જસદણમાં 6 વર્ષની બાળકી પર દુષ્કર્મનો પ્રયાસ

રાજકોટ જિલ્લાના જસદણ તાલુકાના આટકોટ નજીક એક અત્યંત શરમજનક અને ક્રૂર ઘટના સામે આવી છે, જેણે દિલ્હીના નિર્ભયા કાંડની યાદ અપાવી દીધી છે. આટકોટ પોલીસ મથક હેઠળના એક ગામ નજીકની વાડીમાં ખેતમજૂરી કરતા દાહોદ પંથકના એક શ્રમિક પરિવારની 6 વર્ષ અને 8 માસની માસૂમ બાળકી પર આ ઘૃણાસ્પદ કૃત્ય આચરવામાં આવ્યું છે. ગત 4 ડિસેમ્બરના રોજ જ્યારે પરિવાર વાડીમાં કામ કરી રહ્યો હતો અને બાળકી રમી રહી હતી, ત્યારે એક અજાણ્યા શખ્સે તેને ઉપાડી જઈ અત્યાચાર ગુજાર્યો હતો. આ ઘટનાથી સમગ્ર પંથકમાં ભય અને આક્રોશની લાગણી ફેલાઈ ગઈ છે.

ધારદાર હથિયારથી ઘાતક હુમલો

પ્રાપ્ત માહિતી મુજબ, આરોપીએ બાળકીનું મોઢું દબાવીને તેની સાથે દુષ્કર્મનો પ્રયાસ કર્યો હતો. જોકે, આ પ્રયાસમાં સફળ ન થતાં અને બાળકીએ બુમાબુમ કરતાં, નરાધમે ક્રૂરતાની હદ વટાવી દીધી હતી. તેણે બાળકીના ગુપ્તાંગમાં સળિયા જેવું ધારદાર હથિયાર ઘુસાડી દીધું હતું, જેના કારણે બાળકી ગંભીર રીતે લોહીલુહાણ થઈ ગઈ હતી. આ કૃત્યને અંજામ આપીને આરોપી બાળકીને ત્યાં જ છોડીને ફરાર થઈ ગયો હતો. ગંભીર હાલતમાં મળેલી બાળકીને તાત્કાલિક રાજકોટની જનાના હોસ્પિટલમાં સારવાર માટે ખસેડવામાં આવી છે, જ્યાં તેની સઘન સારવાર ચાલી રહી છે.

પોલીસે આરોપીની કરી ધરપકડ

આ સંવેદનશીલ ઘટનાની જાણ થતાં જ આટકોટ પોલીસ અને રાજકોટ ગ્રામ્ય પોલીસ એક્શનમાં આવી હતી. રાજકોટ ગ્રામ્ય SP વિજયસિંહ ગુર્જરના નેતૃત્વ હેઠળ પોલીસે 10 જેટલી ટીમો બનાવીને આરોપીની શોધખોળ શરૂ કરી હતી. પોલીસ ટીમે વિસ્તારમાં 100 જેટલા શકમંદોની સઘન પૂછપરછ કરી હતી. ત્યારબાદ, 10 જેટલા મુખ્ય શકમંદોને ચાઈલ્ડ એક્સપર્ટની હાજરીમાં બાળકી સમક્ષ રજૂ કરવામાં આવ્યા હતા.

સંતાનમાં એક દીકરી અને બે દીકરાનો પિતા

આ ઓળખ પરેડમાં બાળકીએ મુખ્ય આરોપી રામસીંગ તેરસીંગની ઓળખ કરી હતી, અને તેની ધરપકડ કરવામાં આવી છે. આરોપી મધ્ય પ્રદેશના અલીરાજપુરનો રહેવાસી છે અને આટકોટમાં ભાગીયા તરીકે કામ કરતો હતો. ચોંકાવનારી વાત એ છે કે, આરોપી રામસીંગ પરણિત છે અને સંતાનમાં એક દીકરી અને બે દીકરાનો પિતા છે. પોલીસ દ્વારા ગુનો નોંધીને કાયદેસરની કાર્યવાહી હાથ ધરવામાં આવી છે.