બદલો કે સ્વમાન માટે ખૂન, પોલીસ તપાસે રુવાડા ઉભા કરી દેતા ખૂની ખેલને ખુલ્લો પાડ્યો

ગીર સોમનાથઃ શુક્રવાર, છઠ્ઠી સપ્ટેમ્બર, સાંજના સાત કલાકે, ઉમરેઠી ગામનો સુરેશ જાદવ તેના એક્ટિવા પર તલાલા જવા નીકળ્યો હતો. તે એકદમ રોમેન્ટિક મૂડમાં હતો, કારણ કે તેના ઇન્સ્ટાગ્રામ પર નવી નવી બનેલી બહેપણી રૂબરૂ મળવા બોલાવ્યો હતો.

તેનું એક્ટિવા ઘુસિયા ગામની ઇમાન પીર દરગાહ નજીક પહોંચ્યું ને અચાનક એક બોલેરો પીકઅપ વાન એક્ટિવાને જોરદાર ટક્કર મારી, સુરેશ હવામાં ફંગોળાઈ ને જમીન પર પટકાઈ છે. લોહીથી લથબથ સુરેશને સ્થાનીક ગ્રામજનો તલાલા હોસ્પિટલ લઇ જાય છે, જ્યાં ડોક્ટર તેને મૃત જાહેર કરે છે.

બીજી બાજુ બોલેરો પીકઅપ વાન ચાલક પૂર પાટ ઝડપે વાહન રાજકોટની દિશામાં હંકારી જાય છે.

તલાલા પોલીસે, પ્રાથમિક માહિતીના આધારે અકસ્માતે મોતનો ગુન્હો નોંધી તપાસ હાથ ધરી છે. ઘટના સ્થળની તપાસ અને થોડા કિલોમીટરના અંતરે બિનવારસી રીતે તરછોડાયેલી પીકઅપ વાન તપાસનીસ અધિકારીઓ શંકા ઉપજાવે છે કે આ સામાન્ય અકસ્માત નથી, પરંતુ કંઈક જુદુ છે, અને તપાસ આગળ વધારે છે. બોલેરો પીકઅપ વાન ના માલિકને શોધી તેનું નિવેદન નોંધતા, ખૂન પરથી પડદો ઉઠે છે.

ગીર-સોમનાથના સુપ્રિટેન્ડેન્ટ ઓફ પોલીસ મનોહરસિંહ જાડેજા પત્રકારોને માહિતી આપી બધાને ચોંકાવી દીધા. જાડેજાએ કહ્યું કે  મૃતક સુરેશ પર ભૂતકાળમાં પોક્સોના કાયદા નીચે ફરિયાદ થઇ છે, સુરેશ અને સગીર આરોપી બન્ને એક જ ગામના છે, સુરેશ મુખ્ય આરોપીની બહેનને પરેશાન કરતો હતો, તેના કારણે બંનેના પરિવાર વચ્ચે કજીયા પણ થયાં છે. આ વાતનું વેર રાખી મુખ્ય આરોપી સુરેશ નું ખૂન કરવાની વ્યૂહરચના ઘડી, જેમાં મુખ્ય આરોપીના સગીર મિત્ર અને તેની બહેનપણીએ સાથ આપ્યો હતો.

આ ખૂનની વ્યુરચના વિશે વાત કરતાં, પોલીસ અધિકારીએ કહ્યું કે મુખ્ય આરોપીની બહેનપણીએ સુરેશનો પ્રથમ ઇન્સ્ટાગ્રામ પર સંપર્ક કરી મિત્રતા કેળવી, ત્યારબાદ, સુરેશ અને છોકરી વચ્ચે વોટ્સએપ ચેટ શરૂ થાય છે. રક્ષાબંધનના દિવસે આરોપીઓએ સુરેશના ખૂનનો પ્લાન ઘડી કાઢ્યો, તે મુજબ, છોકરી સુરેશના શુક્રવારે સાંજે મળવા માટે તલાલા બોલાવે છે.

સુરેશ તેના એક્ટિવા પર મળવા નિકળે, તે ક્યાં પહોચ્યો તેનું સાચું લોકેશન જાણવા, આરોપી છોકરી પાસે વિડિયો કોલ કરાવે છે. જ્યારે સુરેશ ઘુસિયા ગામ નજીક પહોંચે તેને બોલેરો કચડી નાખવા માટે પાછળથી ટક્કર મારવામાં આવે છે.

પોલીસ ત્રણેય આરોપીઓની ધરપકડ કરી, અક્સમાતે મુત્યુના ગુનામાં ભારતીય ન્યાય સંહિતાના ખૂનની કલમ ઉમેરવામાં આવી છે.