ગુજરાતીઓને જોબના નામે મ્યાનમાર મોકલી, સાયબર ગુલામી

ગુજરાતમાં એક ગંભીર આંતરરાષ્ટ્રીય સાયબર સિન્ડિકેટ અને માનવ તસ્કરીનો મોટો મામલો સામે આવ્યો છે, જેમાં આરોપીઓ દ્વારા પાકિસ્તાની એજન્ટો અને ચીની સાયબર માફિયાઓ સાથે મળીને ગુનાને અંજામ આપવામાં આવ્યો છે.

આરોપીઓ, જેમાં સોનલ સંજયભાઈ ફડદુ, સંજયભાઈ હરિભાઈ ફળદુ અને શૈલેષભાઈ વાલજીભાઈ ડાભીનો સમાવેશ થાય છે, તેમણે એક સમાન ઇરાદાથી એકસાથે મળીને ગુજરાતના નાગરિકોને નિશાન બનાવ્યા હતા. તેઓએ યુવાનોને વિદેશમાં ઊંચા પગારવાળી ડેટા એન્ટ્રીની જોબ પ્લેસમેન્ટ આપવાની લાલચ આપી હતી.

41 નાગરિકોની માનવ તસ્કરી : 

આ સિન્ડિકેટે 41 જેટલા ગુજરાતી નાગરિકોને – જેમાં મ્યાનમાર-05, દુબઈ-15, વિયેતનામ-15, મલેશિયા-06નો સમાવેશ થાય છે – દક્ષિણ પૂર્વ એશિયાઈ દેશોની ટિકિટ બુક કરાવી હતી. પાકિસ્તાની એજન્ટો મીયાઝઅલી અને તનવીર મારફતે આ લોકોને વિદેશ મોકલવામાં આવ્યા હતા.

યુવાનો એરપોર્ટ પહોંચે કે તરત જ, ચીની ગેંગના એજન્ટો તેમનો પાસપોર્ટ, મોબાઇલ ફોન અને અન્ય દસ્તાવેજો જપ્ત કરી લેતા હતા. તેમને ગેરકાયદેસર રીતે બળપૂર્વક મોઇ નદી મારફતે સરહદ પાર કરાવીને મ્યાનમારના સરહદી વિસ્તારમાં આવેલા કે.કે. પાર્ક, મ્યાવાડી ટાઉનશિપ ખાતે લઈ જવામાં આવ્યા હતા.

સાયબર ગુલામી અને યાતના : 

ગેરકાયદેસર રીતે ચાલતા આ ચાઇનીઝ હબમાં, આ તમામ નાગરિકોને સાયબર ગુલામી (Cyber Slavery)નો ભોગ બનાવવામાં આવ્યા હતા. તેમને ડફશિંગ (Phishing), ક્રિપ્ટો સ્કેમ, પોન્ઝી સ્કીમ, ડેટિંગ એપ દ્વારા છેતરપિંડી જેવા વિવિધ સાયબર ગુનાઓ કરવા માટે મજબૂર કરવામાં આવ્યા હતા.

જે ભોગ બનનાર સહકાર આપતા નહોતા, તેમને લાંબા સમયગાળા સુધી ગેરકાયદેસર અટકાયતમાં રાખીને શારીરિક તેમજ માનસિક હેરાનગતિ અને ત્રાસ આપવામાં આવતો હતો. આરોપીઓએ આ આંતરરાષ્ટ્રીય સિન્ડિકેટ સાથે મળીને સાયબર ક્રાઇમના ગુનાઓ આચરી આર્થિક લાભ મેળવ્યો છે. સરખેજ પોલીસે આ મામલે ગુનો નોંધી વધુ તપાસ હાથ ધરી છે.