સુરતના વરાછા વિસ્તારમાં મમતાને લાંછન લગાડતી એક અત્યંત કરુણ ઘટના પ્રકાશમાં આવી છે. સતત તોફાન કરતી અને જમવા બાબતે હેરાન કરતી માત્ર બે વર્ષની માસૂમ બાળકીને તેની સગી માતાએ વેલણ અને સાવરણી વડે નિર્દયતાથી માર માર્યો હતો. આ અમાનુષી અત્યાચારને કારણે બાળકીનું મોત નીપજ્યું છે. પોલીસે આ મામલે માતા વિરુદ્ધ હત્યાનો ગુનો નોંધી તેની ધરપકડ કરી લીધી છે.
શું છે સમગ્ર ઘટના ?
વરાછાની વર્ષા સોસાયટીમાં લફીબેન સોલંકી નામની મહિલા છેલ્લા દોઢ મહિનાથી મૈત્રી કરારથી એક યુવક સાથે રહેતી હતી. તેને પ્રથમ લગ્નથી ચાર દીકરીઓ છે, જેમાં ત્રીજા નંબરની બે વર્ષીય પુત્રી યશવિતા વારંવાર જીદ કરતી અને જમવા બાબતે માતાને હેરાન કરતી હતી. ગતરોજ બાળકીના તોફાનથી ઉશ્કેરાયેલી માતાએ માનવતાની તમામ હદો વટાવી દીધી હતી. તેણે માસૂમ પર વેલણ અને સાવરણીથી હુમલો કર્યો અને જોરદાર તમાચા ઝીંકી દીધા હતા.
મોઢામાંથી ફીણ નીકળ્યા અને બાળકી ઢળી પડી :&nbsp;
માતાના કમકમાટીભર્યા મારને કારણે નાનકડી બાળકી બેભાન થઈ ગઈ હતી અને તેના મોઢામાંથી ફીણ નીકળવા લાગ્યા હતા. ગભરાયેલી માતા તેને તાત્કાલિક સ્મીમેર હોસ્પિટલ લઈ ગઈ હતી, પરંતુ ત્યાં હાજર તબીબોએ બાળકીને મૃત જાહેર કરી હતી. ઘટનાની ગંભીરતા જોઈ હોસ્પિટલ તંત્રએ પોલીસને જાણ કરી હતી.
પીએમ રિપોર્ટમાં થયો ચોંકાવનારો ખુલાસો :&nbsp;
બાળકીના પોસ્ટમોર્ટમ રિપોર્ટમાં જે વિગતો સામે આવી તે હચમચાવી દે તેવી છે. તબીબોના જણાવ્યા અનુસાર, બાળકીના શરીર પર માત્ર તે દિવસના જ નહીં પરંતુ અગાઉ પણ પટ્ટા અને લાકડીથી માર માર્યો હોય તેવા જૂના નિશાનો મળી આવ્યા છે. માથાના ભાગે થયેલી ગંભીર ઈજાને કારણે તેને બ્રેઈન હેમરેજ થયું હતું, જે તેના મોતનું મુખ્ય કારણ બન્યું છે.
બાળકો પર હાથ ઉપાડવો પડી શકે છે ભારે :&nbsp;
આ કિસ્સો સમાજ માટે એક લાલબત્તી સમાન છે. ભારતમાં 'જુવેનાઈલ જસ્ટિસ એક્ટ' (JJ Act) હેઠળ બાળકોને શારીરિક કે માનસિક ત્રાસ આપવો એ ગંભીર ગુનો છે. જો કોઈ વ્યક્તિ સગીર બાળક પર હુમલો કરે અથવા તેને જાણીજોઈને ઈજા પહોંચાડે, તો તેને ત્રણ વર્ષ સુધીની જેલ અને એક લાખ રૂપિયા સુધીનો દંડ થઈ શકે છે. બાળકોના ઉછેરમાં ધીરજ ગુમાવવી કેટલી ઘાતક સાબિત થઈ શકે છે, તે આ ઘટના પરથી સમજાય છે.

સુરત માતાએ પુત્રીની હત્યા કરી

વરાછામાં જનેતાએ વેલણ અને સાવરણીથી ફટકારી માસૂમ પુત્રીની હત્યા કરી,પીએમમાં થયો મોટો ખુલાસો

March 19, 2026 | 16:47 IST