કચ્છના ભુજ શહેરમાં પોલીસકર્મી પતિ દ્વારા તેની પત્નીને સળગાવવાનો ગંભીર પ્રયાસ કરવામાં આવ્યો હોવાનો ચોંકાવનારો બનાવ સામે આવ્યો છે. ભુજના એરપોર્ટ રોડ પર આવેલા ૩૬ ક્વાર્ટર પોલીસ લાઇનમાં આ ઘટના બની હતી.
મળતી માહિતી મુજબ, પતિ-પત્ની વચ્ચે કોઈ બાબતે ઝઘડો થયો હતો. આ ઝઘડાએ ઉગ્ર સ્વરૂપ ધારણ કરતા પતિએ પત્ની પર પેટ્રોલ છાંટીને તેને જીવતી સળગાવવાનો પ્રયાસ કર્યો હતો.
હત્યાનો પ્રયાસ કરનાર આરોપી પતિ પણ કચ્છમાં કોન્સ્ટેબલ તરીકે ફરજ બજાવે છે. આ બનાવ અંગે ભુજ એ ડિવિઝન પોલીસ સ્ટેશનમાં આરોપી પતિ વિરુદ્ધ હત્યાના પ્રયાસ (IPC) અને એટ્રોસિટી એક્ટ હેઠળ ગંભીર ગુનો દાખલ કરવામાં આવ્યો છે. પોલીસે ગુનો નોંધીને વધુ તપાસ હાથ ધરી છે.
પ્રેમ સંબંધ બાદ લગ્ન અને વિવાદ : 
આ કેસની વિગતો અનુસાર, ફરિયાદી કિરણ અને આરોપી અલ્ફાઝ ઇકબાલ પંજાનો પરિચય અમદાવાદમાં રથયાત્રાના બંદોબસ્ત સમયે થયો હતો. અલ્ફાઝ ગઢશીશા પોલીસ સ્ટેશનમાં લોકરક્ષક પોલીસ કોન્સ્ટેબલ તરીકે ફરજ બજાવતો હતો. આ પરિચય પ્રેમમાં પરિણમ્યો હતો અને બંનેએ અમરેલી ખાતે સ્પેશિયલ મેરેજ એક્ટ હેઠળ લગ્ન કર્યા હતા.
કિરણ નલિયાની રહેવાસી હોવાથી અલ્ફાઝ અવારનવાર નલિયા આવતો રહેતો, જ્યારે કિરણ પણ ગઢશીશામાં પતિને મળવા જતી હતી. હાલમાં, કિરણ તેની માતાની ઘૂંટણની સારવાર માટે ભુજ આવેલી હતી અને તેની બહેનપણીના ૩૬ ક્વાર્ટરના મકાનમાં રહેતી હતી, જ્યાં આ દુર્ઘટના બની હતી.

ભુજ પોલીસકર્મી પત્ની હુમલો

ભુજના 36 ક્વાર્ટર પોલીસ લાઇનમાં કોન્સ્ટેબલ પતિએ પત્નીને જીવતી સળગાવવાનો પ્રયાસ કર્યો

November 27, 2025 | 14:21 IST