સોશિયલ મીડિયાથી મિત્રતા કેળવી બ્લેકમેલ થવા સુધીની યાતના, આખરે પોલીસના દ્વાર ખખડાવ્યા

  સ્નેપચેટ, ઇન્સ્ટાગ્રામ જેવા સોશિયલ મીડિયા પર મિત્રો ખૂબ આસાનીથી મળી જાય છે.  આ મિત્રોની રંગીન વાતો, જુદા જુદા સોફટવેરથી એડિટ કરેલી તસ્વીર અને રીલ્સ તરુણ-તરુણીઓને આસાનીથી ઈમ્પ્રેસ કરી શકાય છે. ઇન્ટરનેટ કનેક્ટિવિટી થી સંધાયેલા બધા સંબંધો હુંફાળા નથી હોતા, કેટલાક આમંત્રણની પાછળ ષડયંત્ર હોય છે. જેને કુમળા માનસના તરુણ-તરુણીઓ સમજે તે પહેલા તો શિકાર થઇ છે. આજે વાત કરવાની છે આવી જ મેલી રમતની અને તેના પાછળની મેલી મુરાદની.   વાત છે, અમદાવાદ બોપલ વિસ્તારમાં રહેતી અનૂજાની (નામ બદલ્યું છે), અનુજા ડિસેમ્બર ૨૦૨૩ના ક્રિસ્ટમસ વેકેશન માં ગોવા ટ્રેકિંગ કેમ્પમાં ગઇ હતી. માતા પિતા ખુશ હતા, દિકરી સ્વાવલંબી બનવા સાથે સાહસી પણ થશે. એક સપ્તાહના ટ્રેકિંગ કેમ્પમાં  અનુજા મોડી સાંજ સુધી પરત ફરી નહી. કેમ્પ સંચાલક ગોવામાં પરેશાન, અને તેના માતા-પિતા અમદાવાદ. પિતા ફોન પર ફોન કરે પરંતુ, અનુજાનો મોબાઇલ ફોન સતત સ્વિચ ઓફ, આખરે રાત્રે નવ કલાકે તેનો સંપર્ક થઈ શક્યો, દીકરી સલામત હોવાનો આનંદ થયો, પણ શંકાના વમળે માતા-પિતાનો ચેન છીનવી લીધો.   માતા-પિતા બીજા દિવસે ગોવા પહોંચી ગયાં, દીકરીને મળી હાશકારો અનુભવ્યો, પરંતુ દીકરીના હાથ પર ડામ જોઈ ચિંતા વધી ગઈ, ભારે જહેમત બાદ અનુજાને વિશ્વાસ બેસતા, તેણે સઘળી વાત કરી તો માતા પિતાના હોશ ઉડી ગયા. અનુજા સોશિયલ મીડિયાના માધ્યમથી પૂણેના સાહિલ અહેમદ સતારકર સાથે તેને મિત્રતા થઇ હતી. સાહિલને જાણ થઈ ગઈ કે અનુજા ગોવા છે અને તે ગોવા પહોંચી ગયો, જે દિવસે અનુજાનો સંપર્ક નહોતો થઇ શકતો તે દિવસે અનુજા આખો દિવસ સાહિત સાથે હતી. સાહિલે તેનો ફોન સ્વિચ ઓફ કરી દીધો હતો.   અનુજાએ સાહિલની કોઈ વાતનો સ્વીકાર કર્યો તો ગુસ્સામાં સાહિલ તેને સીગરેટથી હાથ પર ડામ આપી દીધો હતો.   ચિંતિત માતા-પિતા અનુજાને કેમ્પ અધવચ્ચે થી છોડાવી અમદાવાદ પરત લઇ આવે છે.    પરંતુ સાહિલે અનુજાનો પીછો છોડ્યો નહોતો. તે સતત ફોન કરી અનુજાને માનસિક ત્રાસ આપતો હતો. એક દિવસે ફોન પર ધમકી આપી છોકરી નિર્વસ્ત્ર થવા દબાણ કર્યું, જેવા તેણીએ કપડા ઉતાર્યા, સાહિલે રેકોર્ડ કરી દીધું, જેનો તે પાછળથી બ્લેકમેલ કરવા દુરુપયોગ કરતા. આ વીડિયોના આધારે, સાહિલ અનુજા પાસે પૈસા મંગાવતો હતો. અનુજા પાસે પૈસા ન હોય તો તેને એટલો બધો માનસિક ત્રાસ આપતો હતો કે સાહિલે મોકલેલ QR code, અનુજા સગા-સંબંધીને શેર કરી તેના પર નાણાં મોકલવા કાકલૂદી કરતી હતી. સાહિલે હદ ત્યારે વટાવી જ્યારે તેણે અનુજા સોશિયલ મીડિયા હેન્ડલ્સ કે જે સ્નેપચેટ, ઇન્સ્ટાગ્રામ વગેરે પાસવર્ડ લઇ લીધા. માનસિક ત્રાસથી પંડી ભાંગેલી પીડિતા આખરે સમગ્ર વાત તેના મા-બાપને કરતા , તેમણે પોલીસના દ્વાર ખખડાવી સાહિલ સામે પોલીસ ફરિયાદ કરી છે.   પોલીસની પ્રાથમિક તપાસમાં એવું બહાર આવ્યું છે કે સાહિલ ૨૧ વર્ષનો છે અને તે તાજ કોર્નરના નામથી ફ્રટનો ધંધો કરે છે. આરોપી ઇન્સ્ટાગ્રામ, સ્નેપચેટ જેવા માધ્યમથી છોકરીઓ સાથે સંપર્ક કેળવતો હતો અને એક વખત છોકરી તેની જાળમાં ફસાય એટલે માનસિક ત્રાસ આપી, બ્લેકમેલ કરતો અને પૈસા પડાવવાનો ધંધો શરૂ કરી દીધો હતો.