હૈદરાબાદમાં આંતરરાજ્ય બાળ તસ્કરીનો પર્દાફાશ

તેલંગાણાના હૈદરાબાદમાં પોલીસે મોટી આંતરરાજ્ય બાળ તસ્કરી ગેંગનો પર્દાફાશ કર્યો છે. ગેંગના 12 સભ્યોની ધરપકડ કરી બે નવજાત શિશુઓને બચાવી લેવામાં આવ્યા છે. આ ગેંગ ગરીબ પરિવારો પાસેથી બાળકો ખરીદીને નિઃસંતાન શ્રીમંત યુગલોને 15 લાખ રૂપિયામાં વેચાણ કરતી હતી. પોલીસે આ કેસમાં વધુ તપાસ હાથ ધરી છે.

મહત્વપૂર્ણ છે કે, અમદાવાદમાંથી એક બાળકની તસ્કરી કરી હૈદરાબાદમાં વેચાણ કરવાનો પ્રયાસ કરાયો હોવાનું તપાસમાં ખુલ્યું છે.

મિયાપુર પોલીસ સ્ટેશન વિસ્તારમાં બાળકોનું વેચાણ કરતાં ત્યારે પોલીસે મુખ્ય આરોપી અને તેના સાથીઓની ધરપકડ કરી હતી. માધાપુર ઝોનના ડીસીપી રિતિરાજે જણાવ્યું કે આ ગેંગમાં આંધ્રપ્રદેશ, તેલંગાણા અને બિહારના વ્યક્તિઓનો સમાવેશ થાય છે. જે બાળ તસ્કરીમાં સંડોવાયેલા છે. આ ગેંગે દેશના વિવિધ વિસ્તારોમાં ગરીબ પરિવારોને ઓળખી કાઢ્યા બાદ બાળકોને ખવડાવવાની મજબૂરીનો લાભ લઈને તેમને ખરીદવા માટે મોટી રકમની લાલચ આપી હતી.

15 લાખ રૂપિયામાં બાળકોનો વેપાર

ગરીબ પરિવારો પાસેથી ખરીદેલા શિશુઓને નિઃસંતાન, શ્રીમંત પરિવારોને પ્રતિ બાળક આશરે 15 લાખ રૂપિયામાં વેચાણ કરવામાં આવ્યા હતા. તપાસમાં બહાર આવ્યું છે કે સમગ્ર પ્રક્રિયા એજન્ટોની મદદથી ગોઠવવામાં આવી હતી. પોલીસે આ કેસના મુખ્ય આરોપી વી. બાબુ રેડ્ડીને IVF એજન્ટ તરીકે ઓળખી કાઢ્યો છે.

અમદાવાદના બાળકને વેચવાનો પ્રયાસ

તાજેતરમાં અમદાવાદથી એક બાળકને એજન્ટ દ્વારા હૈદરાબાદ લાવવામાં આવ્યું હતું. જેમાં તેના જૈવિક માતાપિતાને પૈસા ચૂકવ્યા હતા. બાદમાં બાળકને એક નિઃસંતાન દંપતીને વેચવાનો પ્રયાસ કરવામાં આવ્યો હતો. પોલીસે જણાવ્યું કે, સિદ્દીપેટ જિલ્લાના રામનપેટમાંથી પણ આવી જ રીતે બીજા શિશુની તસ્કરી કરવામાં આવી હતી. પોલીસે બંને શિશુઓને સુરક્ષિત સંભાળ માટે શિશુ વિહારને સોંપવામાં આવ્યા છે. આ ઘટના મામલે ફરિયાદ નોંધીને ગેરકાયદે તસ્કરી નેટવર્કના અન્ય પાસાઓની તપાસ કરવામાં આવી રહી છે.