જબલપુર: કૃષિ યુનિવર્સિટી કેમ્પસમાં ગેંગરેપની ઘટના

શિક્ષણના ધામમાં શર્મસાર ઘટના: જબલપુર કૃષિ યુનિવર્સિટીમાં નોકરીના બહાને યુવતી પર ગેંગરેપ

દેશમાં મહિલા સુરક્ષાના દાવાઓ વચ્ચે મધ્યપ્રદેશના જબલપુરની જાણીતી જવાહરલાલ નહેરુ કૃષિ યુનિવર્સિટીમાંથી અત્યંત ચોંકાવનારી ઘટના સામે આવી છે. અહીં યુનિવર્સિટીના જ બે કર્મચારીઓએ એક ૨૨ વર્ષીય યુવતીને નોકરીની લાલચ આપી જાળમાં ફસાવી અને તેની પર સામૂહિક દુષ્કર્મ આચર્યું હતું. પોલીસે ગુનો નોંધી બંને નરાધમોને જેલના સળિયા પાછળ ધકેલી દીધા છે.

સોશિયલ મીડિયા દ્વારા બિછાવી જાળ : 

આ ઘટના સોશિયલ મીડિયા પર અજાણી લિંક્સ પર વિશ્વાસ કરનારા યુવાનો માટે ચેતવણી સમાન છે. પીડિતાએ ૨૦ દિવસ પહેલા ફેસબુક કે અન્ય પ્લેટફોર્મ પર કોન્ટ્રાક્ટ ભરતીની એક લિંક જોઈ હતી. તેના દ્વારા તે યુનિવર્સિટીના ૫૮ વર્ષીય ક્લાર્ક દુર્ગાશંકર સિંગ્રહાના સંપર્કમાં આવી હતી. આરોપી ક્લાર્કે પોતાનો વગ વાઈસ ચાન્સેલર સુધી હોવાનો દાવો કરી યુવતીને નોકરી અપાવવાનો ભરોસો આપ્યો હતો.

રજાના દિવસે ક્વાર્ટરમાં બોલાવી આચર્યું કૃત્ય : 

૨૫મી ડિસેમ્બરના રોજ નાતાલની રજા હોવાથી કેમ્પસમાં શાંતિ હતી. આ તકનો લાભ ઉઠાવી આરોપી ક્લાર્કે યુવતીને ઇન્ટરવ્યુના બહાને કૃષિ નગર કોલોનીમાં બોલાવી હતી. ત્યાંથી તે યુવતીને પટાવાળા મુકેશ સેનના ક્વાર્ટર પર લઈ ગયો હતો. આ બંધ ક્વાર્ટરમાં બંનેએ મળીને યુવતીની લાચારીનો ફાયદો ઉઠાવી દુષ્કર્મ આચર્યું હતું.

પોલીસની ત્વરિત કાર્યવાહી અને સંદેશ : 

પીડિતાએ હિંમત દાખવી આદરતાલ પોલીસ મથકે ફરિયાદ નોંધાવતા પોલીસ એક્શનમાં આવી હતી. પોલીસે દરોડા પાડી ક્લાર્ક અને પટાવાળાની તેમના નિવાસસ્થાનેથી ધરપકડ કરી છે. કોર્ટે બંનેને જેલ હવાલે કર્યા છે.

આ કિસ્સા બાદ પોલીસ તંત્રએ લોકોને ખાસ અપીલ કરી છે કે સોશિયલ મીડિયા પર આવતી નોકરીની જાહેરાતોની સત્તાવાર ખરાઈ કરવી. કોઈપણ ઇન્ટરવ્યુ માટે ખાનગી નિવાસસ્થાને જવાનું ટાળવું અને હંમેશા ઓફિસના સમય દરમિયાન સત્તાવાર કચેરીનો જ સંપર્ક કરવો.