સુરત: પાલનપુરમાં સ્પાની આડમાં કૂટણખાનું ઝડપાયું

સુરત શહેરના પાલનપુર વિસ્તારમાં લલનાઓના નામે દેહવ્યાપાર ચલાવતા એક સ્પા સેન્ટર પર પોલીસે દરોડો પાડી મોટા રેકેટનો પર્દાફાશ કર્યો છે. રાજ વર્લ્ડ શોપિંગ સેન્ટરમાં ચાલી રહેલા આ અનૈતિક વ્યવસાયમાં પોલીસે ત્રણ ગ્રાહકો અને બે સંચાલકો સહિત પાંચ લોકોની અટકાયત કરી છે, જ્યારે ચાર પીડિત મહિલાઓને નરક જેવી સ્થિતિમાંથી મુક્ત કરાવી છે.

CCTV અને વોચમેન દ્વારા રખાતી હતી નજર : 

પોલીસ તપાસમાં સામે આવ્યું છે કે સ્પાના સંચાલકો અત્યંત શાતિર હતા. પોલીસની હિલચાલ પર નજર રાખવા માટે સ્પાની અંદર અને બહાર ત્રણ સીસીટીવી કેમેરા લગાવવામાં આવ્યા હતા. આ ઉપરાંત, લોબીમાં એક યુવકને ખાસ વોચ રાખવા માટે ઊભો રાખવામાં આવતો હતો જેથી પોલીસના આગમનની જાણ અગાઉથી કરી શકાય. પોલીસે સ્થળ પરથી ડીવીઆર (DVR) પણ કબ્જે કર્યું છે.

ડાયરીઓ અને મોબાઈલ ફોનમાંથી ખુલ્યા રહસ્યો :

દરોડા દરમિયાન પોલીસને કાઉન્ટર પરથી 5 ડાયરીઓ મળી આવી છે, જેમાં ગ્રાહકોના હિસાબ અને મહિલાઓના નામ લખેલા હતા. આ ઉપરાંત 11 મોબાઈલ ફોન પણ જપ્ત કરાયા છે, જેનો ઉપયોગ ગ્રાહકોને યુવતીઓના ફોટા મોકલવા માટે થતો હતો. પોલીસને સ્થળ પરથી 39 કલરફુલ ટોકન્સ અને રોકડ રકમ પણ મળી આવી છે, જે દેહવ્યાપારના વહીવટના પુરાવા આપે છે.

ઝડપાયેલા આરોપીઓ અને ફરાર માલિક : 

પોલીસે સ્થળ પરથી મેનેજર શુદ્રો બાબુરાવ ચક્રબોર્તી અને વોચ રાખનાર વિપિન શાહુની ધરપકડ કરી છે. આ સાથે જ ગ્રાહક તરીકે આવેલા કરણ શાહ, વીરસિંગ કોળી અને ઉમેશ શર્માને પણ ઝડપી પાડવામાં આવ્યા છે. જોકે, સ્પાનો મુખ્ય માલિક આકાશ ધનાવડે હજુ પોલીસ પકડથી દૂર છે.

કડક કાયદાકીય કાર્યવાહી : 

આ સમગ્ર મામલે અડાજણ પોલીસે 'ધી ઇમોરલ ટ્રાફિક પ્રિવેન્શન એક્ટ' (ITPA) અને ભારતીય ન્યાય સંહિતાની વિવિધ કલમો હેઠળ ગુનો દાખલ કર્યો છે. હાલ પોલીસ ફરાર માલિકને પકડવા માટે અલગ-અલગ દિશામાં તપાસ ચલાવી રહી છે.