ગુજરાતમાં સ્કૂલ-કોર્ટને બોમ્બથી ઉડાવી દેવાની ધમકી બાદ હવે વિધાનસભાને બોમ્બથી ઉડાવી દેવાની ધમકી મળી છે. ઇમેઈલ દ્વારા ગુજરાત વિધાનસભાને બોમ્બથી ઉડાવી દેવાની ધમકી મળી હતી. બોમ્બની ધમકીને પગલે વિધાનસભા પરિસરને ખાલી કરાવીને ડૉગ સ્કવોર્ડ-બોમ્બ સ્કવોર્ડ દ્વારા સઘન તપાસ હાથ ધરવામાં આવી હતી.

ગુજરાત વિધાનસભા બોમ્બથી ઉડાવી દેવાની ધમકી મળતાં સુરક્ષા તંત્રમાં ખળભળાટ મચી ગયો હતો. અજાણ્યા શખ્સ દ્વારા ઈમેઈલ મારફતે ધમકી મોકલવામાં આવી હતી. ઈમેઈલ મળતાં વિધાનસભા સચિવે તાત્કાલિક પોલીસ અને સુરક્ષા એજન્સીઓને જાણ કરી હતી. સંદેશાની ગંભીરતા ધ્યાનમાં રાખીને કોઈપણ પ્રકારનું જોખમ ન લેવા માટે તાત્કાલિક કાર્યવાહી શરૂ કરવામાં આવી હતી.

ધમકી મળ્યા બાદ સૌથી પહેલું પગલું તરીકે વિધાનસભા પરિસર ખાલી કરાવવામાં આવ્યું હતું. હાજર અધિકારીઓ, સ્ટાફ તેમજ અન્ય લોકોને સુરક્ષિત બહાર કાઢવામાં આવ્યા હતા. પરિસરમાં પ્રવેશ અને બહાર નીકળવાના તમામ માર્ગોને સીલ કરી દેવામાં આવ્યા હતા.

દરમિયાન શહેર પોલીસ, ATS, બોમ્બ સ્ક્વોડ અને ડોગ સ્ક્વોડની ટીમો તાત્કાલિક સ્થળ પર પહોંચી ગઈ હતી. સમગ્ર વિધાનસભા બિલ્ડિંગ, પાર્કિંગ વિસ્તાર, આસપાસના માર્ગો તેમજ સંવેદનશીલ ઝોનમાં સઘન સર્ચ ઓપરેશન હાથ ધરાયું હતું. દરેક વાહન અને વ્યક્તિની પણ ચકાસણી કરવામાં આવી રહી હતી.

ગાંધીનગર એસપી રવિ તેજા વાસમ શેટ્ટીએ જણાવ્યું કે, "સવારે 8 વાગ્યે વિધાનસભાના મેઇલ આઇડી ઉપર મેઇલ આવ્યો હતો. આ મેઇલની તપાસ ચાલી રહી છે. ગુનો દાખલ કરવામાં આવશે. આજે બપોરે 2 વાગ્યે બ્લાસ્ટ કરવાની ધમકી મળી હતી. અંગ્રેજીમાં મેઇલ કરવામાં આવ્યો હતો અને આતંકવાદ સાથેના કનેક્શન બાબતે પણ તપાસ કરવામાં આવશે."

સલામતી શાખાના DYSP પી.એન.વાંદાએ ઘટનાની પૃષ્ટિ કરતાં જણાવ્યું કે, વિધાનસભાને બોમ્બથી ઉડાવવાની ધમકી ઈમેઈલ મારફતે મળી છે. તેને ગંભીરતાથી લઈ તાત્કાલિક પરિસર ખાલી કરાવાયું છે અને બોમ્બ સ્ક્વોડ તેમજ ડોગ સ્ક્વોડ દ્વારા સર્ચ ઓપરેશન હાથ ધરાયું છે. હાલ સુધી કોઈ શંકાસ્પદ વસ્તુ મળી આવી નથી. પરંતુ સંપૂર્ણ ખાતરી થયા બાદ આગળની કાર્યવાહી કરવામાં આવશે.

