બનાસકાંઠાના સરહદી વિસ્તાર વાવમાંથી આંતરરાષ્ટ્રીય કોલ સેન્ટર ઝડપાયું

પાકિસ્તાન બોર્ડર પર બનાસકાંઠાના વાવ તાલુકાના દીપાસરા ગામમાં છ માસથી ભાડાના મકાનમાં ચાલતું ગેરકાયદે આંતરરાષ્ટ્રીય કોલ સેન્ટર ઝડપાયુ છે. ભુજ રેન્જ આઈજી અને સાયબર સેલની ટીમે સંયુક્ત રીતે રેડ પાડી આંતર રાજ્યોના 16 યુવક-યુવતીઓને ઝડપી પાડ્યા હતા. જ્યારે મુખ્ય સૂત્રધાર અમદાવાદના સ્વપ્નિલ ઉર્ફે સેમ પટેલને પકડવા પોલીસે કવાયત હાથ ધરી છે.  આ કોલ સેન્ટર ચાલતુ હતુ તે મકાન કોઈ રાજકીય વ્યક્તિનું હોવાનું મનાઈ રહ્યુ છે.

વાવ તાલુકાના દીપાસરા ગામમાં મકાન ભાડે રાખી પરપ્રાંતિય શખ્સો આંતરરાષ્ટ્રીય કોલ સેન્ટર ખોલી ગેરકાયદે પ્રવૃત્તિ કરતા હતા. છ માસથી કોલ સેન્ટર ચાલતું હોવાની પોલીસને બાતમી મળી હતી. આ બાતમીના આધારે ભુજ રેન્જ આઈજી અને સાયબર સેલની ટીમે સંયુક્ત ઓપરેશન હાથ ધરી દીપાસરા ગામમાં ઓચિંતી રેડ કરી હતી.

રેડ દરમિયાન કોલ સેન્ટર ચલાવી રહેલા અન્ય રાજ્યોના 9 યુવકો અને 7 યુવતીઓ મળી 16 પરપ્રાંતિય વ્યક્તિઓને પકડી લીધા હતા. પોલીસે પકડેલાં ભેજાબાજોની પૂછપરછમાં જાણવા મળ્યુ હતુ કે, સોલાર પેનલનું કામ કરવાના બહાના હેઠળ દીપાસરા વિસ્તારમાં મકાન ભાડે રાખ્યું હતું. ભાડાના મકાનમાં ગેરકાયદે આંતરરાષ્ટ્રીય કોલ સેન્ટર ચલાવતા હતા. આ રેડમાં વાવ પોલીસ પણ જોડાઈ હતી. 

પાકિસ્તાન સરહદ ઉપર અતિ સંવેદનશીલ વિસ્તારમાં અદ્યતન સુવિધાવાળા મકાનમાં કોલ સેન્ટર ચાલી રહ્યુ હતુ. સીસીટીવી કેમેરાથી સજ્જ કોલ સેન્ટરના મકાન ઉપર 5 ટાવર લગાવેલા હોવાથી કોલ સેન્ટરની કામગીરી શંકાના ઘેરામાં આવી ગઈ છે. પોલીસે કોલ સેન્ટરમાંથી 25 લેપટોપ, 30 મોબાઈલ, પ્રિન્ટર, ડેટા કેબલ, કેલક્યુલેટર, રાઉટર, કનેક્શન પોઈન્ટ, ટેબલેટ, રોકડ રકમ સહિત 8.39 લાખનો મુદ્દામાલ કબજે કર્યો છે. જ્યારે કોલ સેન્ટરના મુખ્ય સૂત્રધાર સ્વપ્નિલ ઉર્ફે સેમ પટેલને પકડવા પોલીસે કવાયત હાથ ધરી છે.