દારૂના નશામાં પત્નીએ પતિની કુહાડીથી કરી હત્યા

કાનપુરમાં હચમચાવનારી ઘટના: નશામાં ધૂત પત્નીએ પતિ પર કુહાડીથી હુમલો કરી મોતને ઘાટ ઉતાર્યો

ઉત્તર પ્રદેશના કાનપુર સ્થિત બિથુર વિસ્તારના ટિકરા ગામમાં એક હૃદયદ્રાવક ઘટના સામે આવી છે. અહીં એક મહિલાએ તેના પતિ સાથે દારૂ પીધા બાદ થયેલા ઝઘડામાં કુહાડીથી વારંવાર હુમલો કરીને તેની નિર્મમ હત્યા કરી નાખી છે. આ ઘટના બાદ આરોપી મહિલા પોતાના ચાર વર્ષના પુત્ર સાથે ફરાર થઈ ગઈ છે.

દારૂના નશામાં બે કલાક સુધી ચાલ્યો ઝઘડો : 

પોલીસ તપાસમાં જાણવા મળ્યું છે કે મૃતક 45 વર્ષીય પપ્પુ એક ટાઇલ કંપનીમાં કામ કરતો હતો. બુધવારે રાત્રે તે અને તેની પત્ની વીરાંગના ઘરે સાથે દારૂ પી રહ્યા હતા. આ દરમિયાન કોઈ વાતને લઈને બંને વચ્ચે ઉગ્ર દલીલો શરૂ થઈ હતી. આ ઝઘડો લગભગ બે કલાક સુધી ચાલ્યો હતો. ઉશ્કેરાયેલી પત્નીએ ઘરમાં રહેલી કુહાડી, વેલણ અને પથ્થર વડે પતિ પર હુમલો કરી દીધો હતો.

પુરાવા ભૂંસવાનો કર્યો પ્રયાસ : 

હુમલા બાદ પતિ લોહીલુહાણ હાલતમાં જમીન પર પડી ગયો હતો. આરોપી મહિલાએ પુરાવા નાશ કરવા માટે જમીન પરથી લોહીના ડાઘા સાફ કર્યા હતા અને સાસરિયાઓને ગુમરાહ કરવાનો પ્રયાસ કર્યો હતો. જોકે, હોસ્પિટલમાં સારવાર દરમિયાન તબીબોએ ઇજાઓ તીક્ષ્ણ હથિયારથી થઈ હોવાની પુષ્ટિ કરતા મામલો ગંભીર બન્યો હતો. ગુરુવારે સવારે સારવાર દરમિયાન પપ્પુનું મોત નીપજ્યું હતું.

પોસ્ટમોર્ટમ રિપોર્ટમાં ચોંકાવનારો ખુલાસો : 

મૃતકના પોસ્ટમોર્ટમ રિપોર્ટમાં બહાર આવ્યું છે કે તેના માથા પર 10 થી વધુ ગંભીર ઘા હતા. ડીસીપી પશ્ચિમ દિનેશ ત્રિપાઠીએ જણાવ્યું કે આ અકસ્માત નથી પણ આયોજિત હત્યા હોવાનું જણાય છે. મહિલાએ માત્ર કુહાડી જ નહીં પણ રસોડાની અન્ય વસ્તુઓનો પણ જીવલેણ હુમલો કરવામાં ઉપયોગ કર્યો હતો.

પરિવારનો ગંભીર આક્ષેપ : 

મૃતકની માતાના જણાવ્યા મુજબ, વર્ષ 2019માં લગ્ન થયા બાદથી જ મહિલા અવારનવાર ઝઘડા કરતી હતી. ઘટનાના દિવસે તે નશામાં ઘરે આવી હતી જેના કારણે વિવાદ વકર્યો હતો. હાલ પોલીસ મહિલા અને તેના બાળકને શોધી રહી છે અને મામલે વધુ તપાસ હાથ ધરી છે.