ઈસ્કોન બ્રિજ કેસ: તથ્ય પટેલને રાહત નહીં

અમદાવાદના ઈસ્કોન બ્રિજ અકસ્માત કેસમાં મુખ્ય આરોપી તથ્ય પટેલને લઈને ગુજરાત હાઈકોર્ટે મહત્વપૂર્ણ નિર્ણય આપ્યો છે. 9 લોકોના જીવ લેનારા ગંભીર અકસ્માત મામલે તથ્ય પટેલ સામે લાગેલી સાપરાધ માનવવધની કલમ હટાવવા હાઈકોર્ટે સ્પષ્ટ ઈનકાર કર્યો છે. જોકે, આ કેસમાં તેના પિતા પ્રજ્ઞેશ પટેલને આ કલમમાંથી મુક્તિ આપવામાં આવી છે.

તથ્ય પટેલ અને તેના પિતા સામે IPC 279, 337, 338, 304, 308 તેમજ મોટર વાહન અધિનિયમ હેઠળ ગુનો નોંધાયો હતો. IPC 304 અને 308માંથી મુક્તિ મેળવવા માટે અગાઉ અમદાવાદ ગ્રામ્ય કોર્ટમાં અરજી કરાઈ હતી, પરંતુ તે નામંજૂર થતા બંનેએ ગુજરાત હાઈકોર્ટમાં રિવિઝન અરજી દાખલ કરી હતી.

લંબિત સુનાવણી બાદ હાઈકોર્ટે તથ્ય પટેલ અંગે ગંભીર ટિપ્પણી કરી અને જણાવ્યું કે, કેસમાં ઉપલબ્ધ પુરાવાઓના આધારે માનવવધની કલમ દૂર કરી શકાતી નથી. પરિણામે, તથ્ય પટેલને આ કલમ હેઠળ દોષિત ઠરાવવામાં આવે તો કાયદેસર 10 વર્ષ સુધીની કેદની સંભાવના છે.

અકસ્માતની વિગતો:

19 જુલાઈ 2023ની રાત્રે તથ્ય પટેલે ઈસ્કોન બ્રિજ પર ઝડપી ગતિએ જગુઆર કાર ચલાવી ભયાનક અકસ્માત સર્જ્યો હતો. આ ઘટનામાં 9 લોકોના સ્થળ પર જ મોત થયા હતા, જ્યારે 13થી વધુ લોકો ગંભીર રીતે ઈજાગ્રસ્ત બન્યા હતા. આ કેસે રાજ્યભરમાં ભારે ચકચાર જગાવી હતી.