સુરત: વિધર્મી યુવાનુ'અભિષેક' બની સગીરા પર દુષ્કર્મ

સુરતના ઈચ્છાપોર વિસ્તારમાં માનવતાને શરમાવે તેવી અને ટેકનોલોજીના દુરુપયોગની ચોંકાવનારી ઘટના સામે આવી છે. ધોરણ-12 માં અભ્યાસ કરતી એક નિર્દોષ સગીરાને પ્રેમજાળમાં ફસાવી, તેની ઓળખ છુપાવીને દુષ્કર્મ ગુજારવાના આરોપમાં પોલીસે મુખ્ય આરોપી સહિત પાંચ શખ્સોની ધરપકડ કરી છે. આ કેસમાં સૌથી વધુ ચોંકાવનારી વિગત એ છે કે આરોપીએ પોતાનું મુસ્લિમ નામ છુપાવવા માટે Artificial Intelligence (AI) એપ્લિકેશનનો સહારો લઈ સરકારી દસ્તાવેજમાં છેડછાડ કરી હતી.

ઇન્સ્ટાગ્રામથી શરૂ થયેલી માયાવી જાળ

મૂળ ઉત્તર પ્રદેશની વતની અને સુરતમાં રહી અભ્યાસ કરતી 16 વર્ષીય સગીરા માર્ચ-2025 માં ઇન્સ્ટાગ્રામના માધ્યમથી મૂળ બિહારના વતની મોહમ્મદ સાજીદ ઉર્ફે અહદ પઠાણના સંપર્કમાં આવી હતી. સાજીદે સગીરાનો વિશ્વાસ જીતવા માટે પોતાની અસલી ઓળખ છુપાવી હતી. તેણે પોતાનું નામ 'અભિષેક ગુપ્તા' હોવાનું જણાવી સગીરાને પ્રેમજાળમાં ફસાવી હતી. સગીરા આ નરાધમની બદદાનતથી અજાણ હતી અને તેની મીઠી વાતોમાં આવી ગઈ હતી.

AI ટેકનોલોજીથી નકલી ઓળખનું નિર્માણ

પોલીસ તપાસમાં ખુલાસો થયો છે કે સાજીદને આ ગુનામાં તેના મિત્ર અભયકુમાર પ્રદીપ શર્માએ મોટી મદદ કરી હતી. અભયે પોતાના મોબાઈલમાં રહેલી એડિટિંગ અને AI એપની મદદથી સાજીદના અસલી આધારકાર્ડમાં છેડછાડ કરી હતી. તેણે 'મોહમ્મદ સાજીદ' નામ હટાવી ત્યાં 'અભિષેક ગુપ્તા' નામ એડિટ કરી દીધું હતું. આ નકલી ઓળખપત્રનો ઉપયોગ કરીને આરોપીએ સુરતની એક હોટેલમાં રૂમ બુક કરાવ્યો હતો. હોટેલ સંચાલકોને પણ અંધારામાં રાખી હિન્દુ નામનું આઈડી બતાવી તેણે સગીરા સાથે ત્યાં અવાર-નવાર દુષ્કર્મ આચર્યું હતું.

ષડયંત્રમાં સામેલ અન્ય સાગરીતોની ભૂમિકા

આ ગુનામાં માત્ર સાજીદ જ નહીં, પણ તેની આખી મંડળી સક્રિય હતી:

• મોહમ્મદ ખુરશીદ (સુશીલ રાયન): આ શખ્સ વચેટિયા તરીકે કામ કરતો હતો. જ્યારે સગીરા વાત ન કરે ત્યારે તે સંપર્ક કરાવી આપતો અને દુષ્કર્મ માટે સુરક્ષિત હોટેલ શોધી આપવામાં મદદ કરતો હતો.

• મોહમ્મદ તાબીશ પઠાણ: મુખ્ય આરોપીનો સગો ભાઈ, જેણે ગુનાની જાણ હોવા છતાં સાજીદને પોલીસથી બચાવવા વાહનની વ્યવસ્થા કરી નાસી છૂટવામાં મદદ કરી હતી.

• જામીર રાજા શેખ: તેણે આરોપીને છુપાવવા માટે જગ્યા આપી અને પોલીસની હિલચાલ અંગે અપડેટ્સ આપ્યા હતા.

બિહાર ભાગી છૂટે તે પહેલા જ પોલીસની તવાઈ

જ્યારે સગીરાના પરિવારને આ અત્યાચારની જાણ થઈ, ત્યારે તેઓએ તુરંત ઈચ્છાપોર પોલીસ સ્ટેશનમાં ફરિયાદ નોંધાવી હતી. પી.આઈ. એ.સી. ગોહિલ અને તેમની ટીમે ટેકનિકલ સર્વેલન્સની મદદથી ઓપરેશન હાથ ધર્યું હતું. આરોપી સાજીદ ધરપકડના ડરથી ટ્રેન પકડી બિહાર ભાગી જવાની ફિરાકમાં હતો, પરંતુ પોલીસે નાકાબંધી કરી તેને રવિવારે દબોચી લીધો હતો. હાલ તમામ પાંચેય આરોપીઓને કોર્ટમાં રજૂ કરી 4 દિવસના રિમાન્ડ મેળવવામાં આવ્યા છે.

પોલીસની કડક કાર્યવાહી અને જાગૃતિની અપીલ

પોલીસે આ કેસમાં પોક્સો (POCSO), દુષ્કર્મ, છેતરપિંડી અને આઈટી એક્ટ હેઠળ ગુનો નોંધ્યો છે. એડિટિંગ એપ દ્વારા સરકારી દસ્તાવેજમાં છેડછાડ કરવી એ રાષ્ટ્રીય સુરક્ષા માટે પણ ખતરો છે, જે દિશામાં પોલીસ ઊંડી તપાસ કરી રહી છે. પીઆઈ ગોહિલે વાલીઓને અપીલ કરી છે કે સોશિયલ મીડિયા પર અજાણી વ્યક્તિઓ સાથે મિત્રતા કરતા પહેલા સાવચેતી રાખે.