સાબરકાંઠાના ઈડરમાં બનાવટી દૂધ રેકેટનો પર્દાફાશ

સાબરકાંઠા જિલ્લાના ઈડર તાલુકાના શીંગા ગામેથી બનાવટી દૂધ બનાવવાના રેકેટનો પર્દાફાશ થયો છે. સાબરકાંઠા એસઓજી પોલીસે બાતમીના આધારે દરોડા પાડી રહેણાંક મકાનમાંથી આશરે 200 લિટર નકલી દૂધ ઝડપી પાડ્યું છે. પોલીસની પ્રાથમિક તપાસમાં જાણવા મળ્યું કે, સોયા ઓઈલ, મેલ્ટોડેક્સિન અને વે પાવડર જેવા પદાર્થોની મદદથી નકલી દૂધ તૈયાર કરવામાં આવતું હતું.

પોલીસે સ્થળ પરથી બનાવટી દૂધ ઉપરાંત તેને બનાવવા માટેનું મટીરિયલ જપ્ત કરી છે. ગેરકાયદે પ્રવૃત્તિમાં સંડોવાયેલા સુનિલ શર્મા નામના શખ્સની ધરપકડ કરીને વધુ તપાસ હાથ ધરી છે. લોકોના આરોગ્ય સાથે ચેડાં થતાં હોવાથી પોલીસે ફૂડ એન્ડ ડ્રગ્સ વિભાગને આગળની કાર્યવાહી માટે જાણ કરી છે. બનાવટી દૂધના વેચાણથી લોકોના આરોગ્યને ગંભીર ખતરો થવાની શક્યતા હોવાથી પોલીસની સાથે ફૂડ એન્ડ ડ્રગ્સ વિભાગે પણ સમગ્ર મામલાની તપાસ શરૂ કરી છે.