તેમણે વધુમાં જણાવ્યું કે, ઈમેઈલ ક્યાંથી મોકલાયો છે અને પાછળ કોણ છે તે જાણવા માટે સાયબર ક્રાઇમ સેલને તપાસ સોંપવામાં આવી છે. ટેકનિકલ એનાલિસિસ દ્વારા ઈમેલના આઈપી એડ્રેસ અને ઓરિજિન ટ્રેસ કરવાની પ્રક્રિયા ચાલી રહી છે. આ માત્ર ખોટી અફવા કે મજાક છે કે પછી કોઈ મોટું કાવતરું છે તે અંગે પણ તપાસ કરવામાં આવી રહી છે. અગાઉ પણ આવા ધમકીભર્યા ઈમેલના બનાવો સામે આવ્યા છે. પરંતુ દરેક વખતે સુરક્ષા એજન્સીઓ કોઈ જોખમ લેતી નથી.

હાલમાં પરિસ્થિતિ કાબૂમાં હોવાનું કહેવામાં આવી રહ્યું છે. પરંતુ વિધાનસભા અને આસપાસના વિસ્તારમાં પોલીસનો કડક બંદોબસ્ત ગોઠવવામાં આવ્યો છે. સામાન્ય જનતાને અફવાઓથી દૂર રહેવા અને કોઈ શંકાસ્પદ પ્રવૃત્તિ જણાય તો તાત્કાલિક પોલીસને જાણ કરવા અપીલ કરવામાં આવી છે.

મુન્દ્રા પોર્ટને પણ બોમ્બથી ઉડાવી દેવાની ધમકી મળી

ગુજરાત વિધાનસભા બાદ મુન્દ્રા પોર્ટને બોમ્બથી ઉડાવી દેવાની ધમકી મળી હતી. મિસાઈલ અને બોમ્બથી હુમલો કરવાની ધમકી મળતાં સુરક્ષા એજન્સીઓ સતર્ક બની હતી. મુન્દ્રા પોર્ટ પર LPG ટેન્કરને નષ્ટ કરવાની પણ ધમકી આપવામાં આવી હતી. એક જ દિવસમાં વિધાનસભા, મુંદ્રા પોર્ટ અને સ્કૂલોને બોમ્બથી ઉડાવી દેવાની ધમકી મળતાં લોકોમાં ચર્ચાનો વિષય બન્યો હતો.

અમદાવાદની ચાર સ્કૂલોને પણ ધમકી મળી

ગુજરાત વિધાનસભા બાદ સવારે અમદાવાદની શાળાઓને ધમકીભર્યો મેઈલ મળ્યો છે. ડીપીએસ-બોપલ, કેલોરેક્સ-હીરાપુર, એકલવ્ય સ્કૂલ, અને AIS સ્કૂલને ધમકી આપવામાં આવી છે. આ ધમકીના પગલે પોલીસે તપાસ શરૂ કરી છે. બોર્ડની પરીક્ષાના છેલ્લા દિવસે સ્કૂલને ધમકી મળી છે. આજે 12 આર્ટ્સમાં ઇતિહાસનું અને ધો.10માં સામાજિક વિજ્ઞાનનું પેપર હતું. જેના કારણે શાળાઓએ પોલીસ કંટ્રોલ રૂમને જાણ કરતાં બોમ્બ અને ડોગ સ્કવોડ દોડી ગઈ હતી.

ઈ-મેઈલમાં શું લખ્યું છે?

