્થીઓએ વૈભવી કાર સાથે રેલી કાઢી હોવાનો વીડિયો સોશિયલ મીડિયામાં વાયરલ થયો હતો.  ધોરણ 12માં અભ્યાસ કરતા વિદ્યાર્થીઓએ ફેરવેલમાં રોલો પાડવા માટે રીતસર વૈભવી કારનો રોડ શો યોજ્યો હતો અને કાયદાના લીરેલીરા ઉડાવ્યા હતા. 

આ રેલીનો વીડિયો સોશિયલ મીડિયામાં વાયરલ થયા બાદ ભારે ઉહાપોહ થયો હતો. જેના પગલે પાલ પોલીસે કાર્યવાહી શરુ કરી હતી અને અત્યાર સુધી 22 લક્ઝુરિયસ કાર કબજે કરાઇ છે. પોલીસે આ મામલે 6 અલગ અલગ ગુના નોંધ્યા છે જેમાં 3 ગુના તો વાલીઓ સામે નોંધાયા છે જ્યારે 3 ગુના કાર ચલાવનાર ડ્રાઇવર સામે નોંધાયા છે. 

પોલીસે લોકોના જીવ જોખમમાં મુકવા બાબતે બીએસએનની કલમ 125 મુજબના ગુના નોંધ્યા છે. પ્રાથમિક તપાસમાં ત્રણ કારની અંદર વિદ્યાર્થીઓ કાર ચલાવતા હોવાનું બહાર આવ્યું હતું. જ્યારે બીજી કાર વિદ્યાર્થીઓ ચલાવતા હોવાનું બહાર આવતા પોલીસે તપાસ શરુ કરી હતી. આ વિદ્યાર્થીઓ સગીર હોવા છતાં તેમના વાલીઓએ કાયદાના લીરેલીરા ઉડાવીને તેમના સંતાનોને કાર ચલાવવા આપી દીધી હતી જેથી વાલીઓ સામે પણ ગુનો નોંધવામાં આવ્યો છે.