છોટાઉદેપુરમાં પ્રેમીએ જ પ્રેમીની હત્યા કરી

છોટાઉદેપુર જિલ્લાના ક્વાંટના જામલીમાં સમલૈંગિક સંબંધમાં થયેલા ઝઘડામાં પ્રેમી યુવકે પોતાના જ પ્રેમીની હત્યા કરી દેતાં સનસનાટી મચી ગઇ હતી. 

પોલીસ સુત્રો પાસેથી મળેલી માહિતી મુજબ છોટાઉદેપુરના રાયસીંગપુરા ગામના પરિણીત યુવકને એક યુવક સાથે સમલૈગિંક સંબંધ હતો.દરમિયાન  ક્વાંટના જામલી ખાતેથી રાયસિંગપુરાના બનસિંગ ઉર્ફે અંગુભાઇ ખજુરીયાભાઇ રાઠવાની લાશ મળી હતી જેથી પોલીસે તપાસ શરુ કરી હતી. 

પોલીસે સીસી ટીવીના આધારે તપાસ કરતા બનસિંગભાઇની બાઇક પાછળ બેઠેલો શખ્સ સાબુતભાઇ કરશન રાઠવા હોવાનું જાણવા મળ્યું હતું જેથી પોલીસની ટીમ સાબુતભાઇના ઘેર પહોંચી હતી અને તેની અટકાયત કરી પૂછપરછ શરુ કરી હતી. 

પોલીસ પૂછપરછમાં સાબતભાઇએ જણાવ્યું કે તેને બનસિગ સાથે છેલ્લા એક સપ્તાહથી સંબંધ બંધાયો હતો અને ગઇ 13 તારીખે બંને એક જ બાઇક પર બેસીને જામલી ખેતરમાં ગયા હતા. ખેતરમાં બંને વચ્ચે સંબંધના મામલે ઝઘડો થતાં તેણે બનસિંગે પહેરેલા મફલર વડે જ તેનું ગળુ દબાવ્યું હતું અને તેની હત્યા કર્યા બાદ તેનો મોબાઇલ ફોન લઇ સીમ કાર્ડ કાઢી ને તોડી નાખ્યું હતું અને ફોન કોતરમાં નાખી દીધો હતો. પોલીસે આ મામલે સાબુત રાઠવાની ધરકડ કરી તપાસ આદરી હતી.