સંસ્કારી નગરીમાં વિદેશી વિદ્યાર્થીઓ વિફર્યા, સ્થાનિકો પર કર્યો પથ્થરમારો, અનેક લોકોને પહોંચાડી ઈજા

વડોદરામાં છેલ્લા નોરતે વિદેશી વિદ્યાર્થીઓ બેફામ થયા હોય તેવી ઘટના સામે આવી છે. વાઘોડિયા નિમેટા રોડની સોસાયટીમાં ભાડાના મકાનમાં રહેતા ખાનગી યુનિવર્સિટીના વિદેશી વિદ્યાર્થીઓએ શનિવારે મોડી રાત્રે રસ્તો બાનમાં લીધો હતો.. ગરબે રમી પરત ફરતી મહિલાઓને તો હારાન કરી જ સાથે અનેક લોકો પર હુમલો કરી વાહનો પર પથ્થરો ફેક્યા હતા. 

વાઘોડિયા નિમેટા રોડની સોસાયટીમાં ભાડાના મકાનમાં રહેતા 7 જેટલા વિદેશી વિદ્યાર્થીઓએ નિમેટા રોડ ઉપર મોડી રાત્રે આડશ મૂકીને ભારે આતંક મચાવ્યો હતો. સ્થાનિકોનો આક્ષેપ છે કે ગરબા જોઈને પરત ફરતાં ગ્રામજનો ઉપર તેમણે હુમલો કરી વાહનોની તોડફોડ કરી હતી. વિદેશી વિદ્યાર્થીઓએ યુવતીઓને પણ નિશાન બનાવી હતી. આ ઘટનામાં 8 થી વધુ ગ્રામજનોને નાની મોટી ઇજાઓ પહોંચતા હોસ્પિટલ ખાતે સારવાર આપવામાં આવી હતી.

સ્થાનિકો દ્વારા આરોપ મુકવામાં આવ્યો કે વિદેશી વિદ્યાર્થીઓ નશામાં હતા.નશામાં ધૂત 6થી 7 વિદ્યાર્થીઓએ રાત્રે નિમેટા સિકોતર માતાના મંદિર પાસે રસ્તા ઉપર આડશ મૂકીને ગરબા જોઈને પરત ફરી રહેલા ગામના યુવાનો અને યુવતીઓને રોકીને હુમલો કરી ઇજા પહોંચાડી હતી. આ ઉપરાંત આ વિદેશી વિદ્યાર્થીઓ દ્વારા કાર સહિતનાં વાહનોની તોડફોડ કરવામાં આવી હતી અને ભારે નુકસાન પહોંચાડ્યું હતું. વિદેશી વિદ્યાર્થીઓ દ્વારા પથ્થરમારો કરવામાં આવતા 8  જેટલા યુવાનોને ઇજા પહોંચી હતી. 

મોડી રાત્રે બનેલા બનાવને પગલે પંથકમાં હાહાકાર મચી ગયો હતો. ગ્રામજનોએ રોષમાં આવીને વિદેશી વિદ્યાર્થીઓનાં ભાડાનાં મકાનોમાં પહોંચી તેઓનાં મકાનોમાં પણ તોડફોડ કરી હોવાનું જાણવા મળ્યું હતું. વિદેશી વિદ્યાર્થીઓ અને ગ્રામજનો વચ્ચે થયેલી છૂટાહાથની મારામારીમાં 8 જેટલી વ્યક્તિને ઇજા પહોંચી હતી. ઈજાગ્રસ્તોને ખાનગી યુનિવર્સિટીની હોસ્પિટલ ખાતે ખસેડવામાં આવ્યા હતા. મોડી રાત્રે બનેલા આ બનાવની જાણ વાઘોડિયા પોલીસને થતાં પોલીસ કાફલો પણ સ્થળ પર દોડી ગયો હતો અને વિદેશી વિદ્યાર્થીઓના નિવાસસ્થાનો ઉપર પોલીસ બંદોબસ્ત ગોઠવી દીધો હતો. મામલો વધુ ઉગ્ર બને તે પૂર્વે પોલીસ દોડી ગયેલી પોલીસે મામલો થાળે પાડ્યો હોવાનું જાણવા મળ્યું છે.