રાજકોટમાં ચોંકાવનારો બનાવ, પૂર્વ પ્રેમીએ પ્રેમીકાના ચાકૂના ઘા ઝીંક્યા

રાજકોટના જંગલેશ્વર વિસ્તારમાં આજે સવારે ચોંકાવનારો બન્યો છે જેમાં પૂર્વ પ્રેમીએ પૂર્વ પ્રેમીકાને પેટમાં ચાકૂના ઘા ઝીંકીને પોતે પણ આત્મહત્યાનો પ્રયાસ કર્યો હતો. પૂર્વ પ્રેમીકાની સગાઇ અન્ય યુવક સાથે થતાં પૂર્વ પ્રેમીએ ઉશ્કેરાઇને આ પગલું ભર્યું હોવાનું પોલીસની પ્રાથમિક તપાસમાં બહાર આવ્યું છે.ભક્તિનગર પોલીસે પ્રેમી સામે ખૂનની કોશિષ સહિતની કલમો હેઠળ ગુનો નોંધી તપાસ હાથ ધરી છે.

પોલીસ પાસેથી મળેલી માહિતી મુજબ ભારતી સાથરીયા નામની 25 વર્ષની યુવતીના લગ્ન થઇ ગા હતા પણ પાંચ વર્ષ પહેલા તેના છૂટાછેડા પણ થયા હતા. જંગલેશ્વર વિસ્તારમાં રહેતી ભારતીને 5 વર્ષથી સાત હનુમાન પાસે રહેતા સંજય વિનુભાઈ મકવાણા (ઉ.વ. 25) સાથે પ્રેમ સંબંધ બંધાયો હતો. જો કે થોડા સમય પહેલા ભારતીની પરિવારના સભ્યોએ માંગરોળ સગાઇ નક્કી કરી હતી. 

પોતાની પ્રેમીકાની સગાઇની જાણ થતાં જ  પ્રેમી સંજય ઉશ્કેરાઇ ગયો હતો અને અવારનવાર તેને સગાઇ અને લગ્ન નહીં કરવા ધાક ધમકી આપતો હતો. દરમિયાન ભારતી અને તેની બહેન આજે સવારે 11 વાગે મચ્છી વેચવા ગઇ હતી . દરમિયાન તેનો પ્રેમી સંજય બાઇક પર ધસી આવ્યો હતો. આવીને તેણે ભારતીની છાતી, પગના સાથળ, પેની, જમણા હાથમાં છરીના સાતેક ઘા ઝીંકી તેને લોહીલુહાણ કરી નાખી હતી.

ત્યાર પછી સંજયે પોતાના પેટમાં પણ છરીના બે ઘા ઝીંકી આપઘાતનો પ્રયાસ કર્યો હતો.આ બનાવથી લોકોમાં ભારે ગભરાટ ફેલાઇ ગઇ હતી અને બૂમાબૂમ થતાં લોકોનું ટોળુ એકત્ર થઇ ગયું હતું.તત્કાળ બંનેને સિવિલમાં સારવારમાં ખસેડાયા હતાં. જ્યાં તબીબોએ ભારતીની હાલત ગંભીર ગણાવી હતી. ઘટનાની જાણ થતા ભક્તિનગર પોલીસ સ્થળ પર અને હોસ્પિટલ દોડી ગઇ હતી. પોલીસે ભારતીની બહેન રેખાની ફરિયાદ પરથી આરોપી સંજય સામે હત્યાની કોશિષનો ગુનો નોંધ્યો હતો. 

ભારતીના પરિવારજનોએ જણાવ્યું કે ભારતીએ સંજયને તેની સાથે લગ્ન કરશે તેમ કહ્યું હતું. જો કે બાદમાં તેની માંગરોળ સગાઇ નક્કી થતાં સંજય ઉશ્કેરાઇ ગયો હતો. તેણે ભારતી પાસેથી તેના મંગેતરનો નંબર લઇ તેને પણ જાન લઇ આવીશ તો તને પણ મારી નાખીશ તેવી ધમકી આપી હતી. સંજયની સતત ધમકીઓથી ત્રાસીને ભારતીએ તેના વિરૂદ્ધ પોલીસમાં અરજી કરી હતી. જેને કારણે પોલીસે સંજયની અટકાયત પણ કરી હતી. તે વખતે પોલીસે ભારતીના પરિવારજનોને હવે પછી સંજય હેરાનગતિ નહીં કરે તેવી બાંહેધરી પણ આપી હતી.  આમ છતાં આ ઘટના બનતા પરિવારજનોમાં ગભરાટ ફેલાઇ ગયો હતો.