આરોગ્ય કર્મચારી મહાસંઘ પ્રમુખ ખંડણી માગતાં ઝડપાયો!

સુરેન્દ્રનગર જિલ્લાના ચોટીલાની ચેષ્ટા હોસ્પિટલમાં SOGના નામે રેડ કરી, તમારી હોસ્પિટલમાં ગર્ભ પરીક્ષણ થાય છે તેમ કહી 55 લાખની ખંડણી માગવા જતાં રાજ્યના આરોગ્ય કર્મચારી મહાસંઘનો પ્રમુખ ઝડપાયો છે. હોસ્પિટલમાં રેડ પાડી સ્ટાફ અને સંચાલકને ધમકાવી પ્રેગ્નન્ટ મહિલાને બોલાવી  વીડિયો પણ બનાવ્યો હતો. મામલો થાળે પાડવા 55 લાખની માગણી કરી સંચાલકે વ્યવસ્થા ન હોવાનું જણાવતાં તેમનું અપહરણ કરીને નીકળ્યા બાદ અસલી પોલીસ ભટકાઈ ગઈ હતી. ચોટીલા પોલીસે આરોગ્ય કર્મચારી મહાસંઘના પ્રમુખ રણજીત મોરી અને પ્રદિપસિંહ પરમારની ધરપકડ કરી રિમાન્ડ મેળવીને વધુ પૂછપરછ હાથ ધરી છે.

રણજીતસિંહે પોતે અને પોતાની સાથે રહેલા પ્રદિપસિંહ પરમાર SOG ગાંધીનગર હોવાનું તેમજ પોતે સ્પેશિયલ ઓપરેશન માટે આવ્યા હોવાનું જણાવી રમાબેન મુળુભાઇ બડમલીયાની ચેષ્ટા હોસ્પિટલમાં ગર્ભપરીક્ષણ થતું હોવાના ખોટા આક્ષેપ કર્યા હતા. રમાબેન, તેમના દિકરા અભિષેક તથા પરિવારના અન્ય સભ્યોને આજીવન જેલમાં પૂરી દેવાની ધમકી આપી હતી.

ધમકી આપી રમાબહેન પાસે પ્રથમ 55 લાખ, ત્યારબાદ 45 લાખ અને છેલ્લે 40 લાખ રૂપિયાની માગણી કરી હતી. આરોપીઓએ ઝડપથી વ્યવસ્થા કરી આપવાનું કહેતા રમાબેને રૂપિયાની વ્યવસ્થા ચાલુ હોવાનું જણાવતા આરોપી રણજીતસિંહે ઉશ્કેરાઈ જઈ ખંડણી માંગવાના ઇરાદે રમાબેનને પોતાની ગાડીમાં બેસાડી અપહરણ કરી લઈ ગયા હતા.

ચોટીલા પોલીસને જાણ થતાં ચોટીલા પોલીસ હોસ્પિટલે પહોંચ્યો હતો. જ્યાં તેમણે રમાબેનના દીકરા સાથે વાત કરી આરોપીઓને પકડવા ટ્રેપ ગોઠવી હતી. રમાબેનના દીકરા અભિષેકે અપહરણકારો સાથે વાત કરી પૈસાની વ્યવસ્થા થઈ ગઈ હોવાનું જણાવતાં આરોપીઓએ લોકેશન મોકલી પૈસા આપવા બોલાવ્યો હતો. પોલીસે આરોપીઓનું લોકેશન ટ્રેસ કરી રણજીતસિંહ મોરી અને પ્રદિપસિંહ વનરાજસિંહ પરમારને ઝડપી પાડી હોસ્પિટલ સંચાલકને મુક્ત કરાવ્યા હતા.  

ચોટીલા પોલીસ સ્ટેશનના પીઆઈ આર.એમ.સંઘાડાએ જણાવ્યું કે, આરોપીઓ હોસ્પિટલમાં ઘૂસીને મોબાઈલથી વીડિયો બનાવી SOGએ  રેડ પાડી હોય તેવો માહોલ ઊભો કર્યો હતો. પોતાની સાથેનો વ્યક્તિ SOGનો કર્મચારી હોવાનું જણાવ્યું હતું. હોસ્પિટલ સંચાલકો પોલીસની રેડ સમજી આરોપીઓના તાબે થઈ રકમ આપી દેવાની મોડસ ઓપરેન્ડી અપનાવી હતી. આરોપીઓના મોબાઇલમાંથી ચેષ્ટા હોસ્પિટલના વીડિયો મળી આવ્યા છે. જેમાં તે કહી રહ્યો છે કે તેની સાથેનો વ્યક્તિ SOG નો કર્મચારી છે અને તમારી હોસ્પિટલમાં ગેરકાયદે ગર્ભપરીક્ષણ થાય છે. આ વીડિયોને પુરાવા તરીકે લઈ આરોપીઓ સામે ગુનો નોંધી ચોટીલા પોલીસે કાર્યવાહી હાથ ધરી છે.

મુખ્ય આરોપી રણજીતસિંહ મોરી ભાવનગર જિલ્લા પંચાયતમાં આરોગ્ય વિભાગમાં મલ્ટી પર્પઝ હેલ્થ સુપર વાઇઝરનો હોદ્દો ધરાવે છે. તે ગુજરાત રાજ્ય આરોગ્ય કર્મચારી મહાસંઘનો પ્રમુખ તેમજ રાજ્ય કર્મચારી મહામંડળના સભ્ય તરીકે કાર્યરત છે. ગાંધીનગરમાં આરોગ્ય કર્મચારીઓના રાજ્ય વ્યાપી આંદોલનમાં રણજીતસિંહ મોરીએ મુખ્ય ભૂમિકા ભજવી હતી. SOGના નકલી પોલીસ કર્મચારી બની મહિલા સંચાલકનું અપહરણ કરી ખંડણી માગવાના કારસામાં અસલી પોલીસના હાથે ઝડપાઈ ગયા છે.