રાજકોટમાં સિનર્જી હોસ્પિટલના ડોક્ટરનો આપઘાત

રાજકોટમાં સ્પીડવેલ પાર્ટી પ્લોટ પાસે આવેલા સુવર્ણભૂમિ કોમ્પલેક્ષમાં રહેતા સિંનજી હોસ્પિટલના એનેસ્થેટિસ્ટ ડો.જય પટેલે આજરોજ બપોરના દવાનો ઓવરડોઝ લઇ આપઘાત કરી લીધો હતો. બનાવની જાણ થતાં તાલુકા પોલીસ મથકનો સ્ટાફ બનાવ સ્થળે પહોંચ્યો હતો. આજે સવારથી ડો. જય પટેલ કોલ રિસિવ કરતા ન હોય સિનર્જીનો સ્ટાફ અહીં તપાસ કરવા આવ્યો હતો દરમિયાન ડો. જય પટેલે આપઘાત કરી લીધો હોવાનું જાણવા મળ્યું હતું. તબીબના માતા-પિતા હાલ જાત્રાએ ગયા હોવાનું જાણવા મળ્યું છે. ડો. જય પટેલના છુટ્ટાછેડાનો કેસ ચાલતો હોવાનું અને ગૃહ ક્લેશના લીધે તેમણે આ પગલું ભરી લીધું હોવાનું જાણવા મળ્યું છે.

તાલુકા પોલીસ મથકનો સ્ટાફ તાકીદે બનાવ સ્થળે પહોંચ્યો

આપઘાતના આ બનાવની જાણવા મળતી વિગતો મુજબ નાનામવા ગામ પાસે ભીમનગર નજીક આવેલા સ્પીડવેલ પાર્ટી પ્લોટ પાસે આવેલા સુવર્ણભૂમિ કોમ્પ્લેક્ષમાં વિંગ-બીમાં છઠ્ઠા માળે ફલેટમાં રહેતા ડો. જય પટેલે આપઘાત કરી લીધો હોવા અંગેની જાણ થતાં તાલુકા પોલીસ મથકનો સ્ટાફ તાકિદે બનાવ સ્થળે પહોંચ્યો હતો અને જરૂરી કાર્યવાહી કરી મૃતદેહને પીએમ માટે હોસ્પિટલ ખસેડયો હતો.

ડો. જય પટેલ સિનર્જી હોસ્પિટલમાં એનેસ્થેટિસ્ટ તરીકે નોકરી કરતા

આપઘાતના આ બનાવની વધુમાં જાણવા મળતી વિગતો મુજબ ડો. જય પટેલ સિનર્જી હોસ્પિટલમાં એનેસ્થેટિસ્ટ તરીકે નોકરી કરતા હોવાનું જાણવા મળ્યું છે. હાલ ડોક્ટરના માતા-પિતા જાત્રા માટે ગયા છે. સિનર્જી હોસ્પિટલ દ્વારા આજરોજ ડોકટર અહીં હોસ્પિટલ ન આવતા તેને ફોન કરવામાં આવ્યા હતાં તે કોલ રિસિવ ન કરતા હોસ્પિટલનો સ્ટાફ અહીં તબીબના ઘરે પહોંચ્યો હતો. દરમિયાન ડોકટર જય પટેલ બેભાન હાલતમાં પડયા હોય 108ને જાણ કરવામાં આવી હતી ત્યારબાદ 108ની ટીમે અહીં આવી જોઈ તપાસી ડોકટર જય પટેલને મૃત જાહેર કર્યો હતો. પોલીસની પ્રાથમિક તપાસમાં દવાનો ઓવરડોઝ લઇ આપઘાત કર્યો હોવાનું માલુમ પડયું છે.

ગૃહ ક્લેશથી કંટાળી પગલું ભરી લીધું

વિશેષમાં જાણવા મળતી વિગતો મુજબ ડોકટર જય પટેલને પત્ની સાથે હાલ છુટ્ટાછેડાની મેટર ચાલતી હોય જેથી ગૃહ કલેશથી કંટાળી જઇ તેમણે આ પગલું ભરી લીધુ હોવાનું જાણવા મળ્યું છે. જોકે, આપઘાતનું સચોટ કારણ જાણવા માટે પોલીસ દ્વારા તબીબના પરિવારજનોની પુછતાછ કરવામાં આવશે ત્યારબાદ આપઘાતનું સાચુ કારણ સામે આવશે