ઈ-મેઈલમાં લખ્યું છે કે, ગુજરાત બોલેગા ખાલિસ્તાન. અમદાવાદની સ્કૂલોમાં બપોરે 1.11 વાગ્યે બોમ્બ બ્લાસ્ટ થશે. તમારા બાળકોને બચાવી લેજો. અમદાવાદ-ગાંધીનગરની સ્કૂલોમાં IED બ્લાસ્ટ કરવામાં આવશે. વિધાનસભા(વિઠ્ઠલભાઈ પટેલ ભવન)માં 2.11 વાગ્યે બ્લાસ્ટ કરવામાં આવશે. CM પટેલ ખાલિસ્તાન રેફરેન્ડમ દે સપોર્ટ વીચ રિઝોલ્યુશન નહીંતર પટેલ ભવન ઉડાવી દઈશું. ગુજરાતી હિન્દુ ચરમપંથી મોદી-શાહ-CM પટેલ.

ઈમેઈલ કેવી રીતે મોકલે છે?

સાયબર ગુનેગારો આવા ધમકીભર્યા ઈમેઈલ મોકલવા માટે અનેક તરકીબો અપનાવે છે. સામાન્ય રીતે ગુપ્ત ઈમેઈલ સેવાઓનો ઉપયોગ કરે છે. જેમ કે પ્રોટોનમેઈલ અથવા ટેમ્પરરી ઈમેઈલ સર્વિસ. આ સેવાઓમાં તેઓ ખોટા નામ અને વિગતોનો ઉપયોગ કરીને એકાઉન્ટ બનાવે છે. જેથી તેઓની ઓળખ છુપાયેલી રહે.

તેઓ વર્ચ્યુઅલ પ્રાઇવેટ નેટવર્ક અથવા ટોર બ્રાઉઝરનો ઉપયોગ કરીને તેમના આઈપી એડ્રેસને છુપાવે છે. આઈપી એડ્રેસ ડિવાઇસનું ઓનલાઇન સરનામું હોય છે. જે સ્થાન અને ઓળખ અંગે જણાવે છે. સાયબર ગુનેગારો વર્ચ્યુઅલ પ્રાઇવેટ નેટવર્કનો ઉપયોગ તેમની ઓળખ તેમજ આઈપી એડ્રેસ છુપાવવા, ઓનલાઇન પ્રવૃત્તિઓને અજ્ઞાત રાખવા અને કાયદાકીય સંસ્થાઓથી બચવા માટે કરે છે. કેટલાક ગુનેગારો ઈમેઈલ સ્પૂફિંગનો ઉપયોગ કરે છે.

સાયબર ગુનેગારોને કેવી રીતે શોધી કાઢવામાં આવે છે?

સાયબર અપરાધીઓને ટ્રેસ કરવા માટે પોલીસનું સાયબર ક્રાઇમ યુનિટ કામ કરે છે. પહેલા તેઓ ઈમેઈલના હેડર્સનું વિશ્લેષણ કરે છે. ઈમેઈલ હેડર્સમાં મોકલનારના આઈપી એડ્રેસ, તારીખ અને અન્ય વિગતો હોય છે. જો વીપીએન વપરાયું હોય તો પણ વીપીએન પ્રોવાઇડર પાસેથી માહિતી મેળવી શકાય છે. પોલીસ ઈમેઈલ પ્રોવાઇડર (જેમ કે ગૂગલ અથવા પ્રોટોન)ને કાનૂની રીતે માહિતી માંગે છે.

તેઓ એકાઉન્ટની વિગતો, લોગઇન આઈપી અને અન્ય ડેટા મેળવે છે. અપરાધી વિદેશમાં હોય તો ઇન્ટરપોલ જેવી આંતરરાષ્ટ્રીય સંસ્થાઓની મદદ લેવામાં આવે છે. ડિજિટલ ફોરેન્સિકમાં કોમ્પ્યુટર અને મોબાઇલનું વિશ્લેષણ કરી પુરાવા શોધવામાં આવે છે. કેટલાક કેસમાં ગુનેગારોની ભૂલો જેમ કે એક જ આઈપીનો વારંવાર ઉપયોગ તેમને પકડાવી દે છે.

March 18, 2026 | 12:36 IST