HPZ ટોકન કૌભાંડઃ બે ચીની નાગરિકો સામે કાર્યવાહી

સીબીઆઈએ HPZ ટોકન ઇન્વેસ્ટમેન્ટ છેતરપિંડીના કેસમાં ચાર્જશીટ દાખલ કરી છે. ચીનની માલિકીની અને ચીનથી નિયંત્રિત શિગુ ટેકનોલોજી પ્રા. લિ. કંપનીએ કોવિડ-૧૯ લોકડાઉન દરમિયાન નાગરિકો સાથે છેતરપિંડી કરી હતી. આરોપીઓએ "HPZ ટોકન્સ" નામની નકલી મોબાઇલ એપ્લિકેશન શરૂ કરી રોકાણનો ઉપયોગ ક્રિપ્ટોકરન્સી માઇનિંગ માટે કરી ખૂબ જ ઊંચું વળતર આપવાનો દાવો કર્યો હતો. માત્ર ત્રણ મહિનામાં કરોડો રૂપિયા ઉઘરાવી ચીનમાં ડાયવર્ટ કર્યા હતા.

સીબીઆઈની તપાસમાં જાણવા મળ્યું કે, વિદેશી નાગરિકો દ્વારા સંચાલિત આ ઘટના સંગઠિત સાયબર ક્રાઇમ નેટવર્કનો ભાગ હતી. આ સિન્ડિકેટ કોરોનાકાળ પછી લોન એપ, નકલી રોકાણ એપ્લિકેશન્સ અને બોગસ ઓનલાઈન નોકરીની ઓફર આપતા પ્લેટફોર્મનો ઉપયોગ કરીને ભારતીય નાગરિકોને નિશાન બનાવ્યા હતા.

સીબીઆઈએ શરૂઆતમાં ડોર્ટસે, રજની કોહલી, સુશાંત બેહરા, અભિષેક, મોહમ્મદ ઈમદાદ હુસૈન અને રજત જૈન નામના 6 શખ્સોની ધરપકડ કરી હતી. હવે 30 આરોપીઓ સામે ચાર્જશીટ દાખલ કરી છે. જેમાં બે ચીની નાગરિકો વાન જુન અને લી એનમિંગનો સમાવેશ થાય છે.  જેમણે આ છેતરપિંડી કેસમાં મુખ્ય ભૂમિકા ભજવી છે.

વાન જુન, જિલિયન કન્સલ્ટન્ટ્સ ઈન્ડિયા પ્રાઈવેટ લિમિટેડનો ડિરેક્ટર હતો. જે ચીની એન્ટિટી જિલિયન કન્સલ્ટન્ટ્સની પેટા કંપની હતી. વાન જુને એક ડોર્ટસેની મદદથી શિગુ ટેક્નોલોજીસ સહિત અનેક શેલ કંપનીઓ બનાવી હતી. તપાસમાં બહાર આવ્યું કે, આ શેલ કંપનીઓ સંગઠિત સાયબર છેતરપિંડીના ગુનામાંથી મળેલી રકમ એકત્રિત કરવા અને તેને લોન્ડર કરવા માટે વાહક બની હતી. થોડા મહિનાના સમયગાળામાં આ કંપનીઓના બેંક ખાતાઓમાંથી 1000 કરોડ રૂપિયા જમા થયા હતા. આ છેતરપિંડી વિદેશ સ્થિત એક જ સંગઠિત ગુનાહિત સિન્ડિકેટ દ્વારા નિયંત્રિત કરવામાં આવી હતી.

તપાસમાં પેમેન્ટ એગ્રીગેટર્સનો ઉપયોગ વધુ બહાર આવ્યો. ભારતમાં ચુકવણી એકત્રીકરણ પ્રણાલીઓ શરૂ થઈ હતી અને ચુકવણી એગ્રીગેટર્સ વાસ્તવિક કંપનીઓને ટેકનોલોજીનો ઉપયોગ કરીને મોટા સંગ્રહ અને નાણાં વિતરણ સેવાઓ પૂરી પાડી રહ્યા હતા. આ ટેકનોલોજીના કારણે વપરાશકર્તાઓ એક સાથે મોટી સંખ્યામાં બેંક ખાતાઓ ઍક્સેસ કરી શકતા હતા.

ભારતમાં સુવ્યવસ્થિત ચુકવણી પ્રણાલીનો દુરુપયોગ છેતરપિંડી કરનારાઓ શેલ કંપનીના ખાતામાંથી બીજી કંપનીમાં ઝડપી ગતિએ નાણાં લોન્ડર કરવા માટે કરવામાં આવતો હતો. રોકાણકારોનો વિશ્વાસ મેળવવા માટે તેમણે આંશિક રીતે પૈસા પાછા આપવાની પણ મંજૂરી આપવામાં આવતી હતી.

જિલિયન કન્સલ્ટન્ટ્સે કંપની સેક્રેટરી (સીએ) સહિતના વ્યાવસાયિકોને અનેક શેલ કંપનીઓ બનાવવા માટે રાખ્યા હતા. આ રીતે એકત્રિત કરાયેલા નાણાંને દેશની બહાર મોકલતા પહેલા ક્રિપ્ટો કરન્સીમાં રૂપાંતરિત કરવામાં આવ્યા હતા. સીબીઆઈએ શ્રીમતી વાન જુન સાથે સંકળાયેલા તમામ માસ્ટર માઇન્ડ્સની ઓળખ કરી છે. 27 આરોપીઓ અને 3 કંપનીઓ સામે ચાર્જશીટ દાખલ કરી છે.  આ કેસમાં અન્ય શંકાસ્પદો સામે વધુ તપાસ ચાલુ છે.